၄၅. ပဝါရဏာနိဒ္ဒေသော

ပဝါရဏာတိ –

၄၃၃. ဒွိန္နံ တိဏ္ဏံ စတုန္နဉ္စ၊ အညမညပ္ပဝါရဏာ၊

ဧကဿ စ အဓိဋ္ဌာနံ၊ သေသာ သံဃပ္ပဝါရဏာ.

၄၃၄. ပုဗ္ဗကိစ္စေ စ ကရဏေ၊ ပတ္တကလ္လေ သမာနိတေ၊

ဌပေတွာ ဉတ္တိံ သံဃေန၊ ကတ္တဗ္ဗေဝံ ပဝါရဏာ.

‘‘သုဏာတု မေ ဘန္တေ သံဃော၊ အဇ္ဇ ပဝါရဏာ ပန္နရသီ၊ ယဒိ သံဃဿ ပတ္တကလ္လံ၊ သံဃော ပဝါရေယျာ’’တိ.

၄၃၅. ဧကံသံ စီဝရံ ကတွာ၊ နိသီဒိတွာ ဥက္ကုဋိကံ၊

ထေရေန အဉ္ဇလိံ သံဃော၊ ပဂ္ဂယှ သမုဒီရိယော.

၄၃၆. ‘‘သံဃံ၊ အာဝုသော၊ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒန္တု မံ အာယသ္မန္တော အနုကမ္ပံ ဥပါဒါယ၊ ပဿန္တော ပဋိကရိဿာမိ. ဒုတိယမ္ပိ။ပေ။ တတိယမ္ပိ၊ အာဝုသော၊ သံဃံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒန္တု မံ အာယသ္မန္တော အနုကမ္ပံ ဥပါဒါယ၊ ပဿန္တော ပဋိကရိဿာမီ’’တိ.

၄၃၇. ပဝါရေန္တေသု ထေရေသု၊ နိသဇ္ဇုက္ကုဋိကံ နဝေါ၊

ပဝါရေတိ သယံ ယာဝ၊ ဥက္ကုဋိကောဝ အစ္ဆတု.

၄၃၈. ပုဗ္ဗာရမ္ဘံ သမာပေတွာ၊ နဝေါ သံဃမုဒီရယေ.

၄၃၉. ‘‘သံဃံ၊ ဘန္တေ၊ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒန္တု မံ အာယသ္မန္တော အနုကမ္ပံ ဥပါဒါယ၊ ပဿန္တော ပဋိကရိဿာမိ. ဒုတိယမ္ပိ။ပေ။ တတိယမ္ပိ၊ ဘန္တေ၊ သံဃံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒန္တု မံ အာယသ္မန္တော အနုကမ္ပံ ဥပါဒါယ၊ ပဿန္တော ပဋိကရိဿာမီ’’တိ.

၄၄၀. ဒါနေန ဓမ္မသာကစ္ဆာ၊ ကလဟေဟိ စ ရတ္တိယာ၊

တေဝါစိကာယ ဩကာသေ-သတိ ခေပိတဘာဝတော၊

အန္တရာယေ ဒသဝိဓေ၊ ဉတ္တိံ ဝတွာနုရူပတော.

၄၄၁. ‘‘သုဏာတု မေ ဘန္တေ သံဃော၊ မနုဿေဟိ ဒါနံ ဒေန္တေဟိ၊ ဒွီဟိ ဘိက္ခူဟိ ဓမ္မံ သာကစ္ဆန္တေဟိ၊ ကလဟံ ကရောန္တေဟိ ယေဘုယျေန ရတ္တိ ခေပိတာ. သစေ သံဃော တေဝါစိကံ ပဝါရေဿတိ၊ အပ္ပဝါရိတောဝ သံဃော ဘဝိဿတိ၊ အထာယံ ရတ္တိ ဝိဘာယိဿတိ. အယံ ရာဇန္တရာယော၊ အယံ စောရန္တရာယော၊ အယံ အဂျန္တရာယော၊ အယံ ဥဒကန္တရာယော၊ အယံ မနုဿန္တရာယော၊ အယံ အမနုဿန္တရာယော၊ အယံ ဝါဠန္တရာယော၊ အယံ သရီသပန္တရာယော၊ အယံ ဇီဝိတန္တရာယော၊ အယံ ဗြဟ္မစရိယန္တရာယော. သစေ သံဃော တေဝါစိကံ ပဝါရေဿတိ၊ အပ္ပဝါရိတောဝ သံဃော ဘဝိဿတိ၊ အထာယံ ဗြဟ္မစရိယန္တရာယော ဘဝိဿတိ. ယဒိ သံဃဿ ပတ္တကလ္လံ၊ သံဃော ဒွေဝါစိကံ၊ ဧကဝါစိကံ၊ သမာနဝဿိကံ ပဝါရေယျာ’’တိ.

၄၄၂. ပဝါရေယျာနုရူပေန၊ ယထာဌပိတဉတ္တိယာ၊

အာဂစ္ဆေယျုံ ယဒိ သမာ၊ အာဒိကာ စေတ္ထ အာဟရေ.

၄၄၃. ဧဝံ တိစတုဝဂ္ဂေါ စ၊ ဉတ္တိံ ဝတွာ ပဝါရယေ. ‘‘သုဏန္တု မေ အာယသ္မန္တာ၊ အဇ္ဇ ပဝါရဏာ ပန္နရသီ၊ ယဒါယသ္မန္တာနံ ပတ္တကလ္လံ၊ မယံ အညမညံ ပဝါရေယျာမာ’’တိ.

၄၄၄. ဧကံသံ စီဝရံ ကတွာ၊ နိသီဒိတွာ ဥက္ကုဋိကံ၊

ထေရေန အဉ္ဇလိံ တေဝံ၊ ပဂ္ဂယှ သမုဒီရိယာ.

၄၄၅. ‘‘အဟံ၊ အာဝုသော၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒန္တု မံ အာယသ္မန္တာ အနုကမ္ပံ ဥပါဒါယ၊ ပဿန္တော ပဋိကရိဿာမိ. ဒုတိယမ္ပိ။ပေ။ တတိယမ္ပိ အဟံ၊ အာဝုသော၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒန္တု မံ အာယသ္မန္တာ အနုကမ္ပံ ဥပါဒါယ၊ ပဿန္တော ပဋိကရိဿာမီ’’တိ.

နဝေနာပိ ‘‘အဟံ၊ ဘန္တေ၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒန္တု မံ အာယသ္မန္တာ အနုကမ္ပံ ဥပါဒါယ၊ ပဿန္တော ပဋိကရိဿာမိ. ဒုတိယမ္ပိ။ပေ။ တတိယမ္ပိ အဟံ၊ ဘန္တေ၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒန္တု မံ အာယသ္မန္တာ အနုကမ္ပံ ဥပါဒါယ၊ ပဿန္တော ပဋိကရိဿာမီ’’တိ.

၄၄၆. ဒွီသု ထေရေန ကတ္တဗ္ဗံ၊ နဝေါ ကတွေဝမီရိယော.

၄၄၇. ‘‘အဟံ၊ အာဝုသော၊ အာယသ္မန္တံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒတု မံ အာယသ္မာ အနုကမ္ပံ ဥပါဒါယ၊ ပဿန္တော ပဋိကရိဿာမိ. ဒုတိယမ္ပိ။ပေ။ တတိယမ္ပိ အဟံ၊ အာဝုသော၊ အာယသ္မန္တံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒတု မံ အာယသ္မာ အနုကမ္ပံ ဥပါဒါယ၊ ပဿန္တော ပဋိကရိဿာမီ’’တိ.

နဝေနာပိ ‘‘အဟံ၊ ဘန္တေ၊ အာယသ္မန္တံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒတု မံ အာယသ္မာ အနုကမ္ပံ ဥပါဒါယ၊ ပဿန္တော ပဋိကရိဿာမိ. ဒုတိယမ္ပိ။ပေ။ တတိယမ္ပိ အဟံ၊ ဘန္တေ၊ အာယသ္မန္တံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒတု မံ အာယသ္မာ အနုကမ္ပံ ဥပါဒါယ၊ ပဿန္တော ပဋိကရိဿာမီ’’တိ.

၄၄၈. ပုဗ္ဗကိစ္စံ သမာပေတွာ၊ အဓိဋ္ဌေယျေဝမေကကော. ‘‘အဇ္ဇ မေ ပဝါရဏာ စာတုဒ္ဒသီတိ ဝါ ပန္နရသီတိ ဝါ အဓိဋ္ဌာမီ’’တိ ဝတ္တဗ္ဗံ.

၄၄၉. ယသ္မိံ ဝသန္တိ ဝါ ပဉ္စ၊ စတ္တာရော ဝါ တယော ဒုဝေ၊

ပဝါရဏံ ဟရိတွာန၊ ဧကေကဿိတရီတရေ.

၄၅၀. တံ တံ ပဝါရဏံ ကယိရုံ၊

သိယာ အာပတ္တိ ဒုက္ကဋံ၊

သေသာ ဥပေါသထေ ဝုတ္တာ၊

ဂါထာယော စေတ္ထ အာဟရေ.

၄၅၁. ပဝါရိတေဝ သံဃမှိ၊ ပါရိသုဒ္ဓိဥပေါသထံ၊

ကရေယျ ဆိန္နဝဿော ဝါ၊ အဝုတ္ထော ဝါနုပဂတော.

၄၅၂. စာတုမာသိနိယာ စာပိ၊ ကတေ သံဃေနုပေါသထေ၊

ဝုတ္ထဝဿာ ပဝါရေယျုံ၊ သစေ အပ္ပတရာ သိယုန္တိ.