၄၃. ဆန္ဒဒါနနိဒ္ဒေသော

ဆန္ဒဒါနာဒီတိ –

၃၉၉. ဘေရိံ ဃဏ္ဋိံ ပတာဠေတွာ၊ ကမ္မပ္ပတ္တေ သမာဂတေ၊

သံဃေ ဟရေယျ ဆန္ဒံ ဝါ၊ ပါရိသုဒ္ဓိံ ပဝါရဏံ.

၄၀၀. ဧကံ ဘိက္ခုံ ဥပဂ္ဂမ္မ၊ နိသီဒိတွာ ဥက္ကုဋိကံ၊

အဉ္ဇလိံ ပဂ္ဂဏှိတွာန၊ ဒဒေ ဆန္ဒံ ဝိစက္ခဏော.

၄၀၁. (က) ‘‘ဆန္ဒံ ဒမ္မိ၊ ဆန္ဒံ မေ ဟရ၊ ဆန္ဒံ မေ အာရောစေဟီ’’တိ ဝတ္တဗ္ဗံ.

(ခ) ပါရိသုဒ္ဓိံ ဒေန္တေန ‘‘ပါရိသုဒ္ဓိံ ဒမ္မိ၊ ပါရိသုဒ္ဓိံ မေ ဟရ၊ ပါရိသုဒ္ဓိံ မေ အာရောစေဟီ’’တိ ဝတ္တဗ္ဗံ.

၄၀၂. ပါရိသုဒ္ဓိပ္ပဒါနေန၊ သမ္ပာဒေတိ ဥပေါသထံ၊

သံဃဿ အတ္တနော စာပိ၊ သေသကမ္မံ ဝိဗာဓတိ.

၄၀၃. ဆန္ဒဒါနေန သံဃဿ၊ ဒွယံ သာဓေတိ နတ္တနော၊

တသ္မာ ဆန္ဒံ ဒဒန္တေန၊ ဒါတဗ္ဗာ ပါရိသုဒ္ဓိပိ.

၄၀၄. ဟရေယျေကော ဗဟူနမ္ပိ၊ ပရမ္ပရာ န ဟာရယေ၊

ပရမ္ပရာဟဋာ ဆန္ဒ-ပါရိသုဒ္ဓိ န ဂစ္ဆတိ.

၄၀၅. သဗ္ဗူပစာရံ ကတွာန၊ ဧဝံ ဒေယျာ ပဝါရဏာ. ‘‘ပဝါရဏံ ဒမ္မိ၊ ပဝါရဏံ မေ ဟရ၊ ပဝါရဏံ မေ အာရောစေဟိ၊ မမတ္ထာယ ပဝါရေဟီ’’တိ.

၄၀၆. အာရောစေတွာထ သော သံဃံ၊ ပဝါရေယျေဝမာဂတော. ‘‘ဣတ္ထန္နာမော၊ ဘန္တေ၊ သံဃံ ပဝါရေတိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒတု တံ သံဃော အနုကမ္ပံ ဥပါဒါယ၊ ပဿန္တော ပဋိကရိဿတီ’’တိ.

၄၀၇. ဂဟေတွာ ပါရိသုဒ္ဓိံ ဝါ၊ ဆန္ဒံ ဝါပိ ပဝါရဏံ၊

ဟာရကော သံဃမပ္ပတွာ၊ ဝိဗ္ဘမေယျ မရေယျ ဝါ.

၄၀၈. သာမဏေရာဒိဘာဝံ ဝါ၊

ပဋိဇာနေယျ နာဟဋာ၊

ပတွာ သံဃံ တထာ ဟေယျ၊

အာဟဋာ ဟောတိ ဟာရကော.

၄၀၉. သံဃပ္ပတ္တော ပမတ္တော ဝါ၊ သုတ္တော နာရောစယေယျ ဝါ၊

အနာပတ္တိဝ သဉ္စိစ္စ၊ နာရောစေန္တဿ ဒုက္ကဋန္တိ.