၄၁. ပကိဏ္ဏကနိဒ္ဒေသော

ပကိဏ္ဏကန္တိ –

၃၃၅. သဒွါရဗန္ဓနေ ဌာနေ၊ သောဒုက္ခလကပါသကေ၊

သယန္တေန ဒိဝါ ဒွါရံ၊ ဗန္ဓေယျ ပရိဝဋ္ဋကံ.

၃၃၆. သန္တေ ဝိညုမှိ ပုရိသေ၊ အာဘောဂေါ စာပိ ကပ္ပတိ၊

သဝသေ တံ ဝိနာကာရံ၊ သယန္တော ဒုက္ကဋံ ဖုသေ.

၃၃၇. ရတနာနိတ္ထိရူပါနိ၊ ဓညမိတ္ထိပသာဓနံ၊

တူရိယာဝုဓဘဏ္ဍာနိ၊ အာမသန္တဿ ဒုက္ကဋံ.

၃၃၈. သိတ္ထတေလောဒတေလေဟိ၊ ဖဏဟတ္ထဖဏေဟိ ဝါ၊

ကောစ္ဆေနဝါပိ ယော ကေသေ၊ ဩသဏ္ဌေယျဿ ဒုက္ကဋံ.

၃၃၉. နေကပါဝုရဏာ ဧကတ္ထရဏာ ဝါ တုဝဋ္ဋယုံ၊

တထေကမဉ္စေ ဘုဉ္ဇေယျုံ၊ ဧကသ္မိံ ဝါပိ ဘာဇနေ.

၃၄၀. စတုရင်္ဂုလတော ဦနမဓိကဋ္ဌင်္ဂုလံ တထာ၊

ဒန္တကဋ္ဌံ န ခါဒေယျ၊ လသုဏံ န အကလ္လကော.

၃၄၁. ဟီနုက္ကဋ္ဌေဟိ ဥက္ကဋ္ဌံ၊ ဟီနံ ဝါ ဇာတိအာဒိဟိ၊

ဥဇုံ ဝါညာပဒေသေန၊ ဝဒေ ဒုဗ္ဘာသိတံ ဒဝါ.

၃၄၂. ဒီဃေ နခေ စ ကေသေ စ၊ နာသလောမေ န ဓာရယေ၊

န လဗ္ဘံ ဝီသတိမဋ္ဌံ၊ သမ္ဗာဓေ လောမဟာရဏံ.

၃၄၃. ယထာဝုဍ္ဎံ န ဗာဓေယျ၊ သင်္ဃုဒ္ဒိဋ္ဌံဝ သံဃိကံ၊

အဓောတအလ္လပါဒေဟိ၊ နက္ကမေ သယနာသနံ၊

သုဓောတပါဒကံ ဝါပိ၊ တထေဝ သဥပါဟနော.

၃၄၄. သင်္ဃာဋိယာ န ပလ္လတ္ထေ၊ ဘိတ္တာဒိံ န အပဿယေ၊

ပရိကမ္မကတံ သန္တေ၊ ဥဒကေ နော န အာစမေ.

၃၄၅. အကပ္ပိယသမာဒါနေ၊ ဒဝါ သိလာပဝိဇ္ဈနေ၊

ဒေသနာယ သဘာဂါယ၊ အာဝိကမ္မေ စ ဒုက္ကဋံ.

၃၄၆. ပဋိဿဝဝိသံဝါဒေ၊ သုဒ္ဓစိတ္တဿ ဒုက္ကဋံ၊

ပဋိဿဝက္ခဏေ ဧဝ၊ ပါစိတ္တိ ဣတရဿ တု.

၃၄၇. န ရုက္ခမဘိရူဟေယျ၊ သတိ ကိစ္စေဝ ပေါရိသံ၊

အာပဒါသု ယထာကာမံ၊ ကပ္ပတီ အဘိရူဟိတုံ.

၃၄၈. ဝိနာဒ္ဓါနံ ဝဇန္တဿ၊ ဒုက္ကဋံ ပရိသာဝနံ၊

ယာစမာနဿ အဒ္ဓါနေ၊ အဒဒန္တဿ ဒုက္ကဋံ.

၃၄၉. ထုလ္လစ္စယံ ဖုသေ အင်္ဂဇာတစ္ဆေဒေန ဒုက္ကဋံ၊

အာဗာဓပ္ပစ္စယာညတြ၊ သေသင်္ဂေ အတ္တဃာတနေ.

၃၅၀. စိတ္တပေါတ္ထကရူပါနိ၊ န ကရေ န စ ကာရယေ၊

န ဝုဋ္ဌာပေယျ ဘုဉ္ဇန္တံ၊ အာရာမာရညဂေဟသု.

၃၅၁. ယာနာနိ ပုမယုတ္တာနိ၊ သိဝိကံ ဟတ္ထဝဋ္ဋကံ၊

ပါဋင်္ကိဉ္စ ဂိလာနဿ၊ ကပ္ပတီ အဘိရူဟိတုံ.

၃၅၂. ဗုဒ္ဓံ ဓမ္မဉ္စ သံဃဉ္စ၊ အာရဗ္ဘ ကရဏေ ဒဝံ၊

ဒုက္ကဋံ ပရိသံ ဝါပိ၊ အညဿ ဥပလာဠနေ.

၃၅၃. ကာယံ ဦရုံ နိမိတ္တံ ဝါ၊ ဘိက္ခုနီနံ န ဒဿယေ၊

ဝိဝရိတွာ န သိဉ္စေယျ၊ တာ ကဒ္ဒမုဒကာဒိနာ.

၃၅၄. န ဂဏှတော စ ဩဝါဒံ၊ န ပစ္စာဟရတောပိ စ၊

ဗာလံ ဂိလာနံ ဂမိယံ၊ ဝဇ္ဇယိတွာန ဒုက္ကဋံ.

၃၅၅. လောကာယတံ န ဝါစေယျ၊ ပလိတံ န စ ဂါဟယေ၊

ပေဠာယပိ န ဘုဉ္ဇေယျ၊ န ကီဠေ ကိဉ္စိ ကီဠိတံ.

၃၅၆. ပါရုပေ န နိဝါသေယျ၊ ဂိဟိပါရုတနိဝါသနံ၊

သံဝေလ္လိယံ နိဝါသေယျ၊ ဒါယံ နာလိမ္ပယေယျ ဝါ.

၃၅၇. ဝဍ္ဎိံ ပယောဇယေ ယာစေ၊ နောညာတကပ္ပဝါရိတေ၊

အတ္တနော ပရိဘောဂတ္ထံ၊ ဒိန္နမညဿ နော ဒဒေ၊

အဂ္ဂံ ဂဟေတွာ ဘုတွာ ဝါ၊ ကတိပါဟံ ပုနော ဒဒေ.

၃၅၈. ဥဒ္ဒိဿ ယာစနေ ရက္ခံ၊ ဉတွာဉတွာ ဝ ဒဏ္ဍိနံ၊

ဂီဝါဿ ဒဏ္ဍိတေ ဒဏ္ဍော၊ သယံ ဒဏ္ဍာပနေ ပန၊

ဒဏ္ဍဿ အဂ္ဃဘေဒေန၊ ဉေယျာ ပါရာဇိကာဒိကာ.

၃၅၉. ဟရန္တေသု ပရိက္ခာရံ၊ ‘‘စောရော စောရော’’တိ ဘာသိတေ၊

အနတ္ထာယေသံ ဂဏှန္တေ၊ ဒဏ္ဍံ ဂီဝါဿ တတ္တကံ.

၃၆၀. ဝိဃာသုစ္စာရသင်္ကာရ-မုတ္တံ ဆဍ္ဍေယျ ဒုက္ကဋံ၊

ဗဟိ ပါကာရကုဋ္ဋာနံ၊ ဝဠဉ္ဇေ နာဝလောကိယ၊

ဟရိတေ ဝါပိ ဝီဟာဒိ-နာဠိကေရာဒိရောပိမေ.

၃၆၁. ယောဇာပေတုံ ပယောဇေတုံ၊ ပယုတ္တာနိ စ ပဿိတုံ၊

န လဗ္ဘံ ဓမ္မယုတ္တမ္ပိ၊ နစ္စံ ဂီတဉ္စ ဝါဒိတံ၊

‘‘ဥပဟာရံ ကရောမာ’’တိ၊ ဝုတ္တေ ဝါ သမ္ပဋိစ္ဆိတုံ.

၃၆၂. ရာဇာဂါရံ ပေါက္ခရဏိံ၊ ဥယျာနံ စိတ္တဂါရကံ၊

ကီဠတ္ထံ ဂစ္ဆတော ဒဋ္ဌုံ၊ အာရာမံ ဒုက္ကဋံ ကတံ.

၃၆၃. နဝေ န ပဋိဗာဟေယျာ-သနေနုဏှေ န စီဝရံ၊

နိဒဟေယျ ခမာပေယျ၊ ဂရုနာ စ ပဏာမိတော.

၃၆၄. အက္ကောသနေ ပရမ္မုခါ၊ အာပတ္တီဟိ စ သတ္တဟိ၊

ဘိက္ခုံ ဥပါသကံ ဝါပိ၊ အညေနေဝ စ ဒုက္ကဋံ.

၃၆၅. န လဗ္ဘံ ဝိနိပါတေတုံ၊ သဒ္ဓါဒေယျဉ္စ စီဝရံ၊

လဗ္ဘံ ပိတူနံ သေသာနံ၊ ဉာတီနမ္ပိ န လဗ္ဘတိ.

၃၆၆. ဝဿံဝုတ္ထောညတောညတြ၊ ဘာဂံ ဂဏှေယျ ဒုက္ကဋံ၊

ပဋိဒေယျ နဋ္ဌေ ဇိဏ္ဏေ၊ ဂီဝါ နော ဒေယျ စောဒိတော၊

ဓုရနိက္ခေပတော တေသံ၊ ဟောတိ ဘဏ္ဍဂ္ဃကာရိယော.

၃၆၇. န သန္တရုတ္တရော ဂါမံ၊ ကလ္လော ဝါ သဥပါဟနော၊

ပဝိသေယျ န ဓာရေယျ၊ စာမရီမကသဗီဇနိံ.

၃၆၈. အဂိလာနော န ဆိန္ဒေယျ၊ ကေသေ ကတ္တရိယာ ဗဟိ၊

အာရာမတော န ဓာရေယျ၊ ဆတ္တံ လဗ္ဘတိ ဂုတ္တိယာ.

၃၆၉. ဂါဟေယျ နုဘတောကာဇံ၊ ဧကန္တရိကကာဇကံ၊

သီသက္ခန္ဓကဋိဘာရာ၊ ဟတ္ထောလမ္ဗော စ လဗ္ဘတိ.

၃၇၀. အာပတ္တိယာ အနောကာသ-ကတံ စောဒေယျ ဒုက္ကဋံ၊

သုဒ္ဓဿ စ အဝတ္ထုသ္မိံ၊ တထာ ဩကာသကာရဏေ.

၃၇၁. အဋ္ဌင်္ဂုလာဓိကံ မဉ္စပဋိပါဒံ န ဓာရယေ၊

ပကတင်္ဂုလေန သတ္တာနံ၊ မဉ္စံ ဝါ ဥစ္စပါဒကံ.

၃၇၂. မူဂဗ္ဗတာဒိံ ဂဏှေယျ၊ ဒုက္ကဋံ တိတ္ထိယဗ္ဗတံ၊

ခုရဘဏ္ဍံ ပရိဟရေ၊ တထာ နှာပိတပုဗ္ဗကော.

၃၇၃. ယံ ကိဉ္စိ ယာစိတုံ ဟတ္ထကမ္မံ တဒနုသာရတော၊

လဒ္ဓံ ဂဟေတုံ နိက္ကမ္မမယာစိတွာပိ ကပ္ပတိ၊

ကာရေတုမာဟရာပေတုံ၊ ယံ ကိဉ္စိပရသန္တကံ.

၃၇၄. ဂိဟီနံ ဂေါပကေ ဒေန္တေ၊ ဂဟေတုံ ဒေတိ ယတ္တကံ၊

လဗ္ဘံ ယထာပရိစ္ဆေဒံ၊ သံဃစေတိယသန္တကေ.

၃၇၅. ဒွီဟာပဇ္ဇေယျ အာပတ္တိံ၊ ကာယဝါစာဟိ ဝါ ဆဟိ၊

အလဇ္ဇိညာဏကုက္ကုစ္စပကတတ္တာ သတိပ္လဝါ၊

အကပ္ပိယေ ဝါ ကပ္ပိယေ၊ ကပ္ပါကပ္ပိယသညိတာ.

၃၇၆. အလဇ္ဇိညာဏတာပတ္တိံ၊ ကာယဝါစာဟိ ဆာဒယေ၊

လိင်္ဂေ သံဃေ ဂဏေကသ္မိံ၊ စတုဓာပတ္တိဝုဋ္ဌိတိ.

၃၇၇. ပရိကထောဘာသဝိညတ္တိ၊ န လဗ္ဘာ ပစ္စယဒွယေ၊

ဝိညတ္တိယေဝ တတိယေ၊ သေသေ သဗ္ဗမ္ပိ လဗ္ဘတိ.

၃၇၈. န ရူဟတစ္စယေ ဒါနံ၊ ပဉ္စန္နံ သဟဓမ္မိနံ၊

သံဃဿေဝ စ တံ ဟောတိ၊ ဂိဟီနံ ပန ရူဟတိ.

၃၇၉. ဘိက္ခု ဝါ သာမဏေရော ဝါ၊ ကာလံ ကယိရာထူပဿယေ၊

ဘိက္ခုသံဃောဝ ဒါယဇ္ဇော၊ တတ္ထ သေသေပျယံနယော.

၃၈၀. ပုရိမဿေဝိမံ ဒိန္နံ၊ ဒေဟိ နေတွာသုကဿတိ၊

ပစ္ဆိမဿေဝ ဒမ္မီတိ၊ ဒိန္နံ ဉတွာ ဣမံ ဝိဓိံ၊

ဂဏှေ ဝိဿာသဂါဟံ ဝါဓိဋ္ဌေ မတကစီဝရံ.

၃၈၁. လောဟဘဏ္ဍေ ပဟရဏိံ၊ ဒါရုဘဏ္ဍေ စ ဒါရုဇံ၊

ပတ္တံ ပါဒုကပလ္လင်္ကံ၊ အာသန္ဒိံ မတ္တိကာမယေ၊

ဌပေတွာ ကပ္ပတိ သဗ္ဗံ၊ ကတကံ ကုမ္ဘကာရိကန္တိ.