၃၆. ဘေသဇ္ဇနိဒ္ဒေသော

ဘေသဇ္ဇန္တိ –

၂၇၄. ဇနဿ ကာတုံ ဘေသဇ္ဇံ၊ ဒါတုံ ဝတ္တုံ န လဗ္ဘတိ၊

ဘိက္ခာစရိယဝိညတ္တိ၊ သကေဟိ သဟဓမ္မိနံ.

၂၇၅. ပိတူနံ တဒုပဋ္ဌာကဘိက္ခုနိဿိတဘဏ္ဍုနံ၊

လဗ္ဘံ ဘေသဇ္ဇကရဏံ၊ ဝေယျာဝစ္စကရဿ စ.

၂၇၆. မဟာစူဠပိတာမာတာဘာတာဘဂိနိအာဒိနံ၊

တေသံ သကေနတ္တနိယေ၊ ဒါတဗ္ဗံ တာဝကာလိကံ.

၂၇၇. ကုလဒူသနဝိညတ္တိ၊ ဘေသဇ္ဇကရဏာဒိ ဟိ၊

မာတာပိတူဟိ သမ္ဗန္ဓဉာတကေသု န ရူဟတိ.

၂၇၈. ပိဏ္ဍပါတော အနာမဋ္ဌော၊ မာတာဒီနမဝါရိတော၊

ဆန္နံ ဒါမရိကစောရဿ၊ ဒါတုမိဿရိယဿ စ.

၂၇၉. တေသံ သုတ္တောဒကေဟေဝ၊ ပရိတ္တံ ကယိရာ နတ္တနော၊

ဘဏိတဗ္ဗံ ဘဏာပေန္တေ၊ ပရိတ္တံ သာသနောဂဓံ.

၂၈၀. သီလံ ဓမ္မံ ပရိတ္တံ ဝါ၊ အာဂန္တွာ ဒေတု ဘာသတု၊

ဒါတုံ ဝတ္တုဉ္စ လဗ္ဘတိ၊ ဂန္တွာ ကေနစိ ပေသိတောတိ.