၃၂. နိဿယနိဒ္ဒေသော

နိဿယောတိ –

၂၃၀. ဗျတ္တဿ ပဉ္စဝဿဿ၊ နတ္ထိ နိဿယ ကာရိယံ၊

ယာဝဇီဝမ္ပိ အဗျတ္တော၊ နိဿိတောယေဝ ဇီဝတိ.

၂၃၁. ဧကံသံ စီဝရံ ကတွာ၊ ပဂ္ဂဏှိတွာန အဉ္ဇလိံ၊

ဥက္ကုဋိကံ နိသီဒိတွာ၊ ဝဒေ ယာဝတတီယကံ၊

‘‘အာစရိယော မေ၊ ဘန္တေ၊ ဟောဟိ၊

အာယသ္မတော နိဿာယ ဝစ္ဆာမီ’’တိ.

၂၃၂. ပက္ကန္တေ ပက္ခသင်္ကန္တေ၊ ဝိဗ္ဘန္တေ ဝါပိ နိဿယော၊

မရဏာဏတ္တုပဇ္ဈာယ-သမောဓာနေဟိ သမ္မတိ.

၂၃၃. နိဿာယ န ဝသေလဇ္ဇိံ၊ အပုဗ္ဗံ ဌာနမာဂတော၊

အာဂမေ စတုပဉ္စာဟံ၊ ဉာတုံ ဘိက္ခုသဘာဂတံ.

၂၃၄. အဒ္ဓိကဿ ဂိလာနဿ၊ ဂိလာနုပဋ္ဌကဿ စ၊

ယာစိတဿ အရညေ ဝါ၊ သလ္လက္ခန္တေန ဖာသုကံ၊

သဘာဂေ ဒါယကေသန္တေ၊ ဝသိတုံ တာဝ လဗ္ဘတီတိ.