၃၀. ဝတ္တနိဒ္ဒေသော
ဝတ္တန္တိ –
၂၁၃. အာဂန္တုကော န အာရာမံ၊ ပဝိသေ သဥပါဟနော၊
သဆတ္တောဂုဏ္ဌိတော သီသေ၊ ကရိတွာ ဝါပိ စီဝရံ.
၂၁၄. ပါနီယေန န ဓောဝေယျ၊ ပါဒေ ဝုဍ္ဎတရေပိ စ၊
အာဝါသိကေဘိဝါဒေယျ၊ ပုစ္ဆေယျ သယနာသနံ.
၂၁၅. ဂမိကော ပဋိသာမေတွာ၊ ဒါရုမတ္တိကဘဏ္ဍကံ၊
ဝိဟာရဉ္စ ထကေတွာန၊ အာပုစ္ဆ သယနာသနံ.
၂၁၆. အာပုစ္ဆိတဗ္ဗေ အသတိ၊ သံဂေါပေတွာန သာဓုကံ၊
ပက္ကမေယျညထာ တဿ၊ ပက္ကန္တုံ န စ ကပ္ပတိ.
၂၁၇. အာဝါသိကော ပညာပေယျ၊ ဝုဍ္ဎာဂန္တုဿ အာသနံ၊
ဥပနိက္ခိပေ ပါဒေါဒ-ပ္ပဘုတိံ ပတ္တစီဝရံ.
၂၁၈. ပစ္စုဂ္ဂန္တွာန ဂဏှေယျ၊ ပါနီယေန စ ပုစ္ဆယေ၊
အာဂန္တုကေဘိဝါဒေယျ၊ ပညပေ သယနာသနံ.
၂၁၉. အဇ္ဈာဝုတ္ထမဝုတ္ထံ ဝါ၊ ဂေါစရာဂေါစရံ ဝဒေ၊
ဝစ္စပဿာဝဌာနာနိ၊ ကတိကံ သေက္ခသမ္မုတိံ.
၂၂၀. ပဝေသနိက္ခမေ ကာလံ၊ ပရိဘောဇိယပါနိယံ၊
နိသိန္နောဝ နဝကဿ၊ ဧတံ သဗ္ဗံ သမုဒ္ဒိသေတိ.