၁၇. အာပုစ္ဆကရဏနိဒ္ဒေသော

အာပုစ္ဆကရဏန္တိ –

၁၆၁. အနဇ္ဈိဋ္ဌောဝ ထေရေန၊ ပါတိမောက္ခံ န ဥဒ္ဒိသေ၊

ဓမ္မံ န ကထယေ ပဉှံ၊ န ပုစ္ဆေ န စ ဝိဿဇေ.

၁၆၂. အာပုစ္ဆိတွာ ကထေန္တဿ၊ ပုန ဝုဍ္ဎတရာဂမေ၊

ပုန အာပုစ္ဆနံ နတ္ထိ၊ ဘတ္တဂ္ဂေ စာနုမောဒတော.

၁၆၃. ဝသန္တော စ အနာပုစ္ဆာ၊ ဝုဍ္ဎေနေကဝိဟာရကေ၊

န သဇ္ဈာယေယျ ဥဒ္ဒေသံ၊ ပရိပုစ္ဆဉ္စ နော ဒဒေ.

၁၆၄. ဓမ္မံ န ဘာသယေ ဒီပံ၊ န ကရေ န စ ဝိဇ္ဈပေ၊

ဝါတပါနံ ကဝါဋံ ဝါ၊ ဝိဝရေယျ ထကေယျ စ.

၁၆၅. စင်္ကမေ စင်္ကမန္တောပိ၊ ဝုဍ္ဎေန ပရိဝတ္တယေ၊

ယေန ဝုဍ္ဎော သ သင်္ဃာဋိ-ကဏ္ဏေနေနံ န ဃဋ္ဋယေတိ.