၁၄. ဘူမိနိဒ္ဒေသော

ဘူမိယောတိ –

၁၃၆. သမ္မုတုဿာဝနန္တာ စ၊ ဂေါနိသာဒီ ဂဟာပတိ၊

ကပ္ပိယာ ဘူမိယော ယာသု၊ ဝုတ္ထံ ပက္ကဉ္စ ကပ္ပတိ.

၁၃၇. ဝါသတ္ထာယ ကတေ ဂေဟေ၊ သံဃိကေ ဝေကသန္တကေ၊

ကပ္ပိယာ ကုဋိ လဒ္ဓဗ္ဗာ၊ သဟသေယျပ္ပဟောနကေ.

၁၃၈. ဂေဟေ သံဃဿ ဝေကဿ၊ ကရမာနေဝမီရယံ၊

ပဌမိဋ္ဌကထမ္ဘာဒိံ၊ ဌပေယျုဿာဝနန္တိကာ၊

‘‘ကပ္ပိယကုဋိံ ကရောမ၊ ကပ္ပိယကုဋိံ ကရောမာ’’တိ.

၁၃၉. ယေဘုယျေနာပရိက္ခိတ္တော၊ အာရာမော သကလောပိ ဝါ၊

ဝုစ္စတေ ‘‘ဂေါနိသာဒီ’’တိ၊ သမ္မုတီ သံဃသမ္မတာ.

၁၄၀. ဘိက္ခုံ ဌပေတွာ အညေဟိ၊ ဒိန္နော တေသံဝ သန္တကော၊

အတ္ထာယ ကပ္ပကုဋိယာ၊ ဂေဟော ဂဟပတီ မတော.

၁၄၁. အကပ္ပကုဋိယာ ဝုတ္ထသပ္ပိအာဒီဟိ မိဿိတံ၊

ဝဇေယျ အန္တောဝုတ္ထတ္တံ၊ ပုရိမံ ကာလိကဒွယံ.

၁၄၂. တေဟေဝ ဘိက္ခုနာ ပက္ကံ၊ ကပ္ပတေ ယာဝဇီဝိကံ၊

နိရာမိသံဝ သတ္တာဟံ၊ သာမိသေ သာမပါကတာ.

၁၄၃. ဥဿာဝနန္တိကာ ယေဟိ၊ ထမ္ဘာဒီဟိ အဓိဋ္ဌိတာ၊

တေသုယေဝါပနီတေသု၊ တဒညေသုပိ တိဋ္ဌတိ.

၁၄၄. သဗ္ဗေသု အပနီတေသု၊ ဘဝေ ဇဟိတဝတ္ထုကာ၊

ဂေါနိသာဒီ ပရိက္ခိတ္တေ၊ သေသာ ဆဒနဝိဗ္ဘမာတိ.