၄. အတ္တကာမသိက္ခာပဒဝဏ္ဏနာ

ဒုဋ္ဌုလ္လောဘာသနေ ဝုတ္တပ္ပကာရာယာတိ ဒုဋ္ဌုလ္လာဒုဋ္ဌုလ္လဇာနနသမတ္ထာယ. ပရဿ ဘိက္ခုနော အတ္တကာမပါရိစရိယာယ ဝဏ္ဏဘဏနေ ဒုက္ကဋံ၊ ‘‘ယော တေ ဝိဟာရေ ဝသတိ၊ တဿ အဂ္ဂဒါနံ မေထုနံ ဓမ္မံ ဒေဟီ’’တိ ပရိယာယဝစနေပိ ဒုက္ကဋံ၊ ‘‘အတ္တကာမပါရိစရိယာယ ဝဏ္ဏံ ဘာသေယျ၊ ယာ မာဒိသံ သီလဝန္တ’’န္တိ စ ဝုတ္တတ္တာတိ ဧကေ. ပဉ္စသု အင်္ဂေသု သဗ္ဘာဝါ သံဃာဒိသေသောဝါတိ ဧကေ၊ ဝိစာရေတွာ ဂဟေတဗ္ဗံ. ‘‘ဣမသ္မိံ သိက္ခာပဒဒွယေ ကာယသံသဂ္ဂေ ဝိယ ယက္ခိပေတီသုပိ ဒုဋ္ဌုလ္လတ္တကအာမဝစနေ ထုလ္လစ္စယန္တိ ဝဒန္တိ. အဋ္ဌကထာသု ပန နာဂတ’’န္တိ (ဝဇိရ. ဋီ. ပါရာဇိက ၂၉၅) လိခိတံ. ဥဘတောဗျဉ္ဇနကော ပန ပဏ္ဍကဂတိကောဝ.

အတ္တကာမသိက္ခာပဒဝဏ္ဏနာ နိဋ္ဌိတာ.