၃. တတိယပါဋိဒေသနီယသိက္ခာပဒဝဏ္ဏနာ

လဒ္ဓသေက္ခသမ္မုတိကာနီတိ ဉတ္တိဒုတိယေန ကမ္မေန လဒ္ဓသေက္ခသမ္မုတိကာနိ. ယဉှိ ကုလံ သဒ္ဓါယ ဝဍ္ဎတိ၊ ဘောဂေန ဟာယတိ၊ ဧဝရူပဿ ကုလဿ ဉတ္တိဒုတိယေန ကမ္မေန သေက္ခသမ္မုတိံ ဒေန္တိ၊ တံ သန္ဓာယေတံ ဝုတ္တံ.

ဃရတော နီဟရိတွာတိ ဃရတော အာသနသာလံ ဝါ ဝိဟာရံ ဝါ အာနေတွာ. တေနာဟ ‘‘အာသနသာလာဒီသု ဝါ’’တိ. ဣမဿ ‘‘ဒေန္တီ’’တိ ဣမိနာ သမ္ဗန္ဓော. ဒွါရမူလေ ဝါ ဌပိတံ ဒေန္တီတိ ဒွါရမူလေ ဌပိတံ ပစ္ဆာ သမ္ပတ္တဿ ဒေန္တိ. ဘိက္ခုံ ပန ဒိသွာ အန္တောဂေဟတော နီဟရိတွာ ဒိယျမာနံ န ဝဋ္ဋတိ. နိစ္စဘတ္တကေတိ နိစ္စံ ဒါတဗ္ဗဘတ္တကေ. သလာကဘတ္တေတိ ရုက္ခသာရမယာယ သလာကာယ ဝါ ဝေဠုဝိလီဝတာလပဏ္ဏာဒိမယာယ ပဋ္ဋိကာယ ဝါ ‘‘အသုကဿ နာမ သလာကဘတ္တ’’န္တိ ဧဝံ အက္ခရာနိ ဥပနိဗန္ဓိတွာ ဂါဟာပေတွာ ဒါတဗ္ဗဘတ္တေ. ပက္ခိကေတိ ဧကသ္မိံ ပက္ခေ ဧကဒိဝသေ ဒါတဗ္ဗဘတ္တေ. ဥပေါသထိကေတိ ဥပေါသထေ ဒါတဗ္ဗဘတ္တေ. ပါဋိပဒိကေတိ ပါဋိပဒဒိဝသေ ဒါတဗ္ဗဘတ္တေ.

တတိယပါဋိဒေသနီယသိက္ခာပဒဝဏ္ဏနာ နိဋ္ဌိတာ.