၁၁. ဘေဒါနုဝတ္တကသိက္ခာပဒဝဏ္ဏနာ

တဿေဝါတိ ဘေဒါယ ပရက္ကမန္တဿေဝ. ခေါတိ နိပါတမတ္တံ. ပနာတိ ဝိသေသေ နိပါတော. ယံ ဝစနံ သမဂ္ဂေပိ ဝဂ္ဂေ အဝယဝဘူတေ ကရောတိ ဘိန္ဒတိ၊ တံ ကလဟကာရကဝစနံ ဣဓ ‘‘ဝဂ္ဂ’’န္တိ ဝုစ္စတီတိ အာဟ ‘‘ဝဂ္ဂံ အသာမဂ္ဂိပက္ခိယဝစနံ ဝဒန္တီ’’တိ. အသာမဂ္ဂိပက္ခေ ဘဝါ အသာမဂ္ဂိပက္ခိယာ၊ ကလဟကာရကာ၊ တေသံ ဝစနံ အသာမဂ္ဂိပက္ခိယဝစနံ၊ အသာမဂ္ဂိပက္ခေ ဝါ ဘဝံ ဝစနံ အသာမဂ္ဂိပက္ခိယဝစနံ. ‘‘န ဟိ သံဃော သံဃဿ ကမ္မံ ကရောတီ’’တိ ဣဒံ နိဂ္ဂဟဝသေန ကတ္တဗ္ဗံ ကမ္မံ သန္ဓာယ ဝုတ္တံ၊ ဥဗ္ဗာဟိကာဒိကမ္မံ ပန ဗဟူနမ္ပိ ကာတုံ ဝဋ္ဋတိယေဝ. ဓမ္မဝါဒီတိ ဘူတဝါဒီ. ဝိနယဝါဒီတိ ဝူပသမဝါဒီ. ဇာနာတိ နောတိ ဧတ္ထာပိ ‘‘ဆန္ဒဉ္စ ရုစိဉ္စာ’’တိ ဣဒံ အာနေတွာ သမ္ဗန္ဓိတဗ္ဗံ. တေနာဟ ‘‘အမှာကံ ဆန္ဒာဒီနိ ဇာနာတီ’’တိ. ဘာသတီတိ ဧတ္ထ ‘‘နော’’တိ ဣဒံ ဝိဘတ္တိဝိပရိဏာမေန ယုဇ္ဇတိ. တေနာဟ ‘‘ဧဝံ ကရောမာတိ အမှေဟိ သဒ္ဓိံ ဘာသတီ’’တိ. ‘‘ဧတ’’န္တိ ဣမိနာ တဿ ကမ္မံ ပစ္စာမဋ္ဌန္တိ အာဟ ‘‘ယံ သော ကရောတီ’’တိအာဒိ. သောတိ သံဃဘေဒါယ ပရက္ကမန္တော. သမေတာယသ္မန္တာနန္တိ ဧတ္ထ ‘‘စိတ္တ’’န္တိ အဇ္ဈာဟရိတဗ္ဗန္တိ အာဟ ‘‘အာယသ္မန္တာနံ စိတ္တ’’န္တိ. ဝုတ္တသဒိသာယေဝါတိ ဧတ္ထ ယံ ဝတ္တဗ္ဗံ၊ တံ ဟေဋ္ဌာ အညဘာဂိယသိက္ခာပဒဋ္ဌကထာယ ဝဏ္ဏနာယံ (ကင်္ခါ. အဋ္ဌ. အညဘာဂိယသိက္ခာပဒဝဏ္ဏနာ) ဝုတ္တမေဝ.

ဘေဒါနုဝတ္တကသိက္ခာပဒဝဏ္ဏနာ နိဋ္ဌိတာ.