၄. စတုတ္ထပါရာဇိကဝဏ္ဏနာ

အနဘိဇာနန္တိ န အဘိဇာနံ. ယေန ဟိ ယော ဓမ္မော အဓိဂတော၊ သော တဿ ပါကဋော ဟောတီတိ အာဟ ‘‘သကသန္တာနေ’’တိအာဒိ. ဥတ္တရိမနုဿာနန္တိ ပကတိမနုဿေဟိ ဥတ္တရိတရာနံ မနုဿာနံ၊ ဥက္ကဋ္ဌမနုဿာနန္တိ အတ္ထော. ဓမ္မန္တိ မဟဂ္ဂတလောကုတ္တရဘူတံ အဓိဂတဓမ္မံ. အထ ဝါ ဥတ္တရိမနုဿဓမ္မာတိ ဥတ္တရိမနုဿဓမ္မော. မနုဿဓမ္မော နာမ ဝိနာ ဘာဝနာမနသိကာရေန ပကတိယာ မနုဿေဟိ နိဗ္ဗတ္တေတဗ္ဗော ဒသကုသလကမ္မပထဓမ္မော. သော ဟိ မနုဿာနံ စိတ္တာဓိဋ္ဌာနမတ္တေန ဣဇ္ဈနတော တေသံ သော ဘာဝိတဓမ္မော ဝိယ ဌိတောတိ တထာ ဝုတ္တော၊ မနုဿဂ္ဂဟဏဉ္စေတ္ထ တေသု ဗဟုလံ ပဝတ္တနတော. ဈာနာဒိကံ ပန တဗ္ဗိဓုရန္တိ တတုတ္တရိ၊ ဣတိ ဥတ္တရိ မနုဿဓမ္မာတိ ဥတ္တရိမနုဿဓမ္မော၊ တံ ဥတ္တရိမနုဿဓမ္မန္တိ ဧဝမ္ပေတ္ထ အတ္ထော ဒဋ္ဌဗ္ဗော. သမုဒါစရန္တောတိ အာရောစေန္တော.

ကိဉ္စာပိ လောကိယလောကုတ္တရာ သဗ္ဗာဝ ပညာ ‘‘ဉာဏ’’န္တိ ဝုစ္စတိ၊ ဣဓ ပန မဟဂ္ဂတလောကုတ္တရာဝ ဝေဒိတဗ္ဗာတိ အာဟ ‘‘မဟဂ္ဂတလောကုတ္တရပညာ ဇာနနဋ္ဌေန ဉာဏ’’န္တိ. ကိလေသေဟိ အာရကတ္တာ ပရိသုဒ္ဓဋ္ဌေန အရိယန္တိ အာဟ ‘‘အရိယံ ဝိသုဒ္ဓံ ဥတ္တမ’’န္တိ. အရိယသဒ္ဒေါ စေတ္ထ ဝိသုဒ္ဓပရိယာယော၊ န လောကုတ္တရပရိယာယော. ဈာနာဒိဘေဒေတိ အာဒိသဒ္ဒေန ‘‘ဝိမောက္ခော၊ သမာဓိ၊ သမာပတ္တိ၊ ဉာဏဒဿနံ၊ မဂ္ဂဘာဝနာ၊ ဖလသစ္ဆိကိရိယာ၊ ကိလေသပ္ပဟာနံ၊ ဝိနီဝရဏတာ စိတ္တဿ၊ သုညာဂါရေ အဘိရတီ’’တိ (ပါရာ. ၁၉၈) ဣမေ သင်္ဂဏှာတိ. ဝိညုဿ မနုဿဇာတိကဿာတိ အာရောစေတဗ္ဗပုဂ္ဂလနိဒဿနံ. ဧတဿ ဟိ အာရောစိတေ အာရောစိတံ ဟောတိ၊ န ဒေဝဗြဟ္မာနံ၊ နာပိ ပေတယက္ခတိရစ္ဆာနဂတာနန္တိ. အာရောစေယျာတိ ဝဒေယျ၊ ဝိညာပေယျာတိ ဝုတ္တံ ဟောတိ. ဝိနာ အညာပဒေသေနာတိ ‘‘ယော တေ ဝိဟာရေ ဝသတိ၊ သော ဘိက္ခု ပဌမဿ ဈာနဿ လာဘီ’’တိအာဒိနာ (ပါရာ. ၂၂၀) နယေန အညာပဒေသံ ဝိနာတိ အတ္ထော. ဣဓေဝါတိ ‘‘ဣတိ ဇာနာမိ၊ ဣတိ ပဿာမီ’’တိ ဣမသ္မိံယေဝ ပဒေ. ‘‘တေန ဝုတ္တ’’န္တိအာဒိ နိဂမနံ.

သမနုဂ္ဂါဟီယမာနောတိ စောဒိယမာနော၊ ယံ ဝတ္ထု အာရောစိတံ ဟောတိ၊ တသ္မိံ ဝတ္ထုသ္မိံ ‘‘ကိံ တေ အဓိဂတံ၊ ကိန္တိ တေ အဓိဂတံ၊ ကဒါ တေ အဓိဂတံ၊ ကတ္ထ တေ အဓိဂတံ၊ ကတမေ တေ ကိလေသာ ပဟီနာ၊ ကတမေသံ တွံ ဓမ္မာနံ လာဘီ’တိ ကေနစိ ဝုစ္စမာနော’’တိ ဝုတ္တံ ဟောတိ. အသမနုဂ္ဂါဟီယမာနောတိ န ကေနစိ ဝုစ္စမာနော.

‘‘ဘိက္ခုဘာဝေ ဌတွာ အဘဗ္ဗော ဈာနာဒီနိ အဓိဂန္တု’’န္တိ သိက္ခာပဒါတိက္ကမဿ အန္တရာယကရတ္တာ ဝုတ္တံ. ဘိက္ခုဘာဝေါ ဟိဿ သဂ္ဂန္တရာယော စေဝ ဟောတိ မဂ္ဂန္တရာယော စ (ပါရာ. အဋ္ဌ. ၂.၁၉၈). ဝုတ္တဉှေတံ ‘‘သာမညံ ဒုပ္ပရာမဋ္ဌံ၊ နိရယာယုပကဍ္ဎတီ’’တိ (သံ. နိ. ၁.၈၉၊ ဓ. ပ. ၃၁၁). အပရမ္ပိ ဝုတ္တံ ‘‘သိထိလော ဟိ ပရိဗ္ဗာဇော၊ ဘိယျော အာကိရတေ ရဇ’’န္တိ (သံ. နိ. ၁.၈၉၊ ဓ. ပ. ၃၁၃). ဘိက္ခုဘာဝေါတိ ပါရာဇိကံ အာပဇ္ဇိတွာ ‘‘သမဏော အဟ’’န္တိ ပဋိဇာနနတော ဝေါဟာရမတ္တသိဒ္ဓေါ ဘိက္ခုဘာဝေါ. ဒါနာဒီဟီတိ ဒါနသရဏသီလသံဝရာဒီဟိ.

အဇာနမေဝါတိ ဧတ္ထ ဧဝါတိ အဝဓာရဏတ္ထေ နိပါတော. ‘‘အဇာနမေဝ’’န္တိပိ ပဌန္တိ. တတ္ထ ပန ‘‘ဧဝံ ဇာနာမိ၊ ဧဝံ ပဿာမီ’’တိ အဝစန္တိ ယောဇေတဗ္ဗံ. ဝစနတ္ထဝိရဟတောတိ ‘‘ပဌမံ ဈာနံ သမာပဇ္ဇိ’’န္တိ အာဒိဝစနဿ (ပါရာ. ၂၀၉) အတ္ထဘူတေန ဈာနာဒိနာ ဝဇ္ဇိတတ္တာ တုစ္ဆံ ဥဒကာဒိသုညံ ဘာဇနံ ဝိယ. မုသာတိ ဝိသံဝါဒနပုရေက္ခာရဿ ပရဝိသံဝါဒကော ဝစီပယောဂေါ၊ ကာယပယောဂေါ ဝါ. တေနာဟ ‘‘ဝဉ္စနာဓိပ္ပါယတော မုသာ’’တိ. မုသာ စ ဝဉ္စနာဓိပ္ပါယော စ ပုဗ္ဗဘာဂက္ခဏေ၊ တင်္ခဏေ စ. ဝုတ္တဉှိ ‘‘ပုဗ္ဗေ ဝါဿ ဟောတိ ‘မုသာ ဘဏိဿ’န္တိ၊ ဘဏန္တဿ ဟောတိ ‘မုသာ ဘဏာမီ’’’တိ (ပါရာ. ၂၀၀). ဧတဉှိ ဒွယံ အင်္ဂဘူတံ၊ ဣတရံ ပန ဟောတု ဝါ၊ မာ ဝါ၊ အကာရဏမေတံ. အဘဏိန္တိ ဝိညာပနံ အကာသိံ.

အညတြ အဓိမာနာတိ အဓိဂတော မာနော၊ အဓိကော ဝါ မာနော အဓိမာနော၊ ထဒ္ဓမာနောတိ အတ္ထော၊ တံ ဝိနာတိ အတ္ထော. ကဿ ပနာယံ အဓိမာနော ဥပ္ပဇ္ဇတိ၊ ကဿ နုပ္ပဇ္ဇတိ? အရိယသာဝကဿ တာဝ နုပ္ပဇ္ဇတိ (ပါရာ. အဋ္ဌ. ၂.၁၉၆). သော ဟိ မဂ္ဂဖလနိဗ္ဗာနပဟီနကိလေသာဝသိဋ္ဌကိလေသပစ္စဝေက္ခဏေန သဉ္ဇာတသောမနဿော အရိယဂုဏပ္ပဋိဝေဓေ နိက္ကင်္ခေါ၊ တသ္မာ သောတာပန္နာဒီနံ ‘‘အဟံ သကဒါဂါမီ’’တိအာဒိဝသေန မာနော နုပ္ပဇ္ဇတိ. ဒုဿီလဿ နုပ္ပဇ္ဇတိ. သော ဟိ အရိယဂုဏာဓိဂမေ နိရာသောဝ. သီလဝတောပိ ပရိစ္စတ္တကမ္မဋ္ဌာနဿ နိဒ္ဒါရာမတာဒိမနုယုတ္တဿ နုပ္ပဇ္ဇတိ၊ သုပရိသုဒ္ဓသီလဿ ပန ကမ္မဋ္ဌာနေ အပ္ပမတ္တဿ နာမရူပံ ဝဝတ္ထပေတွာ ပစ္စယပရိဂ္ဂဟေန ဝိတိဏ္ဏကင်္ခဿ တိလက္ခဏံ အာရောပေတွာ သင်္ခါရေ သမ္မသန္တဿ အာရဒ္ဓဝိပဿကဿ ဥပ္ပဇ္ဇတိ. တေနာဟ ‘‘ယွာယ’’န္တိအာဒိ. တတ္ထ တိလက္ခဏံ အာရောပေတွာတိ (သာရတ္ထ. ဋီ. ၂.၁၉၆) ကလာပသမ္မသနဝသေန အနိစ္စာဒိလက္ခဏတ္တယံ အာရောပေတွာ. သမ္မသန္တဿာတိ ဝိပဿန္တဿ. အာရဒ္ဓဝိပဿကဿာတိ ဥဒယဗ္ဗယာနုပဿနာယ အာရဒ္ဓဝိပဿကဿ. အပတ္တေတိ အတ္တနော သန္တာနေ ဥပ္ပတ္တိဝသေန အပတ္တေ၊ အနဓိဂတေတိ ဝုတ္တံ ဟောတိ. ပတ္တသညိတာသင်္ခါတောတိ ‘‘ပတ္တော မယာ ဥတ္တရိမနုဿဓမ္မော’’တိ ဧဝံသညိတာသင်္ခါတော အဓိမာနော ဥပ္ပဇ္ဇတိ. ဥပ္ပန္နော စ သုဒ္ဓသမထလာဘိံ ဝါ သုဒ္ဓဝိပဿနာလာဘိံ ဝါ အန္တရာ ဌပေတိ. သော ဟိ ဒသပိ ဝီသမ္ပိ တိံသမ္ပိ ဝဿာနိ ကိလေသသမုဒါစာရံ အပဿန္တော ‘‘အဟံ သောတာပန္နော’’တိ ဝါ ‘‘သကဒါဂါမီ’’တိ ဝါ ‘‘အနာဂါမီ’’တိ ဝါ မညတိ. သမထဝိပဿနာလာဘိံ ပန အရဟတ္တေယေဝ ဌပေတိ. တဿ ဟိ သမာဓိဗလေန ကိလေသာ ဝိက္ခမ္ဘိတာ၊ ဝိပဿနာဗလေန သင်္ခါရာ သုပရိဂ္ဂဟိတာ၊ တသ္မာ သဋ္ဌိမ္ပိ ဝဿာနိ၊ အသီတိမ္ပိ ဝဿာနိ၊ ဝဿသတမ္ပိ ကိလေသာ န သမုဒါစရန္တိ၊ ခီဏာသဝဿေဝ စိတ္တာစာရော ဟောတိ. သော ဧဝံ ဒီဃရတ္တံ ကိလေသသမုဒါစာရံ အပဿန္တော အန္တရာ အဋ္ဌတွာဝ ‘‘အရဟာ အဟ’’န္တိ မညတီတိ. ‘‘တံ အဓိမာနံ ဌပေတွာ’’တိ ဣမိနာ ‘‘အညတြာ’’တိ ပဒံ အပေက္ခိတွာ ‘‘အဓိမာနာ’’တိ ဥပယောဂတ္ထေ နိဿက္ကဝစနန္တိ ဒဿေတိ.

ပါပိစ္ဆတာယာတိ ပါပါ ဣစ္ဆာ ဧတဿာတိ ပါပိစ္ဆော၊ တဿ ဘာဝေါ ပါပိစ္ဆတာ၊ တာယ၊ ပါပိကာယ ဣစ္ဆာယာတိ အတ္ထော. ယာ သာ ‘‘ဣဓေကစ္စော ဒုဿီလောဝ သမာနော ‘သီလဝါ’တိ မံ ဇနော ဇာနာတူ’’တိအာဒိနာ (ဝိဘ. ၈၅၁) နယေန ဝုတ္တာ၊ တာယ အသန္တဂုဏသမ္ဘာဝနိစ္ဆာယာတိ ဝုတ္တံ ဟောတိ. ဣမိနာ ပန မန္ဒတ္တာ မောမူဟတ္တာ သမုဒါစရန္တဿ အနာပတ္တီတိ ဒဿေတိ. အယမ္ပီတိ ပိ-သဒ္ဒေန န ကေဝလံ ပုရိမာ တယောဝါတိ ဒဿေတိ.

အသန္တန္တိ အဘူတံ. ဈာနာဒိဓမ္မန္တိ ဈာနံ၊ ဝိမောက္ခော၊ သမာဓိ၊ သမာပတ္တိ၊ ဉာဏဒဿနံ၊ မဂ္ဂဘာဝနာ၊ ဖလသစ္ဆိကိရိယာ၊ ကိလေသပ္ပဟာနံ၊ ဝိနီဝရဏတာ စိတ္တဿ၊ သုညာဂါရေ အဘိရတီ’’တိ (ပါရာ. ၁၉၈) ဧဝံ ဝုတ္တံ ဥတ္တရိမနုဿဓမ္မံ. ယဿ အာရောစေတီတိ (ပါရာ. အဋ္ဌ. ၂.၂၁၅) ဝါစာယ ဝါ ဟတ္ထဝိကာရာဒီဟိ ဝါ အင်္ဂပစ္စင်္ဂစောပနေဟိ ဝိညတ္တိပထေ ဌိတဿ ယဿ ပုဂ္ဂလဿ အာရောစေတိ. ဝိညတ္တိပထံ ပန အတိက္ကမိတွာ ဌိတော ကောစိ စေ ဒိဗ္ဗေန စက္ခုနာ (သာရတ္ထ. ဋီ. ၂.၂၁၅)၊ ဒိဗ္ဗာယ စ သောတဓာတုယာ ဒိသွာ စ သုတွာ စ ဇာနာတိ၊ န ပါရာဇိကံ. ယောပိ ‘‘ကိံ အယံ ဘဏတီ’’တိ သံသယံ ဝါ အာပဇ္ဇတိ၊ စိရံ ဝီမံသိတွာ ဝါ ပစ္ဆာ ဇာနာတိ၊ ‘‘အဝိဇာနန္တော’’ဣစ္စေဝ သင်္ချံ ဂစ္ဆတိ. ယော ပန ဈာနာဒီနိ အတ္တနော အဓိဂမဝသေန ဝါ ဥဂ္ဂဟပရိပုစ္ဆာဒိဝသေန ဝါ န ဇာနာတိ၊ ကေဝလံ ‘‘ဈာန’’န္တိ ဝါ ‘‘ဝိမောက္ခော’’တိ ဝါ ဝစနမတ္တမေဝ သုတံ ဟောတိ၊ သောပိ တေန ဝုတ္တေ ‘‘ဈာနံ ကိရ သမာပဇ္ဇီ’’တိ ဧသ ဝဒတီတိ ယဒိ ဧတ္တကမတ္တမ္ပိ ဇာနာတိ၊ ‘‘ဇာနာတိ’’စ္စေဝ သင်္ချံ ဂစ္ဆတိ၊ တဿ ဝုတ္တေ ပါရာဇိကမေဝ. သေသော ပန ဧကဿ ဝါ ဒွိန္နံ ဝါ ဗဟူနံ ဝါ နိယမိတာနိယမိတဝသေန ဝိသေသော သဗ္ဗော သိက္ခာပစ္စက္ခာနကထာယံ ဝုတ္တနယေနေဝ ဝေဒိတဗ္ဗော. ပရိယာယဘာသနေ ပန ‘‘အဟ’’န္တိ အဝုတ္တတ္တာ ပဋိဝိဇာနန္တဿ ဝုတ္တေပိ ထုလ္လစ္စယံ. ဝိသံဝါဒနာဓိပ္ပါယေန မုသာဝါဒပယောဂဿ ကတတ္တာ အပ္ပဋိဝိဇာနန္တဿာပိ ဒုက္ကဋန္တိ အာဟ ‘‘ယော တေ ဝိဟာရေ ဝသတိ။ပေ။ ဒုက္ကဋ’’န္တိ. အနုလ္လပနာဓိပ္ပါယဿာတိ ဥလ္လပနာဓိပ္ပါယဝိရဟိတဿ၊ အဘူတာရောစနာဓိပ္ပါယဝိရဟိတဿာတိ အတ္ထော. ဥမ္မတ္တကာဒယော ပုဗ္ဗေ ဝုတ္တနယာ ဧဝ. ဣဓ ပန အာဒိကမ္မိကာ ဝဂ္ဂုမုဒါတီရိယဘိက္ခူ၊ တေသံ အနာပတ္တိ.

စတုတ္ထပါရာဇိကဝဏ္ဏနာ နိဋ္ဌိတာ.

ပါရာဇိကနိဂမနဝဏ္ဏနာ

ဣဓာတိ ဣမသ္မိံ ဘိက္ခုပါတိမောက္ခေ. ဥဒ္ဒိဋ္ဌပါရာဇိကပရိဒီပနမေဝါတိ ဥဒ္ဒိဋ္ဌာနံ စတုန္နံ ပါရာဇိကာနံ ပရိဒီပနဝစနမေဝ. အဝဓာရဏံ ပန န အညေသမ္ပီတိ ဒဿနတ္ထံ. တေနာဟ ‘‘သမောဓာနေတွာ ပနာ’’တိအာဒိ. တတ္ထ သမောဓာနေတွာတိ တတ္ထ တတ္ထ အာဂတာနိ ဧတ္ထေဝ သမောဒဟိတွာ၊ ပက္ခိပိတွာ ရာသိံ ကတွာတိ အတ္ထော. ပါဠိယံ အာဂတာနီတိ ဥဒ္ဒေသပါဠိယံ အာဂတာနိ. ဘိက္ခုနီနံ အသာဓာရဏာနိ စတ္တာရီတိ ဥဗ္ဘဇာဏုမဏ္ဍလိကာ၊ ဝဇ္ဇပ္ပဋိစ္ဆာဒိကာ၊ ဥက္ခိတ္တာနုဝတ္တိကာ၊ အဋ္ဌဝတ္ထုကာတိ ဣမာနိ ဘိက္ခုနီနံ ဘိက္ခူဟိ အသာဓာရဏာနိ စတ္တာရိ. ပဏ္ဍကာဒီနဉှိ ဧကာဒသန္နံ အဘဗ္ဗဘာဝေါ ပါရာဇိကာပတ္တိသဒိသတ္တာ ပါရာဇိကောတိ အာဟ ‘‘ဧကာဒသန္န’’န္တိအာဒိ. အဘဗ္ဗဘာဝသင်္ခါတေဟီတိ ဝတ္ထုဝိပန္နတာဒိနာ ပဗ္ဗဇ္ဇူပသမ္ပဒါယ နအရဟဘာဝသင်္ခါတေဟိ. ပဏ္ဍကတိရစ္ဆာနဂတဥဘတောဗျဉ္ဇနကာ (ပါရာ. အဋ္ဌ. ၂.၂၃၃) ဟိ တယော ဝတ္ထုဝိပန္နာ အဟေတုကပ္ပဋိသန္ဓိကာ၊ တေသံ သဂ္ဂေါ အဝါရိတော၊ မဂ္ဂေါ ပန ဝါရိတော. အဘဗ္ဗာ ဟိ တေ မဂ္ဂပ္ပဋိလာဘာယ ဝတ္ထုဝိပန္နတ္တာ. ပဗ္ဗဇ္ဇာပိ နေသံ ပဋိက္ခိတ္တာ၊ တသ္မာ တေပိ ပါရာဇိကာဝ. ထေယျသံဝါသကော၊ တိတ္ထိယပက္ကန္တကော၊ မာတုဃာတကော၊ ပိတုဃာတကော၊ အရဟန္တဃာတကော၊ ဘိက္ခုနိဒူသကော၊ လောဟိတုပ္ပါဒကော၊ သံဃဘေဒကောတိ ဣမေ အဋ္ဌ အတ္တနော ကိရိယာယ ဝိပန္နတ္တာ အဘဗ္ဗဋ္ဌာနံ ပတ္တာတိ ပါရာဇိကာဝ. တေသု ထေယျသံဝါသကော၊ တိတ္ထိယပက္ကန္တကော၊ ဘိက္ခုနိဒူသကောတိ ဣမေသံ တိဏ္ဏံ သဂ္ဂေါ အဝါရိတော၊ မဂ္ဂေါ ပန ဝါရိတောဝ. ဣတရေသံ ပဉ္စန္နံ ဥဘယမ္ပိ ဝါရိတံ. တေ ဟိ အနန္တရာဝ နရကေ နိဗ္ဗတ္တနကသတ္တာ. ယဒါ ဘိက္ခုနီ ဝိဗ္ဘမိတုကာမာ ဟုတွာ ကာသာဝမေဝ ဝါ ဂိဟိဝတ္ထံ ဝါ ဂိဟိနိဝါသနာကာရေန နိဝါသေတိ၊ တဒါ ပါရာဇိကမာပန္နာ နာမ ဟောတီတိ အာဟ ‘‘ဂိဟိဘာဝံ ပတ္ထယမာနာယာ’’တိအာဒိ. သာ ဟိ အဇ္ဈာစာရဝီတိက္ကမံ အကတွာပိ ဧတ္တာဝတာ အဿမဏီ နာမ ဟောတိ.

ဒီဃတာယ လမ္ဗမာနံ အင်္ဂဇာတမေတဿာတိ လမ္ဗီ (သာရတ္ထ. ဋီ. ၂.၂၃၃). န သော ဧတ္တာဝတာ ပါရာဇိကော၊ အထ ခေါ ယဒါ အနဘိရတိယာ ပီဠိတော အတ္တနော အင်္ဂဇာတံ မုခေ ဝါ ဝစ္စမဂ္ဂေ ဝါ ပဝေသေတိ၊ တဒါ ပါရာဇိကော ဟောတိ. မုဒုကတာ ပိဋ္ဌိ ဧတဿာတိ မုဒုပိဋ္ဌိကော၊ ကတပရိကမ္မာယ မုဒုကာယ ပိဋ္ဌိယာ သမန္နာဂတော. သောပိ ယဒါ အနဘိရတိယာ ပီဠိတော အတ္တနော အင်္ဂဇာတံ အတ္တနော မုခမဂ္ဂဝစ္စမဂ္ဂေသု အညတရံ ပဝေသေတိ၊ တဒါ ပါရာဇိကော ဟောတိ. ပရဿ အင်္ဂဇာတံ မုခေန ဂဏှာတီတိ ယော အနဘိရတိယာ ပီဠိတော ပရဿ သုတ္တဿ ဝါ ပမတ္တဿ ဝါ အင်္ဂဇာတံ မုခေန ဂဏှာတိ. ပရဿ အင်္ဂဇာတေ အဘိနိသီဒတီတိ ယော အနဘိရတိယာ ပီဠိတော ပရဿ အင်္ဂဇာတံ ကမ္မနိယံ ဒိသွာ အတ္တနော ဝစ္စမဂ္ဂေန တဿူပရိ နိသီဒတိ၊ တံ အတ္တနော ဝစ္စမဂ္ဂံ ပဝေသေတီတိ အတ္ထော. ဧတာနိ ဟိ စတ္တာရိ ယသ္မာ ဥဘိန္နံ ရာဂဝသေန သဒိသဘာဝူပဂတာနံ ဓမ္မော ‘‘မေထုနဓမ္မော’’တိ ဝုစ္စတိ၊ တသ္မာ ဧကေန ပရိယာယေန မေထုနဓမ္မံ အပ္ပဋိသေဝိတွာယေဝ ကေဝလံ မဂ္ဂေန မဂ္ဂပ္ပဝေသနဝသေန အာပဇ္ဇိတဗ္ဗတ္တာ မေထုနဓမ္မပါရာဇိကဿ အနုလောမေန္တီတိ ‘‘အနုလောမပါရာဇိကာနီ’’တိ ဝုစ္စန္တိ.

ဧတ္ထာဟ – မာတုဃာတကပိတုဃာတကအရဟန္တဃာတကာ တတိယပါရာဇိကံ အာပန္နာ၊ ဘိက္ခုနိဒူသကော၊ လမ္ဗိအာဒယော စတ္တာရော စ ပဌမပါရာဇိကံ အာပန္နာ ဧဝါတိ ကတွာ ကုတော စတုဝီသတီတိ (သာရတ္ထ. ဋီ. ၂.၂၃၃)? ဝုစ္စတေ – မာတုဃာတကာဒယော ဟိ စတ္တာရော ဣဓ အနုပသမ္ပန္နာ ဧဝ အဓိပ္ပေတာ၊ လမ္ဗိအာဒယော စတ္တာရော ကိဉ္စာပိ ပဌမပါရာဇိကေန သင်္ဂဟိတာ၊ ယသ္မာ ပန ဧကေန ပရိယာယေန မေထုနဓမ္မံ အပ္ပဋိသေဝိနော ဟောန္တိ၊ တသ္မာ ဝိသုံ ဝုတ္တာတိ. ဒုတိယဝိကပ္ပေ ကစ္စိတ္ထာတိ ဧတ္ထ ကစ္စိ အတ္ထာတိ ပဒစ္ဆေဒေါ ကာတဗ္ဗော.

ဣတိ ကင်္ခါဝိတရဏိယာ ပါတိမောက္ခဝဏ္ဏနာယ

ဝိနယတ္ထမဉ္ဇူသာယံ လီနတ္ထပ္ပကာသနိယံ

ပါရာဇိကဝဏ္ဏနာ နိဋ္ဌိတာ.