၉. ပရအဘိသပနသိက္ခာပဒဝဏ္ဏနာ

မနုဿဒေါဘဂ္ဂေန ဝါတိ ‘‘ကာဏာ ဟောမိ၊ ကုဏီ ဟောမိ၊ ဣတရာ ဝါ ဤဒိသာ ဟောတူ’’တိအာဒိနာ မနုဿဝိရူပဘာဝေန. အတ္ထဓမ္မအနုသာသနိပုရေက္ခာရာနန္တိ ဧတ္ထ အတ္ထပုရေက္ခာရာယာတိ အဋ္ဌကထံ ကထေန္တိယာ. ဓမ္မပုရေက္ခာရာယာတိ ပါဠိံ ဝါစေန္တိယာ. အနုသာသနိပုရေက္ခာရာယာတိ ‘‘ဣဒါနိပိ တွံ ဧဒိသာ၊ သာဓု ဝိရမဿု၊ နော စေ ဝိရမသိ၊ အဒ္ဓါ ပုန ဧဝရူပါနိ ကမ္မာနိ ကတွာ နိရယေ ဥပ္ပဇ္ဇိဿသိ၊ တိရစ္ဆာနယောနိယာ ဥပ္ပဇ္ဇိဿသီ’’တိ (ပါစိ. အဋ္ဌ. ၈၇၈) ဧဝံ အနုသာသနိယံ ဌတွာ ဝဒန္တိယာ.

ပရအဘိသပနသိက္ခာပဒဝဏ္ဏနာ နိဋ္ဌိတာ.