၅. အနာပုစ္ဆာပက္ကမနသိက္ခာပဒဝဏ္ဏနာ

အာသီဒန္တိ ဧတ္ထာတိ အာသနန္တိ အာဟ ‘‘ပလ္လင်္ကဿောကာသဘူတေ’’တိ၊ ဦရုဗဒ္ဓါသနဿ ဩကာသေတိ အတ္ထော. အနောဝဿကန္တိ နိဗ္ဗကောကာသံ. အဇ္ဈောကာသေ ဥပစာရန္တိ အဇ္ဈောကာသေ နိသီဒိတွာ ဒွါဒသဟတ္ထပ္ပမာဏံ ပဒေသံ. ဂိလာနာယာတိ ယာ တာဒိသေန ဂေလညေန အာပုစ္ဆိတုံ န သက္ကောတိ. အာပဒါသူတိ ဃရေ အဂ္ဂိ ဝါ ဥဋ္ဌိတော ဟောတိ၊ စောရော ဝါ၊ ဧဝရူပေ ဥပဒ္ဒဝေ အနာပုစ္ဆာ ပက္ကမတိ၊ အနာပတ္တိ.

အနာပုစ္ဆာပက္ကမနသိက္ခာပဒဝဏ္ဏနာ နိဋ္ဌိတာ.