၂. စီဝရဝဂ္ဂေါ

၁၁. ဂရုပါဝုရဏသိက္ခာပဒဝဏ္ဏနာ

ယသ္မာ ပဝါရိတဋ္ဌာနေ ဝိညတ္တိ နာမ န ပဋိသေဓေတဗ္ဗာ၊ တသ္မာ ဘဂဝါ ဓမ္မနိမန္တနဝသေန ပဝါရိတဋ္ဌာနေ ‘‘ဝဒေထာယျေ၊ ယေနတ္ထော’’တိ (သာရတ္ထ. ဋီ. ပါစိတ္တိယ ၃.၇၈၄) ဝုတ္တာယ စတုက္ကံသပရမံ ဝိညာပေတဗ္ဗန္တိ ပရိစ္ဆေဒံ ဒဿေတီတိ ဝေဒိတဗ္ဗံ. တေနေဝ ‘‘စေတာပေတဗ္ဗန္တိ ဌပေတွာ သဟဓမ္မိကေ စ ဉာတကပ္ပဝါရိတေ စ အညေန ကိသ္မိဉ္စိဒေဝ ဂုဏေ ပရိတုဋ္ဌေန ‘ဝဒေထာယျေ၊ ယေနတ္ထော’တိ ဝုတ္တာယ ဝိညာပေတဗ္ဗ’’န္တိ ဝုတ္တံ. ရာဇာနန္တိ ပသေနဒိကောသလရာဇာနံ.

ဂရုပါဝုရဏသိက္ခာပဒဝဏ္ဏနာ နိဋ္ဌိတာ.

၁၂. လဟုပါဝုရဏသိက္ခာပဒဝဏ္ဏနာ

ဒုတိယံ ဥတ္တာနတ္ထမေဝ.

လဟုပါဝုရဏသိက္ခာပဒဝဏ္ဏနာ နိဋ္ဌိတာ.

စီဝရဝဂ္ဂေါ ဒုတိယော.

ဣတိ ကင်္ခါဝိတရဏိယာ ပါတိမောက္ခဝဏ္ဏနာယ

ဝိနယတ္ထမဉ္ဇူသာယံ လီနတ္ထပ္ပကာသနိယံ

ဘိက္ခုနိပါတိမောက္ခေ နိဿဂ္ဂိယဝဏ္ဏနာ နိဋ္ဌိတာ.