၄. အညဝိညာပနသိက္ခာပဒဝဏ္ဏနာ
ပဋိလာဘေနာတိ ပဌမဝိညတ္တိတော ဦနတရဿာပိ အညဿ ပဋိလာဘေန.
တသ္မိံ အပ္ပဟောန္တေ ပုန တညေဝါတိ ယံ ပဌမံ ဝိညတ္တံ၊ ထောကတ္တာ တသ္မိံ အပ္ပဟောန္တေ ပုန တညေဝ ဝိညာပေန္တိယာတိ အတ္ထော. အညေနပိ အတ္ထေ သတီ တိ ပဌမံ ဝိညတ္တိတော အညေနပိ အတ္ထေ သတိ. တေန သဒ္ဓိံ အညဉ္စာတိ ယံ ပဌမံ ဝိညတ္တံ၊ တေန သဒ္ဓိံ အညဉ္စ. ကိံ ဝုတ္တံ ဟောတိ? သစေ ပဌမံ သပ္ပိ ဝိညတ္တံ၊ ‘‘ယမကံ ပစိတဗ္ဗ’’န္တိ စ ဝေဇ္ဇေန ဝုတ္တတ္တာ တေလေနာပိ အတ္ထော ဟောတိ. တတော ‘‘တေလေနာပိ မေ အတ္ထော’’တိ ဧဝမာဒိနာ အညဉ္စ ဝိညာပေန္တိယာတိ ဝုတ္တံ ဟောတိ. အာနိသံသံ ဒဿေတွာတိ ‘‘သစေ ကဟာပဏဿ သပ္ပိ အာဘတံ ဟောတိ၊ ဣမိနာ မူလေန ဒွိဂုဏံ တေလံ လဗ္ဘတိ၊ တေလေနာပိ စ ဣဒံ ကိစ္စံ နိပ္ပဇ္ဇတိ၊ တသ္မာ တေလံ အာဟရာ’’တိ ဧဝံ အာနိသံသံ ဒဿေတွာ.
အညဝိညာပနသိက္ခာပဒဝဏ္ဏနာ နိဋ္ဌိတာ.