၆. ဝဇ္ဇပ္ပဋိစ္ဆာဒိကာသိက္ခာပဒဝဏ္ဏနာ

ပါရာဇိကံ ဓမ္မံ အဇ္ဈာပန္နန္တိ ဘိက္ခူဟိ သာဓာရဏာနံ စတုန္နံ၊ အသာဓာရဏာနံ စတုန္နဉ္စာတိ အဋ္ဌန္နမညတရံ အဇ္ဈာပန္နံ. ဣဒဉ္စ ပါရာဇိကံ (ပါစိ. အဋ္ဌ. ၆၆၆) ပစ္ဆာ ပညတ္တံ၊ သင်္ဂီတိကာရကာစရိယေဟိ ပန ပုရိမေန သဒ္ဓိံ ယုဂဠံ ကတွာ ဣမသ္မိံ ဩကာသေ ဌပိတန္တိ ဝေဒိတဗ္ဗံ. ‘‘အဋ္ဌန္နံ ပါရာဇိကာနံ အညတရ’’န္တိ (ပါစိ. ၆၆၆) ဝစနတော ပန ဝဇ္ဇပ္ပဋိစ္ဆာဒိကံ ယာ ပဋိစ္ဆာဒေတိ၊ သာပိ ဝဇ္ဇပ္ပဋိစ္ဆာဒိကာ ဧဝါတိ ဒဋ္ဌဗ္ဗံ. ကိဉ္စာပိ ဝဇ္ဇပ္ပဋိစ္ဆာဒနံ ပေမဝသေန ဟောတိ၊ တထာပိ သိက္ခာပဒဝီတိက္ကမစိတ္တံ ဒေါမနဿမေဝ ဟောတီတိ ကတွာ ဒုက္ခဝေဒနံ ဟောတီတိ ‘‘တတြ ဟိ ပါစိတ္တိယံ။ပေ။ သေသံ တာဒိသမေဝါ’’တိ ဝုတ္တံ.

ဝဇ္ဇပ္ပဋိစ္ဆာဒိကာသိက္ခာပဒဝဏ္ဏနာ နိဋ္ဌိတာ.