၁. မေထုနဓမ္မသိက္ခာပဒဝဏ္ဏနာ

အဘိလာပမတ္တန္တိ ဝစနမတ္တံ၊ န အတ္ထောတိ အဓိပ္ပါယော. လိင်္ဂဘေဒမတ္တန္တိ ပုရိသလိင်္ဂံ ဣတ္ထိလိင်္ဂန္တိ ဝိသေသမတ္တံ. ဝိသေသောတိ နာနာတ္တံ. ဆန္ဒေန စေဝါတိ ပေမေန စေဝ၊ သိနေဟေန စေဝါတိ အတ္ထော. ရုစိယာ စာတိ ဣစ္ဆာယ စ. ပဓံသိတာယာတိ ဒူသိတာယ. ပရိပုဏ္ဏာ ဥပသမ္ပဒါ ယဿာ သာ ပရိပုဏ္ဏူပသမ္ပဒါ၊ ဥဘတောသံဃေန ဥပသမ္ပန္နာတိ အတ္ထော.

မေထုနဓမ္မသိက္ခာပဒဝဏ္ဏနာ နိဋ္ဌိတာ.