၃-၄. သုပ္ပဋိစ္ဆန္နသိက္ခာပဒဝဏ္ဏနာ

သုဋ္ဌု ပဋိစ္ဆန္နောတိ ဇတ္တုမ္ပိ ဥရမ္ပိ အဝိဝရိတွာ ပဋိစ္ဆာဒေတဗ္ဗဋ္ဌာနေ ပဋိစ္ဆာဒနေန ပဋိစ္ဆန္နော၊ န သီသပါရုတော. တေနာဟ ‘‘ဂဏ္ဌိကံ ပဋိမုဉ္စိတွာ’’တိအာဒိ. တတ္ထ ဂဏ္ဌိကံ ပဋိမုဉ္စိတွာတိ ဂဏ္ဌိကံ ပါသကေ ပဋိမုဉ္စိတွာ. အန္တရဃရေ ဝါတိ ဂေါစရဂါမေ. ဧကဒိဝသမ္ပိ ဝါသူပဂတဿ သန္တိကံ ယထာသုခံ ဂန္တုံ ဝဋ္ဋတိ၊ ကော ပန ဝါဒေါ စတုပ္ပဉ္စာဟံ ဝါသမဓိဋ္ဌာယ ဝသိတဘိက္ခူနံ သန္တိကန္တိ ဂဏ္ဌိပဒေ လိခိတံ.

ဝါသူပဂတဿာတိ ရတ္တိဝါသတ္ထာယ ဥပဂတဿ ရတ္တိဘာဂေ ဝါ ဒိဝသဘာဂေ ဝါ ကာယံ ဝိဝရိတွာ နိသီဒတော အနာပတ္တိ.

သုပ္ပဋိစ္ဆန္နသိက္ခာပဒဝဏ္ဏနာ နိဋ္ဌိတာ.