၁. ပရိမဏ္ဍလသိက္ခာပဒဝဏ္ဏနာ

‘‘အန္တရဃရေ’’တိ ဝိသေသေတွာ န ဝုတ္တတ္တာ ‘‘အာရာမေပိ အန္တရဃရေပိ သဗ္ဗတ္ထာ’’တိ ဝုတ္တံ. အာရာမေပီတိ ဗုဒ္ဓူပဋ္ဌာနာဒိကာလံ သန္ဓာယ ဝုတ္တံ. ယထာ ‘‘တတြိမေ စတ္တာရော ပါရာဇိကာ ဓမ္မာ ဥဒ္ဒေသံ အာဂစ္ဆန္တီ’’တိအာဒိနာ တတ္ထ တတ္ထ ပရိစ္ဆေဒေါ ကတော၊ ဧဝမေတ္ထာပိ ‘‘တတြိမေ ပဉ္စသတ္တတိ သေခိယာ ဓမ္မာ ဥဒ္ဒေသံ အာဂစ္ဆန္တီ’’တိ ကသ္မာ ပရိစ္ဆေဒေါ န ကတောတိ အာဟ ‘‘ဧတ္ထ စာ’’တိအာဒိ. ဝတ္တက္ခန္ဓကေ ဝုတ္တဝတ္တာနိပီတိ အာဂန္တုကာဝါသိကဂမိကာနုမောဒနဘတ္တဂ္ဂပိဏ္ဍစာရိကာရညသေနာသနဇန္တာဃရဝစ္စကုဋိဥပဇ္ဈာစရိယသဒ္ဓိဝိဟာရိကအန္တေဝါသိကဝတ္တာနိ. ဣဒဉ္စ နိဒဿနမတ္တံ အညေသမ္ပိ ခန္ဓကဝတ္တာနံ ဧတ္ထေဝ သင်္ဂဟဿ ဣစ္ဆိတဗ္ဗတ္တာ. အယဉှေတ္ထ အဓိပ္ပါယော – သေခိယဂ္ဂဟဏေန စေတ္ထ ဝတ္တက္ခန္ဓကာဒီသု (စူဠဝ. ၃၅၆ အာဒယော) အာဂတဝတ္တာဒီနမ္ပိ ဂဟဏံ. တေပိ ဟိ သိက္ခိတဗ္ဗဋ္ဌေန ‘‘သေခိယာ’’တိ ဣစ္ဆိတာ. တသ္မာ မာတိကာယံ ပါရာဇိကာဒီနံ ဝိယ သေခိယာနံ ပရိစ္ဆေဒေါ န ကတောတိ. န ကေဝလံ ဝတ္တက္ခန္ဓကာဒီသု (စူဠဝ. ၃၅၆ အာဒယော) အာဂတဝတ္တာဒီနံ ဂဟဏတ္ထမေဝါတိ အာဟ ‘‘စာရိတ္တဝိနယဒဿနတ္ထဉ္စာ’’တိ. ဧတ္ထာပိ ပရိစ္ဆေဒေါ န ကတောတိ အာနေတွာ ယောဇေတဗ္ဗံ. မာတိကာယ ‘‘ဒုက္ကဋ’’န္တိ အဝုတ္တေ ကထံ ပနေတ္ထ ဒုက္ကဋန္တိ ဝေဒိတဗ္ဗန္တိ အာဟ ‘‘ယော ပနာ’’တိအာဒိ.

အဋ္ဌင်္ဂုလမတ္တန္တိ ပကတင်္ဂုလေန အဋ္ဌင်္ဂုလမတ္တံ. ယော ပန သုက္ခဇင်္ဃော ဝါ မဟာပိဏ္ဍိကမံသော ဝါ ဟောတိ၊ တဿ သာရုပ္ပတ္ထာယ အဋ္ဌင်္ဂုလာဓိကမ္ပိ ဩတာရေတွာ နိဝါသေတုံ ဝဋ္ဋတိ.

ပါသန္တန္တိ ပါသဿ အန္တံ၊ ဒသာမူလန္တိ အတ္ထော.

အပရိမဏ္ဍလံ နိဝါသေဿာမီတိ ‘‘ပုရတော ဝါ ပစ္ဆတော ဝါ ဩလမ္ဗေတွာ နိဝါသေဿာမီ’’တိ ဧဝံ အသဉ္စိစ္စ. ကိဉ္စာပိ ပရိမဏ္ဍလံ နိဝါသေတုံ အဇာနန္တဿ အနာပတ္တိ၊ တထာပိ နိဝါသနဝတ္တံ သာဓုကံ ဥဂ္ဂဟေတဗ္ဗမေဝ. သဉ္စိစ္စ အနုဂ္ဂဟဏဉှိ အနာဒရိယံ သိယာတိ အာဟ ‘‘အပိစ နိဝါသနဝတ္တံ ဥဂ္ဂဟေတဗ္ဗ’’န္တိ.

ပရိမဏ္ဍလသိက္ခာပဒဝဏ္ဏနာ နိဋ္ဌိတာ.