၁. သပ္ပိဝိညာပနသိက္ခာပဒဝဏ္ဏနာ

ပါဋိဒေသနီယေသု ပဌမေ သပ္ပိန္တိ ပုဗ္ဗေ ဝုတ္တဝိနိစ္ဆယံ ပါဠိအာဂတံ (ပါစိ. ၁၂၃၀) ဂေါသပ္ပိအာဒိမေဝ. ဝိညာပေတွာ ဘုဉ္ဇေယျာတိ ဧတ္ထ ‘‘ဝိညတ္တိယာ ပဋိလဒ္ဓံ ဘုဉ္ဇိဿာမီ’’တိ ဂဟဏေ ဒုက္ကဋံ၊ ဂဟိတဿ အဇ္ဈောဟာရေ အဇ္ဈောဟာရေ ပါဋိဒေသနီယံ.

သာဝတ္ထိယံ ဆဗ္ဗဂ္ဂိယာ ဘိက္ခုနိယော အာရဗ္ဘ သပ္ပိံ ဝိညာပေတွာ ဘုဉ္ဇနဝတ္ထုသ္မိံ ပညတ္တံ၊ ‘‘အဂိလာနာ’’တိ အယမေတ္ထ အနုပညတ္တိ၊ တိကပါဋိဒေသနီယံ၊ ဂိလာနာယ ဒွိကဒုက္ကဋံ. ယာ ပန ဂိလာနာ ဂိလာနသညာ၊ ဂိလာနကာလေ ဝါ ဝိညာပေတွာ ပစ္ဆာ အဂိလာနာ ဟုတွာ ဘုဉ္ဇတိ၊ ဂိလာနာယ ဝါ သေသကံ၊ ဉာတကပ္ပဝါရိတဋ္ဌာနတော ဝါ ဝိညတ္တံ၊ အညဿ ဝါ အတ္ထာယ၊ အတ္တနော ဝါ ဓနေန ဂဟိတံ ဘုဉ္ဇတိ၊ တဿာ၊ ဥမ္မတ္တိကာဒီနဉ္စ အနာပတ္တိ. ဝုတ္တလက္ခဏသပ္ပိတာ၊ အနုညာတကာရဏာဘာဝေါ၊ ဝိညတ္တိ၊ အဇ္ဈောဟာရောတိ ဣမာနေတ္ထ စတ္တာရိ အင်္ဂါနိ. သမုဋ္ဌာနာဒီနိ အဒ္ဓါနသဒိသာနီတိ.

သပ္ပိဝိညာပနသိက္ခာပဒဝဏ္ဏနာ နိဋ္ဌိတာ.