၁၁. ဂရုပါဝုရဏသိက္ခာပဒဝဏ္ဏနာ

ဒုတိယဿ ပဌမေ ဂရုပါဝုရဏန္တိ သီတကာလေ ပါဝုရဏံ. စတုက္ကံသပရမန္တိ ကံသော နာမ စတုက္ကဟာပဏိကော ဟောတိ၊ တသ္မာ သောဠသကဟာပဏဂ္ဃနကံ. စေတာပေတဗ္ဗန္တိ ဌပေတွာ သဟဓမ္မိကေ စ ဉာတကပ္ပဝါရိတေ စ အညေန ကိသ္မိဉ္စိဒေဝ ဂုဏေ ပရိတုဋ္ဌေန ‘‘ဝဒေထာယျေ၊ ယေနတ္ထော’’တိ ဝုတ္တာယ ဝိညာပေတဗ္ဗံ. တတော စေ ဥတ္တရီတိ တတုတ္တရိ ဝိညာပေန္တိယာ ဒုက္ကဋံ၊ ပဋိလဒ္ဓံ နိဿဂ္ဂိယံ ဟောတိ.

သာဝတ္ထိယံ ထုလ္လနန္ဒံ အာရဗ္ဘ ရာဇာနံ ကမ္ဗလံ ဝိညာပနဝတ္ထုသ္မိံ ပညတ္တံ၊ တိကပါစိတ္တိယံ၊ ဦနကစတုက္ကံသေ ဒွိကဒုက္ကဋံ. တသ္မိံ ပန ဦနကသညာယ၊ စတုက္ကံသပရမံ စေတာပေန္တိယာ၊ ဉာတကပ္ပဝါရိတေ ဝါ၊ အညဿ ဝါ အတ္ထာယ၊ အတ္တနော ဝါ ဓနေန၊ မဟဂ္ဃံ စေတာပေန္တံ အပ္ပဂ္ဃံ စေတာပေန္တိယာ၊ ဥမ္မတ္တိကာဒီနဉ္စ အနာပတ္တိ. ဂရုပါဝုရဏတာ၊ အတိရေကစတုက္ကံသတာ၊ အနနုညာတဋ္ဌာနေ ဝိညတ္တိ၊ ပဋိလာဘောတိ ဣမာနေတ္ထ စတ္တာရိ အင်္ဂါနိ. သမုဋ္ဌာနာဒီနိ သဉ္စရိတ္တသဒိသာနီတိ.

ဂရုပါဝုရဏသိက္ခာပဒဝဏ္ဏနာ နိဋ္ဌိတာ.