၃. ပဉှပုစ္ဆကဝဏ္ဏနာ

၄၂၇. ပဉှပုစ္ဆကေ ယံ ဝုတ္တံ ‘‘ဝီရိယဇေဋ္ဌိကာယ ပန အညဿ ဝီရိယဿ အဘာဝါ န ဝတ္တဗ္ဗာနိ မဂ္ဂါဓိပတီနီတိ ဝါ န မဂ္ဂါဓိပတီနီတိ ဝါ’’တိ၊ ဧတ္ထ ‘‘မဂ္ဂါဓိပတီနီ’’တိ န ဝတ္တဗ္ဗတာယ ဧဝ အညဿ ဝီရိယဿ အဘာဝေါ ကာရဏန္တိ ဒဋ္ဌဗ္ဗံ. ဆန္ဒဿ ပန စိတ္တဿ ဝါ နမဂ္ဂဘူတဿ အဓိပတိနော တဒါ အဘာဝါ ‘‘န မဂ္ဂါဓိပတီနီ’’တိ န ဝတ္တဗ္ဗာနီတိ ဝုတ္တံ. ဆန္ဒစိတ္တာနံ ဝိယ နမဂ္ဂဘူတဿ အညဿ ဝီရိယာဓိပတိနော အဘာဝါတိ ဝါ အဓိပ္ပါယော. သမ္မပ္ပဓာနာနံ တဒါ မဂ္ဂသင်္ခါတအဓိပတိဘာဝတော ဝါ ‘‘န မဂ္ဂါဓိပတီနီ’’တိ နဝတ္တဗ္ဗတာ ဝုတ္တာတိ ဝေဒိတဗ္ဗာ.

ပဉှပုစ္ဆကဝဏ္ဏနာ နိဋ္ဌိတာ.

သမ္မပ္ပဓာနဝိဘင်္ဂဝဏ္ဏနာ နိဋ္ဌိတာ.