၂. ပဉှပုစ္ဆကဝဏ္ဏနာ

၂၂၃. ဣဓ အနာဘဋ္ဌန္တိ ဧကန္တာနာရမ္မဏတ္တေန ဘာသိတံ. ‘‘ရူပမိဿကတ္တာ အနာရမ္မဏေသု ရူပဓမ္မေသု သင်္ဂဟိတ’’န္တိ ကသ္မာ ဝုတ္တံ၊ နနု မိဿကတ္တာ ဧဝ ဇီဝိတိန္ဒြိယံ အနာရမ္မဏေသု အသင်္ဂဟိတံ. န ဟိ အဋ္ဌိန္ဒြိယာ အနာရမ္မဏာတိ ဝုတ္တာတိ? သစ္စမေတံ၊ ဇီဝိတိန္ဒြိယဧကဒေသဿ ပန အနာရမ္မဏေသု ရူပဓမ္မေသု သင်္ဂဟိတတံ သန္ဓာယေတံ ဝုတ္တံ၊ အရူပကောဋ္ဌာသေန ပရိတ္တာရမ္မဏာဒိတာ အတ္ထီတိ သိယာပက္ခေ သင်္ဂဟိတန္တိ အဓိပ္ပါယော. အရူပကောဋ္ဌာသေန ပန ပရိတ္တာရမ္မဏာဒိတာ၊ ရူပကောဋ္ဌာသေန စ နဝတ္တဗ္ဗတာ အတ္ထီတိ မိဿကဿ သမုဒါယဿေဝ ဝသေန သိယာပက္ခေ သင်္ဂဟိတံ၊ န ဧကဒေသဝသေနာတိ ဒဋ္ဌဗ္ဗံ. န ဟိ အနာရမ္မဏံ ပရိတ္တာရမ္မဏာဒိဘာဝေန နဝတ္တဗ္ဗံ န ဟောတီတိ. ‘‘ရူပဉ္စ နိဗ္ဗာနဉ္စ အနာရမ္မဏာ၊ သတ္တိန္ဒြိယာ အနာရမ္မဏာ’’တိအာဒိဝစနဉ္စ အဝိဇ္ဇမာနာရမ္မဏာနာရမ္မဏေသု နဝတ္တဗ္ဗေသု အနာရမ္မဏတ္တာ နဝတ္တဗ္ဗတံ ဒဿေတိ၊ န သာရမ္မဏဿေဝ နဝတ္တဗ္ဗတံ၊ နဝတ္တဗ္ဗဿ ဝါ သာရမ္မဏတံ. န ဟိ နဝတ္တဗ္ဗ-သဒ္ဒေါ သာရမ္မဏေ နိရုဠှော. ယဒိပိ သိယာ၊ ‘‘တိဿော စ ဝေဒနာ ရူပဉ္စ နိဗ္ဗာနဉ္စ ဣမေ ဓမ္မာ နဝတ္တဗ္ဗာ သုခါယ ဝေဒနာယ သမ္ပယုတ္တာ’’တိအာဒိ န ဝုစ္စေယျ၊ အထာပိ ပရိတ္တာရမ္မဏာဒိသမ္ဗန္ဓော နဝတ္တဗ္ဗ-သဒ္ဒေါ သာရမ္မဏေသွေဝ ဝတ္တတိ၊ ‘‘ဒွါယတနာ သိယာ ပရိတ္တာရမ္မဏာ’’တိအာဒိံ အဝတွာ ‘‘မနာယတနံ သိယာ ပရိတ္တာရမ္မဏံ။ပေ။ အပ္ပမာဏာရမ္မဏ’’န္တိပိ၊ ‘‘ဓမ္မာယတနံ သိယာ ပရိတ္တာရမ္မဏံ။ပေ။ အပ္ပမာဏာရမ္မဏ’’န္တိပိ၊ ‘‘သိယာ အနာရမ္မဏ’’န္တိပိ ဝတ္တဗ္ဗံ သိယာ. န ဟိ ပဉှပုစ္ဆကေ သာဝသေသာ ဒေသနာ အတ္ထီတိ. ‘‘အဋ္ဌိန္ဒြိယာ သိယာ အဇ္ဈတ္တာရမ္မဏာ’’တိ ဧတ္ထ စ ဇီဝိတိန္ဒြိယဿ အာကိဉ္စညာယတနကာလေ အရူပဿ ရူပဿ စ အနာရမ္မဏတ္တာ နဝတ္တဗ္ဗတာ ဝေဒိတဗ္ဗာ.

ပဉှပုစ္ဆကဝဏ္ဏနာ နိဋ္ဌိတာ.

ဣန္ဒြိယဝိဘင်္ဂဝဏ္ဏနာ နိဋ္ဌိတာ.