၃. ပဉှပုစ္ဆကဝဏ္ဏနာ

သယံ ဇေဋ္ဌကဘာဝေန ပဝတ္တနတော စတ္တာရော အဓိပတယော အညမညံ ဂရုံ န ကရောန္တိ. တသ္မာ ‘‘စတ္တာရော ဣဒ္ဓိပါဒါ န မဂ္ဂါဓိပတိနော’’တိ ဝုတ္တာ. တေနာဟ ‘‘အညမညဿ ပန အဓိပတယော န ဘဝန္တီ’’တိ. ဧတမတ္ထန္တိ ‘‘အဓိပတယော အညမညဿ အဓိပတီ န ဘဝန္တီ’’တိ ဧတမတ္ထံ. အဓိပတိနောတိ အဓိပတိ ဘဝိတုံ သမတ္ထဿ. အဓိပတိံ န ကရောန္တီတိ အဓိပတိံ ကတွာ ဂရုံ ကတွာ နပ္ပဝတ္တန္တိ. အဓိပတီနံ သဟဘာဝေတိ အဓိပတိကိစ္စကရဏေန သဟပဝတ္တိယံ. ‘‘အဝီမံသာဓိပတိကဿ မဂ္ဂဿ အဘာဝါ’’တိ ဣဒံ ‘‘အဓိပတိတာသမတ္ထာ ဓမ္မာ အဓိပတိဘာဝေနေဝ ပဝတ္တေယျု’’န္တိ ဒေါသာရောပနဝသေနာဟ၊ န ယထာဓိဂတဝသေန. အဓိပတိဓမ္မာနဉှိ ပုဗ္ဗာဘိသင်္ခါရေ သတိ အဓိပတိဘာဝေန ပဝတ္တိ၊ န အညထာတိ သဟဘာဝေပိ တဒဘာဝံ သန္ဓာယ ဝိသေသနံ န ကတ္တဗ္ဗံ သိယာတိ သက္ကာ ဝတ္တုံ. အညမညာဓိပတိကရဏဘာဝေတိ အညမညံ အဓိပတိံ ကတွာ ပဝတ္တိယံ. ဝီမံသာဓိပတိကတ္တဝစနန္တိ ဝီမံသာဓိပတိကဘာဝဿ ဝစနံ. န ဝတ္တဗ္ဗံ သိယာ သဗ္ဗေသမ္ပိ အဓိပတီနံ သာဓိပတိကတ္တာတိ အဓိပ္ပါယော. သဟဘာဝေါ ပဋိက္ခိတ္တော ဧဝ သာဓိပတိဘာဝဿ အနေကံသိကတာဝစနတော.

ပဉှပုစ္ဆကဝဏ္ဏနာ နိဋ္ဌိတာ.

ဣဒ္ဓိပါဒဝိဘင်္ဂဝဏ္ဏနာ နိဋ္ဌိတာ.