၄. အဒန္တဝဂ္ဂဝဏ္ဏနာ

၃၁-၃၆. စတုတ္ထဿ ပဌမေ အဒန္တန္တိ စိတ္တဘာဝနာယ ဝိနာ န ဒန္တံ. တေနာဟ – ‘‘သတိသံဝရရဟိတ’’န္တိ. စတုတ္ထေ တတိယေ ဝုတ္တဝိပရိယာယေန အတ္ထော ဝေဒိတဗ္ဗော. ပဉ္စမဆဋ္ဌေသု ပုရိမသဒိသောယေဝါတိ တတိယစတုတ္ထသဒိသော ဧဝ.

၃၇-၃၈. သတ္တမဋ္ဌမေသု ဥပမာ ပနေတ္ထာတိ ယထာ ပဌမာဒီသု အဒန္တဟတ္ထိအဿာဒယော ဥပမာဘာဝေန ဂဟိတာ၊ ဧဝမေတ္ထ သတ္ထမဋ္ဌမေသု ‘‘အသံဝုတဃရဒွါရာဒိဝသေန ဝေဒိတဗ္ဗာ’’တိ ဝုတ္တံ.

၃၉-၄၀. နဝမဒသမေသု စတူဟိပိ ပဒေဟီတိ အဒန္တာဒီဟိ စတူဟိ ပဒေဟိ ယောဇေတွာ နဝမဒသမာနိ သုတ္တာနိ ဝုတ္တာနီတိ ယောဇနာ.