၃. တတိယော ပရိစ္ဆေဒေါ

စေတသိကဝိဘာဂနိဒ္ဒေသော

၈၉. သဗ္ဗေ စေတသိကာ ဝုတ္တာ၊ ဗုဒ္ဓေနာဒိစ္စဗန္ဓုနာ၊

နာမသာမညတောယေဝ၊ ဒွေပညာသ ဘဝန္တိ တေ.

သေယျထိဒံ – ဖဿော ဝေဒနာ သညာ စေတနာ ဝိတက္ကော ဝိစာရော ပီတိ စိတ္တေကဂ္ဂတာ ဝီရိယံ ဇီဝိတံ ဆန္ဒော အဓိမောက္ခော မနသိကာရော တတြမဇ္ဈတ္တတာ သဒ္ဓါ သတိ ဟိရီ ဩတ္တပ္ပံ အလောဘော အဒေါသော အမောဟော ကာယပ္ပဿဒ္ဓိအာဒီနိ ဆ ယုဂါနိ၊ တိဿော ဝိရတိယော၊ ကရုဏာ မုဒိတာ လောဘော ဒေါသော မောဟော ဥဒ္ဓစ္စံ မာနော ဒိဋ္ဌိ ဣဿာ မစ္ဆရိယံ ကုက္ကုစ္စံ ထိနံ မိဒ္ဓံ ဝိစိကိစ္ဆာ အဟိရိကံ အနောတ္တပ္ပဉ္စာတိ.

၉၀. စတုပညာသဓာ ကာမေ၊ ရူပေ ပဉ္စဒသေရိတာ၊

တေ ဟောန္တိ ဒွါဒသာရူပေ၊ စတ္တာလီသမနာသဝါ.

၉၁. ဧကဝီသသတံ သဗ္ဗေ၊ စိတ္တုပ္ပါဒါ သမာသတော၊

ဧတေသု တေသမုပ္ပတ္တိံ၊ ဥဒ္ဓရိတွာ ပနေကကံ.

၉၂. ဖဿာဒီနံ တု ဓမ္မာနံ၊ ပဝက္ခာမိ ဣတော ပရံ၊

ပါဋဝတ္ထာယ ဘိက္ခူနံ၊ စိတ္တစေတသိကေသွဟံ.

၉၃. ဧကဂ္ဂတာ မနက္ကာရော၊ ဇီဝိတံ ဖဿပဉ္စကံ၊

အဋ္ဌေတေ အဝိနိဗ္ဘောဂါ၊ ဧကုပ္ပါဒါ သဟက္ခယာ.

၉၄. ဖဿော စ ဝေဒနာ သညာ၊ စေတနာ ဇီဝိတိန္ဒြိယံ၊

ဧကဂ္ဂတာ မနက္ကာရော၊ သဗ္ဗသာဓာရဏာ ဣမေ.

၉၅. ဝိတက္ကော ပဉ္စပညာသ-စိတ္တေသု သမုဒီရိတော၊

စာရော ဆသဋ္ဌိစိတ္တေသု၊ ဇာယတေ နတ္ထိ သံသယော.

၉၆. ဧကပညာသစိတ္တေသု၊ ပီတိ တေသဋ္ဌိယာ သုခံ၊

ဥပေက္ခာ ပဉ္စပညာသ-စိတ္တေ ဒုက္ခံ တု တီသု ဟိ.

၉၇. ဟောတိ ဒွါသဋ္ဌိစိတ္တေသု၊ သောမနဿိန္ဒြိယံ ပန၊

ဒုက္ခိန္ဒြိယံ ပနေကသ္မိံ၊ တထေကမှိ သုခိန္ဒြိယံ.

၉၈. ပဉ္စုတ္တရသတေ စိတ္တေ၊ ဝီရိယံ အာဟ နာယကော၊

စတုတ္တရသတေ စိတ္တေ၊ သမာဓိန္ဒြိယမဗြဝိ.

၉၉. သဗ္ဗာဟေတုကစိတ္တာနိ၊ ဌပေတွာ စေကဟေတုကေ၊

ဧကုတ္တရသတေ စိတ္တေ၊ ဆန္ဒဿုပ္ပတ္တိမုဒ္ဒိသေ.

၁၀၀. ဌပေတွာ ဒသ ဝိညာဏေ၊ ဝိစိကိစ္ဆာယုတမ္ပိ စ၊

ဒသုတ္တရသတေ စိတ္တေ၊ အဓိမောက္ခော ဥဒီရိတော.

၁၀၁. သဒ္ဓါ သတိ ဟိရောတ္တပ္ပံ၊ အလောဘာဒေါသမဇ္ဈတာ၊

ဆဠေဝ ယုဂဠာ စာတိ၊ ဓမ္မာ ဧကူနဝီသတိ.

၁၀၂. ဧကနဝုတိယာ စိတ္တေ၊ ဇာယန္တိ နိယတာ ဣမေ၊

အဟေတုကေသု စိတ္တေသု၊ အပုညေသု န ဇာယရေ.

၁၀၃. ဧကူနာသီတိယာ စိတ္တေ၊ ပညာ ဇာယတိ သဗ္ဗဒါ၊

အဋ္ဌဝီသတိယာ စိတ္တေ၊ ကရုဏာမုဒိတာ သိယုံ.

၁၀၄. ကာမာဝစရပုညေသု၊ သဗ္ဗလောကုတ္တရေသု စ၊

စတ္တာလီသဝိဓေ စိတ္တေ၊ သာဋ္ဌကေ ဝိရတိတ္တယံ.

၁၀၅. သဒ္ဓါ သတိ ဟိရောတ္တပ္ပံ၊ အလောဘာဒိတ္တယမ္ပိ စ၊

ယုဂဠာနိ ဆ မဇ္ဈတ္တံ၊ ကရုဏာမုဒိတာပိ စ.

၁၀၆. တထာ ဝိရတိယော တိဿော၊ သဗ္ဗေ တေ ပဉ္စဝီသတိ၊

ကုသလာဗျာကတာ စာပိ၊ ကုသလေန ပကာသိတာ.

၁၀၇. အဟိရီကမနောတ္တပ္ပံ၊ မောဟော ဥဒ္ဓစ္စမေဝ စ၊

ဒွါဒသာပုညစိတ္တေသု၊ နိယတာယေဝ ဇာယရေ.

၁၀၈. လောဘော ဒေါသော စ မောဟော စ၊ မာနော ဒိဋ္ဌိ စ သံသယော၊

မိဒ္ဓမုဒ္ဓစ္စကုက္ကုစ္စံ၊ ထိနံ မစ္ဆရိယမ္ပိ စ.

၁၀၉. အဟိရီကမနောတ္တပ္ပံ၊ ဣဿာ စ ဒေါမနဿကံ၊

ဧတေ အကုသလာ ဝုတ္တာ၊ ဧကန္တေန မဟေသိနာ.

၁၁၀. လောဘော အဋ္ဌသု နိဒ္ဒိဋ္ဌော၊ ဝုတ္တာ စတူသု ဒိဋ္ဌိတု၊

မာနော ဒိဋ္ဌိဝိယုတ္တေသု၊ ဒေါသောဒွီသွေဝ ဇာယတေ.

၁၁၁. ဣဿာမစ္ဆေရကုက္ကုစ္စာ၊ ဒွီသု ဇာယန္တိ နော သဟ၊

ဝိစိကိစ္ဆာ ပနေကသ္မိံ၊ ထိနမိဒ္ဓံ တု ပဉ္စသု.

၁၁၂. ဖဿော စ ဝေဒနာ သညာ၊ စေတနာ ဇီဝိတံ မနော၊

ဝိတက္ကော စ ဝိစာရော စ၊ ပီတိ ဝီရိယသမာဓိ စ.

၁၁၃. ဆန္ဒော စေဝါဓိမောက္ခော စ၊ မနသိကာရော စ စုဒ္ဒသ၊

ကုသလာကုသလာ စေဝ၊ ဟောန္တိ အဗျာကတာပိ စ.

၁၁၄. ဧကူနတိံသစိတ္တေသု၊ ဈာနံ ပဉ္စင်္ဂိကံ မတံ၊

စတုဈာနင်္ဂယုတ္တာနိ၊ သတ္တတိံသာတိ နိဒ္ဒိသေ.

၁၁၅. ဧကာဒသဝိဓံ စိတ္တံ၊ တိဝင်္ဂိကမုဒီရိတံ၊

စတုတိံသဝိဓံ စိတ္တံ၊ ဒုဝင်္ဂိကမုဒီရိတံ.

၁၁၆. သဘာဝေနာဝိတက္ကေသု၊ ဈာနင်္ဂါနိ န ဥဒ္ဓရေ၊

သဗ္ဗာဟေတုကစိတ္တေသု၊ မဂ္ဂင်္ဂါနိ န ဥဒ္ဓရေ.

၁၁၇. တီဏိ သောဠသစိတ္တေသု၊ ဣန္ဒြိယာနိ ဝဒေ ဗုဓော၊

ဧကသ္မိံ ပန စတ္တာရိ၊ ပဉ္စ တေရသသုဒ္ဓရေ.

၁၁၈. သတ္တ ဒွါဒသစိတ္တေသု၊ ဣန္ဒြိယာနိ ဇိနောဗြဝိ၊

ဧကေနူနေသု အဋ္ဌေဝ၊ စတ္တာလီသမနေသု စ.

၁၁၉. စတ္တာလီသာယ စိတ္တေသု၊ နဝကံ နာယကောဗြဝိ၊

ဧဝံ ဣန္ဒြိယယောဂေါပိ၊ ဝေဒိတဗ္ဗော ဝိဘာဝိနာ.

၁၂၀. အမဂ္ဂင်္ဂါနိ နာမေတ္ထ၊ အဋ္ဌာရသ အဟေတုကာ၊

ဈာနင်္ဂါနိ န ဝိဇ္ဇန္တိ၊ ဝိညာဏေသု ဒွိပဉ္စသု.

၁၂၁. ဧကံ စိတ္တံ ဒုမဂ္ဂင်္ဂံ၊ တိမဂ္ဂင်္ဂါနိ သတ္တသု၊

စတ္တာလီသာယ စိတ္တေသု၊ မဂ္ဂေါ သော စတုရင်္ဂိကော.

၁၂၂. ပဉ္စဒ္ဒသသု စိတ္တေသု၊ မဂ္ဂေါ ပဉ္စင်္ဂိကော မတော၊

ဝုတ္တော ဒွတ္တိံသစိတ္တေသု၊ မဂ္ဂေါ သတ္တင်္ဂိကောပိ စ.

၁၂၃. မဂ္ဂေါ အဋ္ဌသု စိတ္တေသု၊ မတော အဋ္ဌင်္ဂိကောတိ ဟိ၊

ဧဝံ တု သဗ္ဗစိတ္တေသု၊ မဂ္ဂင်္ဂါနိ သမုဒ္ဓရေ.

၁၂၄. ဗလာနိ ဒွေ ဒွိစိတ္တေသု၊ ဧကသ္မိံ တီဏိ ဒီပယေ၊

ဧကာဒသသု စတ္တာရိ၊ ဆ ဒွါဒသသု နိဒ္ဒိသေ.

၁၂၅. ဧကူနာသီတိယာ သတ္တ၊ သောဠသေဝါဗလာနိ တု၊

စိတ္တမေဝံ တု ဝိညေယျံ၊ သဗလံ အဗလမ္ပိ စ.

၁၂၆. ဈာနင်္ဂမဂ္ဂင်္ဂဗလိန္ဒြိယာနိ၊

စိတ္တေသု ဇာယန္တိ ဟိ ယေသု ယာနိ၊

မယာ သမာသေန သမုဒ္ဓရိတွာ၊

ဝုတ္တာနိ သဗ္ဗာနိပိ တာနိ တေသု.

ဣတိ အဘိဓမ္မာဝတာရေ စေတသိကဝိဘာဂနိဒ္ဒေသော နာမ

တတိယော ပရိစ္ဆေဒေါ.