ဒုတိယော ပရိစ္ဆေဒေါ

၂. ပကိဏ္ဏကကထာ

၄၆. ကုသလာနေကဝီသေဝ၊ ဒွါဒသာကုသလာနိ စ၊

ဆတ္တိံသတိ ဝိပါကာနိ၊ ကြိယာစိတ္တာနိ ဝီသတိ.

၄၇. ကာမေသု စတုပညာသ၊ ရူပေသု ဒသ ပဉ္စ စ၊

ဒွါဒသာရုပ္ပစိတ္တာနိ၊ အဋ္ဌာနုတ္တရမာနသာ.

၄၈. ကာမေ တေဝီသ ပါကာနိ၊ ပုညာပုညာနိ ဝီသတိ၊

ဧကာဒသ ကြိယာ စေတိ၊ စတုပညာသ သဗ္ဗထာ.

၄၉. ပုညပါကကြိယာဘေဒါ၊ တယော ရူပေသု ပဉ္စကာ၊

အာရုပ္ပေတိ စတုက္ကာနိ၊ သတ္တဝီသ မဟဂ္ဂတာ.

၅၀. စတုမဂ္ဂဖလာနံ တု၊ ဝသေနဋ္ဌပိ ဈာနတော၊

ဒသောဘယမ္ပိ မိဿေတွာ၊ တာလီသာနုတ္တရာ သိယုံ.

၅၁. ပုညပါကကြိယာပါပါ၊ သန္တိ ကာမေ မဟဂ္ဂတေ၊

ပါပံ နတ္ထိ ကြိယာပါပါ၊ န ဝိဇ္ဇန္တိ အနုတ္တရေ.

၅၂. ပါပါဟေတုကမုတ္တာနိ၊ အနဝဇ္ဇာနိ သဗ္ဗထာ၊

ဧကူနသဋ္ဌိ စိတ္တာနိ၊ ပုညပါကကြိယာဝသာ.

၅၃. ကမ္မစိတ္တာနိ တေတ္တိံသ၊ ပုညာပုညာနိ သဗ္ဗထာ၊

ဆတ္တိံသ တေသံ ပါကာနိ၊ ကြိယာ ဝီသ န စောဘယံ.

၅၄. စက္ခုဝိညာဏဓာတာဒိ၊ ပဉ္စဝိညာဏနာမကာ၊

ပဉ္စဒွါရာဝဇ္ဇနဉ္စ၊ ဒုဝိဓံ သမ္ပဋိစ္ဆနံ.

၅၅. မနောဓာတုတ္တယံ နာမ၊ ဆသတ္တတိ တတော ပရေ၊

မနောဝိညာဏဓာတူတိ၊ သတ္တဓာ ဓာတုဘေဒတော.

၅၆. မနောဝိညာဏဓာတုဉ္စ၊ မနောဓာတုတ္တယံ တထာ၊

ကတွာ မနောဝိညာဏန္တိ၊ ဆ ဝိညာဏာ ပကိတ္တိတာ.

၅၇. အာဝဇ္ဇနံ ဒဿနဉ္စ၊ သဝနံ ဃာယနံ တထာ၊

သာယနံ ဖုသနဉ္စေဝ၊ သမ္ပဋိစ္ဆနတီရဏံ.

၅၈. ဝေါဋ္ဌဗ္ဗနဉ္စ ဇဝနံ၊ တဒါရမ္မဏနာမကံ၊

ဘဝင်္ဂံ စုတိ သန္ဓီတိ၊ စိတ္တံ စုဒ္ဒသဓာ ဌိတံ.

၅၉. အာဝဇ္ဇနာဒယော ဒွေ ဒွေ၊ ယုဂါ သတ္တ ယထာက္ကမံ၊

တီဏိ တီရဏစိတ္တာနိ၊ ဧကံ ဝေါဋ္ဌဗ္ဗနံ မတံ.

၆၀. ကုသလာကုသလာ သဗ္ဗေ၊ ဖလာ စာဝဇ္ဇနံ ဝိနာ၊

ကြိယာ စ ပဉ္စပညာသ၊ ဇဝနန္တိ ပဝုစ္စရေ.

၆၁. သန္တီရဏမဟာပါကာ၊ တဒါရမ္မဏနာမကာ၊

ဧကာဒသ ပဝတ္တန္တိ၊ ဇဝနာရမ္မဏေ ယတော.

၆၂. မဟဂ္ဂတမဟာပါကာ၊ ဥပေက္ခာတီရဏဒွယံ၊

စုတိသန္ဓိဘဝင်္ဂါနိ၊ စိတ္တာနေကူနဝီသတိ.

၆၃. ဇဝနာဝဇ္ဇနာဒီနိ၊ ဝေါဋ္ဌဗ္ဗသုခတီရဏာ၊

မဟဂ္ဂတမဟာပါကာ၊ ဥပေက္ခာတီရဏာတိ စ.

၆၄. အဋ္ဌသဋ္ဌိ တထာ ဒွေ စ၊ နဝဋ္ဌ ဒွေ ယထာက္ကမံ၊

ဧကဒွိတိစတုပ္ပဉ္စကိစ္စဋ္ဌာနာနိ နိဒ္ဒိသေ.

၆၅. ရူပပါကာ မဟာပါကာ၊ မနောဓာတု စ တီရဏံ၊

ရူပံ ဇနေန္တိ ဧကူနဝီသတိ နေတရဒွယံ.

၆၆. အဘိညာဝဇ္ဇိတာ သဗ္ဗေ၊ အပ္ပနာဇဝနာ ပန၊

ရူပံ ဇနေန္တိ ဆဗ္ဗီသ၊ ပဏာမေန္တိရိယာပထံ.

၆၇. အဘိညာဒွယဝေါဋ္ဌဗ္ဗပရိတ္တဇဝနာ ပန၊

ဒွတ္တိံသ ရူပဝိညတ္တိဣရိယာပထသာဓကာ.

၆၈. ပဉ္စဝိညာဏမာရုပ္ပ-ဝိပါကာ သဗ္ဗသန္ဓိယော၊

စုတိ ခီဏာသဝဿေတိ၊ သောဠသေတေ န ကိဉ္စိပိ.

၆၉. ရူပံ ဇနေန္တိ စိတ္တာနိ၊ သတ္တသတ္တတိ သဗ္ဗထာ၊

အဋ္ဌပညာသ စိတ္တာနိ၊ ပဏာမေန္တိရိယာပထံ.

၇၀. ဒွတ္တိံသ စတုဝိညတ္တိံ၊ သမုဋ္ဌာပေန္တိ မာနသာ၊

န ဇနေန္တိ တဿမ္ပေကံ၊ ယထာဝုတ္တာနိ သောဠသ.

၇၁. သောမနဿသဟဂတာ၊ ပရိတ္တဇဝနာ ပန၊

ဟသနမ္ပိ ဇနေန္တီတိ၊ စတုကိစ္စာနိ တေရသ.

၇၂. သဗ္ဗမ္ပိ ပဉ္စဝေါကာရေ၊ ကိစ္စမေတံ ပကာသိတံ၊

အာရုပ္ပေ ပန သဗ္ဗမ္ပိ၊ ရူပါယတ္တံ န ဝိဇ္ဇတိ.

၇၃. အသညီနံ တု သဗ္ဗာနိ၊ စိတ္တာနေဝ န လဗ္ဘရေ၊

ရူပက္ခန္ဓောဝ တေသံ တု၊ အတ္တဘာဝေါတိ ဝုစ္စတိ.

၇၄. ပါဏာတိပါတထေယျာဒိဝသေနောပစိတံ ပန၊

ဥဒ္ဓစ္စရဟိတာပုညံ၊ စတုရာပါယဘူမိယံ.

၇၅. ဒတွာ သန္ဓိံ ပဝတ္တေ တု၊ ပဉ္စဝေါကာရဘူမိယံ၊

ဥဒ္ဓစ္စသဟိတဉ္စာပိ၊ သတ္တ ပါကာနိ ပစ္စတိ.

၇၆. ဒါနသီလာဒိဘေဒေန၊ ပဝတ္တံ ကုသလံ ပန၊

ကာမေ မာနသမုက္ကဋ္ဌံ၊ စတုက္ကံ တု တိဟေတုကံ.

၇၇. ဒတွာ တိဟေတုကံ သန္ဓိံ၊ ကာမေ သုဂတိယံ ပန၊

သောဠသ ပုညပါကာနိ၊ ပဝတ္တေ တု ဝိပစ္စတိ.

၇၈. တိဟေတုကောမကံ ပုညံ၊ ဥက္ကဋ္ဌဉ္စ ဒွိဟေတုကံ၊

ဒတွာ ဒွိဟေတုကံ သန္ဓိံ၊ ကာမေ သုဂတိယံ တထာ.

၇၉. ပဝတ္တေ ပန ဉာဏေန၊ သမ္ပယုတ္တံ ဝိဝဇ္ဇိယ၊

ဒွါဒသ ပုညပါကာနိ၊ ဝိပစ္စတိ ယထာရဟံ.

၈၀. ဒွိဟေတုကောမကံ ပုညံ၊ ပဋိသန္ဓိမဟေတုကံ၊

ဒေတိ မာနုသကေ စေဝ၊ ဝိနိပါတာသုရေ တထာ.

၈၁. အဋ္ဌာဟေတုကပါကာနိ၊ ပဝတ္တေ တု ဝိပစ္စရေ၊

စတ္တာရိပိ စတုက္ကာနိ၊ ပဉ္စဝေါကာရဘူမိယံ.

၈၂. ဘာဝနာမယပုညံ တု၊ မဟဂ္ဂတမနုတ္တရံ၊

ယထာဘူမိနိယာမေန၊ ဒေတိ ပါကံ ယထာသကံ.

၈၃. ကဋတ္တာရူပပါကာနိ၊ ပဉ္စဝေါကာရဘူမိယံ၊

အာရုပ္ပါနုတ္တရေ ပါကံ၊ တထာ ရူပမသညိသု.

၈၄. ပုညာပုညာနိ ကမ္မာနိ၊ တေတ္တိံသာပိ စ ယဗ္ဗထာ၊

သဉ္ဇနေန္တိ ယထာယောဂံ၊ ပဋိသန္ဓိပဝတ္တိယံ.

ဣတိ စိတ္တဝိဘာဂေ ပကိဏ္ဏကကထာ နိဋ္ဌိတာ.

ဒုတိယော ပရိစ္ဆေဒေါ.