၇. သတ္တမော ပရိစ္ဆေဒေါ
သဗ္ဗသင်္ဂဟဝိဘာဂေါ
၆၁၇. စတုပညာသ ဓမ္မာ ဟိ၊ နာမနာမေန ဘာသိတာ၊
အဋ္ဌာရသဝိဓာ ဝုတ္တာ၊ ရူပဓမ္မာတိ သဗ္ဗထာ.
၆၁၈. အဘိညေယျာ သဘာဝေန၊ ဒွါသတ္တတိ သမီရိတာ၊
သစ္စိကဋ္ဌပရမတ္ထာ၊ ဝတ္ထုဓမ္မာ သလက္ခဏာ.
၆၁၉. တေသံ ဒါနိ ပဝက္ခာမိ၊ သဗ္ဗသင်္ဂါဟိကံ နယံ၊
အာဘိဓမ္မိကဘိက္ခူနံ၊ ဟတ္ထသာရမနုတ္တရံ.
၆၂၀. ဒုကာ တိကာ စ ခန္ဓာယတနတော ဓာတုသစ္စတော၊
ပဋိစ္စသမုပ္ပါဒါ စ၊ ပစ္စယာ စ သမညတော.
၆၂၁. ပစ္စယော ဧဝ နိဗ္ဗာနမပစ္စယမသင်္ခတံ၊
အသင်္ခါရမနုပ္ပါဒံ၊ သဿတံ နိစ္စလက္ခဏံ.
၆၂၂. ပစ္စယာ စေဝ သင်္ခါရာ၊ သင်္ခတာ စ တတောပရေ၊
ဥပ္ပါဒဝယဓမ္မာ စ၊ ပစ္စယဋ္ဌိတိကာ တထာ.
၆၂၃. နိဗ္ဗာနံ ရူပဓမ္မာ စ၊ ဝိပ္ပယုတ္တာဝ ကေဝလံ၊
အာရမ္မဏာ ဧဝ နာမ၊ နာလမ္ဗန္တိ ဟိ ကိဉ္စိပိ.
၆၂၄. ဧကုပ္ပါဒနိရောဓာ စ၊ ဧကာလမ္ဗဏဝတ္ထုကာ၊
သံသဋ္ဌာ သမ္ပယုတ္တာ စ၊ သဟဇာတာ ယထာရဟံ.
၆၂၅. အညမညေနုပတ္ထဒ္ဓါ၊ သဗ္ဗတ္ထ သဟဝုတ္တိနော၊
သာရမ္မဏာရမ္မဏာ စ၊ စိတ္တစေတသိကာ မတာ.
၆၂၆. ဝိပဿနာယ ဘူမီတိ၊ တတ္ထ တေဘူမကာ မတာ၊
လောကိယာ ပရိယာပန္နာ၊ ဝဋ္ဋဓမ္မာ သဥတ္တရာ.
၆၂၇. သက္ကာယဓမ္မာ သဘယာ၊ တီရမောရိမနာမကံ၊
သံယောဇနိယာ သမလာ၊ တထာ နီဝရဏီယကာ.
၆၂၈. သံက္လေသိကာ ပရာမဋ္ဌာ၊ ဥပါဒါနီယသာသဝါ၊
ဩဃနီယာ ယောဂနီယာ၊ ဂန္ထနီယာတိ ဘာသိတာ.
၆၂၉. အညေ အပရိယာပန္နာ၊ ဝိဝဋ္ဋာ စာဝိပဿိယာ၊
လောကုတ္တရာနုတ္တရာ စ၊ နောသံယောဇနိယာဒယော.
၆၃၀. ကမ္မဇာတာ ဥပါဒိန္နာ၊ နာမ ဝုစ္စန္တိ သာသဝါ၊
အနုပါဒိန္နကာ နာမ၊ တတော သေသာ ပဝုစ္စရေ.
၆၃၁. ဓမ္မာ သပ္ပဋိဘာဂါတိ၊ ကုသလာကုသလာ မတာ၊
အပ္ပဋိဘာဂဓမ္မာတိ၊ တဒညေ ပရိဒီပယေ.
၆၃၂. သရဏာ စ ပဟာတဗ္ဗာ၊ ဒွါဒသာကုသလာ ပန၊
တဒညေ အရဏာ နာမ၊ ပဟာတဗ္ဗာ န ကေဟိစိ.
၆၃၃. ရူပိနော ရူပဓမ္မာ စ၊ နာမဓမ္မာ အရူပိနော၊
ဧဝမာဒိပ္ပဘေဒေန၊ ဒွိဓာ ဘေဒံ ဝိဘာဝယေ.
၆၃၄. ဗာလာ ဓမ္မာ တပနီယာ၊ ကဏှာ စ ကဋုကပ္ဖလာ၊
အသေဝိတဗ္ဗာ သာဝဇ္ဇာ၊ ဒွါဒသာကုသလာ မတာ.
၆၃၅. ပဏ္ဍိတာ စာတပနီယာ၊ သုက္ကာ စ သုခဒါယကာ၊
သေဝိတဗ္ဗာနဝဇ္ဇာ စ၊ ကုသလာ ဧကဝီသတိ.
၆၃၆. ကြိယာ ဝိပါကာ ရူပဉ္စ၊ နိဗ္ဗာနန္တိ စတုဗ္ဗိဓာ၊
ဝုတ္တာ အဗျာကတာ နာမ၊ ဓမ္မာ တဗ္ဗိပရီတတော.
၆၃၇. ဟီနာ ဓမ္မာ ပရိတ္တာ စ၊ ကာမာဝစရဘူမိကာ၊
ရူပါရူပါ ပဝုစ္စန္တိ၊ မဇ္ဈိမာ စ မဟဂ္ဂတာ.
၆၃၈. အပ္ပမာဏာ ပဏီတာ စ၊ ဓမ္မာ လောကုတ္တရာ မတာ၊
သံကိလိဋ္ဌသံက္လေသိကာ၊ ဒွါဒသာကုသလာ တထာ.
၆၃၉. အသံကိလိဋ္ဌသံက္လေသိကာ၊ ဓမ္မာ တေဘူမကာပရေ၊
အသံက္လိဋ္ဌာသံက္လေသိကာ၊ နဝ လောကုတ္တရာ သိယုံ.
၆၄၀. ဝိပါကာ တေ ပဝုစ္စန္တိ၊ ဝိပါကာ စတုဘူမကာ၊
ဝိပါကဓမ္မာ နာမာတိ၊ ကုသလာကုသလာ မတာ.
၆၄၁. ကြိယာ ရူပဉ္စ နိဗ္ဗာနံ၊ န ပါကံ န တု ပစ္စတိ၊
အာစယဂါမိနော ဓမ္မာ၊ ပုညာပုညာဝ သာသဝါ.
၆၄၂. ဝုတ္တာပစယဂါမိနော၊ ကုသလာနုတ္တရာ ပန၊
ကြိယာ ရူပဉ္စ နိဗ္ဗာနံ၊ ပါကာ စောဘယဝဇ္ဇိတာ.
၆၄၃. ပဌမာနုတ္တရော မဂ္ဂေါ၊ ဒဿနံ ဘာဝနာပရေ၊
တဒညေ ဒွယနိမ္မုတ္တာ၊ သဗ္ဗေပိ ပရမတ္ထတော.
၆၄၄. သတ္တ လောကုတ္တရာ ဟေဋ္ဌာ၊ ဝုတ္တာ သေက္ခာတိ တာဒိနာ၊
အရဟတ္တဖလမေဝ၊ အသေက္ခန္တိ ပကာသိတံ.
၆၄၅. လောကိယာပိ စ နိဗ္ဗာနံ၊ ဘာသိတောဘယဝဇ္ဇိတာ၊
ဧဝမာဒိပ္ပကာရေဟိ၊ တိဝိဓာတိ ဝိဘာဝယေ.
၆၄၆. အတီတာနာဂတံ ရူပံ၊ ပစ္စုပ္ပန္နမထာပရံ၊
အဇ္ဈတ္တံ ဝါ ဗဟိဒ္ဓါ ဝါ၊ သုခုမောဠာရိကံ တထာ.
၆၄၇. ဟီနံ ပဏီတံ ယံ ဒူရေ၊ သန္တိကေ ဝါ တဒေကတော၊
သဗ္ဗံ ရူပံ သမောဓာယ၊ ရူပက္ခန္ဓောတိ ဝုစ္စတိ.
၆၄၈. တထေဝ ဝေဒနာက္ခန္ဓော၊ နာမ ယာ ကာစိ ဝေဒနာ၊
သညာက္ခန္ဓောတိ သညာ စ၊ ရာသိဘာဝေန ဘာသိတာ.
၆၄၉. ဝဋ္ဋဓမ္မေသု အဿာဒံ၊ တဒဿာဒေါပသေဝနံ၊
ဝိနိဘုဇ္ဇ နိဒဿေတုံ၊ ခန္ဓဒွယမုဒါဟဋံ.
၆၅၀. ဝိဝါဒမူလသံသာရ-ကမဟေတုနိဒဿနံ၊
သန္ဓာယ ဝေဒနာ သညာ၊ ကတာ နာနာတိ ကေစန.
၆၅၁. စိတ္တသံသဋ္ဌဓမ္မာနံ၊ စေတနာမုခတော ပန၊
သင်္ခါရက္ခန္ဓနာမေန၊ ဓမ္မာ စေတသိကာ မတာ.
၆၅၂. သဗ္ဗဘေဒံ တထာ စိတ္တံ၊ ဝိညာဏက္ခန္ဓ သမ္မတံ၊
ဘေဒါဘာဝေန နိဗ္ဗာနံ၊ ခန္ဓသင်္ဂဟနိဿဋံ.
၆၅၃. အာလမ္ဗနီယဘာဝေန၊ ဥပါဒါနောပကာရတော၊
ပဉ္စုပါဒါနက္ခန္ဓာတိ၊ လောကုတ္တရဝိဝဇ္ဇိတာ.
၆၅၄. ယထာ ထူလံ ဟိတတ္ထာယ၊ ပရိဂ္ဂါဟကယောဂိနံ၊
ဓမ္မာ တေဘူမကာ ဧက-ဘူမိဘာဝါယ ဒေသိတာ.
၆၅၅. ဘာဇနံ ဘောဇနံ တဿ၊ ဗျဉ္ဇနံ ဘောဇကော တထာ၊
ဘုဉ္ဇိတာ စာတိ ပဉ္စေတေ၊ ဥပမေန္တိ ယထာက္ကမံ.
၆၅၆. ဂိလာနသာလာ ဂေလညံ၊ အသပ္ပါယောပသေဝနာ၊
သမုဋ္ဌာနံ ဂိလာနောတိ၊ ဥပမေန္တိ စ ပဏ္ဍိတာ.
၆၅၇. စာရကော ကာရဏံ တတ္ထ၊ အပရာဓော စ ကာရကော၊
အပရာဓကတော စောရော၊ ဣတိ စောပမိတာ ပုန.
၆၅၈. နိစ္စာဓိပီဠနဋ္ဌေန၊ ဘာရာတိ ပရိဒီပိတာ၊
က္လေသဒုက္ခမုခေနေတေ၊ ခါဒကာ စ နိရန္တရံ.
၆၅၉. အနတ္ထာဝဟိတာ နိစ္စမုက္ခိတ္တာသိကဝေရိနော၊
မစ္စုမာရာဘိဓေယျတ္တာ၊ ဝဓကာတိ စ ဘာသိတာ.
၆၆၀. ဝိမဒ္ဒါသဟနံ ရူပံ၊ ဖေဏပိဏ္ဍံဝ ဒုဗ္ဗလံ၊
မုဟုတ္တရမဏီယတ္တာ၊ ဝေဒနာ ဗုဗ္ဗုဠူပမာ.
၆၆၁. မရီစိကူပမာ သညာ၊ ဝိပလ္လာသကဘာဝတော၊
သင်္ခါရာပိ စ နိဿာရာ၊ ကဒလိက္ခန္ဓသာဒိသာ.
၆၆၂. နာနပ္ပကာရံ စိန္တေန္တံ၊ နာနာက္လေသဝိမောဟိတံ၊
ပလမ္ဘတီတိ ဝိညာဏံ၊ မာယာသမမုဒီရိတံ.
၆၆၃. ဣစ္စေဝံ ပဉ္စုပါဒါနက္ခန္ဓာ ခန္ဓာ စ ကေဝလံ၊
ပဉ္စက္ခန္ဓာတိ နာမေန၊ ဒေသိတာတိ ဝိဘာဝယေ.
၆၆၄. အဇ္ဈတ္တဉ္စ ဗဟိဒ္ဓါ စ၊ ဝိညာဏုပ္ပတ္တိကာရဏံ၊
ဒွါရာလမ္ဗဏဘေဒေန၊ ဒွေဓာယတနမီရိတံ.
၆၆၅. စက္ခာဒဇ္ဈတ္တိကံ တတ္ထ၊ ဆဒွါရာယတနံ ဘဝေ၊
ဗာဟိရာယတနံ နာမ၊ တထာ ရူပါဒိဂေါစရံ.
၆၆၆. ဣတိ ဝီထိပ္ပဝတ္တာနံ၊ ဒွါရာလမ္ဗဏသင်္ဂဟော၊
အာဂမေ အဘိဓမ္မေ တု၊ သဗ္ဗထာပိ ယထာရဟံ.
၆၆၇. တထာဟနန္တရာတီတော၊ ဇာယမာနဿ ပစ္ဆတော၊
မနော သဗ္ဗောပိ သဗ္ဗဿ၊ မနဿာယတနံ ဘဝေ.
၆၆၈. တထာ ပုဗ္ဗင်္ဂမဋ္ဌေန၊ သဟဇာနမရူပိနံ၊
ဒွါရဘာဝေန ဝိညာဏံ၊ သဗ္ဗမာယတနံ မတံ.
၆၆၉. မနာယတနမိစ္စေဝံ၊ ပသာဒါယတနံ တထာ၊
ပဉ္စဝိညာဏဓမ္မာနံ၊ ဣတိ ဆဒ္ဓါ ဝိဘာဝယေ.
၆၇၀. ပဉ္စပ္ပသာဒဝိသယာ၊ ပဉ္စာယတနသမ္မတာ၊
သေသံ ရူပဉ္စ နိဗ္ဗာနံ၊ သဗ္ဗေ စေတသိကာတိ စ.
၆၇၁. ဧကူနသဋ္ဌိဓမ္မာနံ၊ ဓမ္မာယတနသင်္ဂဟော၊
ဣတိ ဆဒ္ဓါ ပကာသေန္တိ၊ ဗာဟိရာယတနံ ဗုဓာ.
၆၇၂. သုညဂါမောဝ ဒဋ္ဌဗ္ဗ-မဇ္ဈတ္တိကမသာရတော၊
ဂါမဃာတကစောရာဝ၊ တံ ဟနန္တံဝ ဗာဟိရံ.
၆၇၃. နာမပ္ပဝတ္တိမုဠှာနံ၊ တဒုပ္ပတ္တိကကာရဏံ၊
ဒွါဒသာယတနာနီတိ၊ ဝုတ္တမိတ္ထံ မဟေသိနာ.
၆၇၄. သမတ္တာ ဘာဝမတ္တေန၊ ဓာရေန္တီတိ သလက္ခဏံ၊
ဒွါရာလမ္ဗတဒုပ္ပန္န-ပရိယာယေန ဘေဒိတာ.
၆၇၅. မနာယတနမေတ္ထာဟ၊ သတ္တ ဝိညာဏဓာတုယော၊
ဧကာဒသ ယထာဝုတ္တာ၊ ဣစ္စဋ္ဌာရသ ဓာတုယော.
၆၇၆. အန္တာဒိကာ မနောဓာတု၊ မနောဝိညာဏဓာတုယာ၊
ပဝေသာပဂမေ ဒွါရ-ပရိယာယေန တိဋ္ဌတိ.
၆၇၇. ဘေရီတလဒဏ္ဍဃောသ-သမံ ဆက္ကံ ယထာက္ကမံ၊
ကဋ္ဌာရဏိပါဝကာဒိ-သမဉ္စ တိဝိဓံ ဘဝေ.
၆၇၈. ဒုက္ခံ သမုဒယော စေဝ၊ နိရောဓော စ တထာပရော၊
မဂ္ဂေါ စာတိ စတုဒ္ဓါဟ၊ သစ္စံ သစ္စပရက္ကမော.
၆၇၉. ဘာရော စ ဘာရဒါနဉ္စ၊ ဘာရနိက္ခေပနံ တထာ၊
ဘာရနိက္ခေပနူပါယော၊ ဣစ္စောပမ္မံ ယထာက္ကမံ.
၆၈၀. ရောဂေါ ရောဂနိဒါနဉ္စ၊ ရောဂဝူပသမော တထာ၊
ရောဂဘေသဇ္ဇမိစ္စေဝ-မုပမာဟိ စ ဒီပိတံ.
၆၈၁. ဝိသရုက္ခော ရုက္ခမူလံ၊ ရုက္ခစ္ဆေဒေါ တထာပရော၊
ရုက္ခစ္ဆေဒကသတ္ထန္တိ၊ စတုဓောပမိတံ တထာ.
၆၈၂. တီရမောရိမသင်္ခါတံ၊ မဟောဃော ပါရိမံ တထာ၊
တဒတိက္ကမုပါယောတိ၊ ဥပမေန္တိ စ တံ ဗုဓာ.
၆၈၃. သစ္ဆိကတွာန ပစ္စက္ခ-မိစ္စောပမ္မံ ယထာက္ကမံ၊
သမာစိက္ခိ ဝိမောက္ခာယ၊ သစ္စံ တစ္ဆနိယာမတော.
၆၈၄. တထာ ဟိ ဒုက္ခံ နာဗာဓံ၊ နာညံ ဒုက္ခာ စ ဗာဓကံ၊
ဗာဓကတ္တနိယာမေန၊ ဒုက္ခသစ္စမိတီရိတံ.
၆၈၅. တံ ဝိနာ နာညတော ဒုက္ခံ၊ န ဟောတိ န စ တံ တတော၊
ဒုက္ခဟေတုနိယာမေန၊ သစ္စမာဟ ဝိသတ္တိကံ.
၆၈၆. နာညာ နိဗ္ဗာနတော သန္တိ၊ န စ သန္တံ န တံ ယတော၊
သန္တဘာဝနိယာမေန၊ နိဗ္ဗာနံ သစ္စမုတ္တမံ.
၆၈၇. နာညံ မဂ္ဂါစ နိယျာနံ၊ အနိယျာနော န စာပိ သော၊
တသ္မာ နိယျာနဘာဝေန၊ မဂ္ဂေါ သစ္စန္တိ သမ္မတော.
၆၈၈. ဣတိ တစ္ဆာဝိပလ္လာသ-ဘူတဘာဝေါ စတူသုပိ၊
သစ္စဋ္ဌောတိ ဝိနိဒ္ဒိဋ္ဌော၊ ဒုက္ခာဒီသွဝိသေသတော.
၆၈၉. ပီဠနဋ္ဌော သင်္ခတဋ္ဌော၊ သန္တာပဋ္ဌော စ ဘာသိတော၊
ဝိပရီဏာမဋ္ဌော စာတိ၊ ဒုက္ခဿေဝံ စတုဗ္ဗိဓာ.
၆၉၀. အာယူဟနာ နိဒါနာ စ၊ သံယောဂါ ပလိဗောဓတော၊
ဒုက္ခဿမုဒယဿာပိ၊ စတုဓတ္ထာ ပကာသိတာ.