၅. ပဉ္စမော ပရိစ္ဆေဒေါ
ကမ္မဝိဘာဂေါ
၃၂၈. ဝိဘာဂံ ပန ကမ္မာနံ၊
ပဝက္ခာမိ ဣတော ပရံ၊
ကမ္မပါကကြိယာဘေဒေ၊
အမောဟာယ သမာသတော.
၃၂၉. ကမ္မပစ္စယကမ္မန္တိ၊ စေတနာဝ သမီရိတာ၊
တတ္ထာပိ နာနက္ခဏိကာ၊ ပုညာပုညာဝ စေတနာ.
၃၃၀. ဒေတိ ပါကမဓိဋ္ဌာယ၊ သမ္ပယုတ္တေ ယထာရဟံ၊
ကမ္မဿာယူဟနဋ္ဌေန၊ ပဝတ္တတ္တာ ဟိ စေတနာ.
၃၃၁. က္လေသာနုသယသန္တာနေ၊ ပါကဓမ္မာ ဟိ ဇာယရေ၊
ပဟီနာနုသယာနံ တု၊ ကြိယာမတ္တံ ပဝတ္တတိ.
၃၃၂. မူလဘာဝါ စ သဗ္ဗေသံ၊ တထေဝါဝဇ္ဇနဒွယံ၊
ဇနိတာနိ စ ကမ္မေဟိ၊ ဝိပါကာနိ ပဝတ္တရေ.
၃၃၃. စိတ္တုပ္ပါဒဝသေနေဝ၊ ကမ္မံ တေတ္တိံသဓာ ဌိတံ၊
ကမ္မစတုက္ကဘေဒေဟိ၊ ဝိဘာဝေယျ ဝိစက္ခဏော.
၃၃၄. ပစ္စုပ္ပန္နာဒိကဏှာဒိ-ဇနကာဒိဂရာဒိတော၊
ဒိဋ္ဌဓမ္မာဒိကာမာဒိ-ဘေဒါ ဆဓာ ယထာက္ကမံ.
၃၃၅. ယံ ပါပံ သုခဝေါကိဏ္ဏံ၊ အကိစ္ဆေန ကရီယတိ၊
ပစ္စုပ္ပန္နသုခံ ကမ္မံ၊ အာယတိံ ဒုက္ခပါကဇံ.
၃၃၆. ကိစ္ဆေန ဒုက္ခဝေါကိဏ္ဏံ၊ ယဒိ ပါပံ ကရီယတိ၊
ပစ္စုပ္ပန္နေ စ တံ ဒုက္ခံ၊ အာယတိံ ဒုက္ခပါကဇံ.
၃၃၇. ကိစ္ဆေန ဒုက္ခဝေါကိဏ္ဏံ၊ ယဒိ ပုညံ ကရီယတိ၊
ပစ္စုပ္ပန္နမှိ တံ ဒုက္ခံ၊ အာယတိံ သုခပါကဇံ.
၃၃၈. ယံ ပုညံ သုခဝေါကိဏ္ဏံ၊ အကိစ္ဆေန ကရီယတိ၊
ပစ္စုပ္ပန္နသုခဉ္စေဝ၊ အာယတိံ သုခပါကဇံ.
၃၃၉. ဝိသသံသဋ္ဌမဓုရံ၊ သဝိသံ တိတ္တကံ တထာ၊
ဂေါမုတ္တမဓုဘေသဇ္ဇ-မိစ္စောပမ္မံ ယထာက္ကမံ.
၃၄၀. သမာဒါနေ ဝိပါကေ စ၊ သုခဒုက္ခပ္ပဘေဒိတံ၊
ကမ္မမေဝံ စတုဒ္ဓါတိ၊ ပကာသေန္တိ တထာဂတာ.
၃၄၁. အာနန္တရိယကမ္မာဒိ၊ ဧကန္တကဋုကာဝဟံ၊
ကဏှံ ကဏှဝိပါကန္တိ၊ ကမ္မံ ဒုဂ္ဂတိဂါမိကံ.
၃၄၂. ပဌမဇ္ဈာနကမ္မာဒိ၊ ဧကန္တေန သုခါဝဟံ၊
သုက္ကံ သုက္ကဝိပါကန္တိ၊ ကမ္မံ သဂ္ဂူပပတ္တိကံ.
၃၄၃. ဝေါကိဏ္ဏကမ္မ ဝေါကိဏ္ဏ-သုခဒုက္ခူပပတ္တိကံ၊
ကဏှသုက္ကံ ကဏှသုက္က-ဝိပါကန္တိ သမီရိတံ.
၃၄၄. အကဏှသုက္ကမီရေန္တိ၊ အကဏှသုက္ကပါကဒံ၊
ကမ္မံ လောကုတ္တရံ လောကေ၊ ဂတိကမ္မက္ခယာဝဟံ.
၃၄၅. ဣတိ ဝဋ္ဋပ္ပဝတ္တမှိ၊ က္လေသဝေါဒါနဘေဒိတံ၊
ကမ္မက္ခယေန သင်္ဂယှ၊ စတုဓာ ကမ္မမီရိတံ.
၃၄၆. ဇနကဉ္စေဝုပတ္ထမ္ဘ-မုပပီဠောပဃာတကံ၊
စတုဓာ ကိစ္စဘေဒေန၊ ကမ္မမေဝံ ပဝုစ္စတိ.
၃၄၇. ဇနေတိ ဇနကံ ပါကံ၊ တံ ဆိန္ဒတုပပီဠကံ၊
တံ ပဝတ္တေတုပတ္ထမ္ဘံ၊ တံ ဃာတေတောပဃာတကံ.
၃၄၈. ကရောတိ အတ္တနော ပါက-ဿာဝကာသန္တိ ဘာသိတံ၊
ပါကဒါယကကမ္မံ တု၊ ယံ ကိဉ္စိ ဇနကံ ဘဝေ.
၃၄၉. ဗာဓမာနကကမ္မံ တု၊ တံ ပါကမုပပီဠကံ၊
ဥပဃာတကမီရေန္တိ၊ တဒုပစ္ဆေဒကံပရေ.
၃၅၀. ဂရုကာသန္နမာစိဏ္ဏံ၊ ကဋတ္တာကမ္မုနာ သဟ၊
ကမ္မံ စတုဗ္ဗိဓံ ပါက-ပရိယာယပ္ပဘေဒတော.
၃၅၁. မဟဂ္ဂတာနန္တရိယံ၊ ဂရုကမ္မန္တိ ဝုစ္စတိ၊
ကတံ စိန္တိတမာသန္န-မာသန္နမရဏေန တု.
၃၅၂. ဗာဟုလ္လေန သမာစိဏ္ဏမာစိဏ္ဏန္တိ ပဝုစ္စတိ၊
သေသံ ပုညမပုညဉ္စ၊ ကဋတ္တာကမ္မမီရိတံ.
၃၅၃. ဒိဋ္ဌဓမ္မေ ဝေဒနီယမုပပဇ္ဇာပရေ တထာ၊
ပရိယာယဝေဒနီယမိတိ စာဟောသိကမ္မုနာ.
၃၅၄. ပါကကာလဝသေနာထ၊ ကာလာတီတဝသေန စ၊
စတုဓေဝမ္ပိ အက္ခာတံ၊ ကမ္မမာဒိစ္စဗန္ဓုနာ.
၃၅၅. ဒိဋ္ဌဓမ္မေ ဝေဒနီယံ၊ ပဌမံ ဇဝနံ ဘဝေ၊
အလဒ္ဓါသေဝနတ္တာဝ၊ အသမတ္ထံ ဘဝန္တရေ.
၃၅၆. ဝေဒနီယံ တုပပဇ္ဇပရိယောသာနမီရိတံ၊
ပရိနိဋ္ဌိတကမ္မတ္တာ၊ ဝိပစ္စတိ အနန္တရေ.
၃၅၇. သေသာနိ ဝေဒနီယာနိ၊ ပရိယာယာပရေ ပန၊
လဒ္ဓါသေဝနတော ပါကံ၊ ဇနေန္တိ သတိ ပစ္စယေ.
၃၅၈. ဝုစ္စန္တာဟောသိကမ္မာနိ၊ ကာလာတီတာနိ သဗ္ဗထာ၊
ဥစ္ဆိန္နတဏှာမူလာနိ၊ ပစ္စယာလာဘတော တထာ.
၃၅၉. စတုဓာ ပုန ကာမာဒိဘူမိဘေဒေန ဘာသိတံ၊
ပုညာပုညဝသာ ဒွေဓာ၊ ကာမာဝစရိကံ ဘဝေ.
၃၆၀. အပုညံ တတ္ထ သာဝဇ္ဇ-မနိဋ္ဌဖလဒါယကံ၊
တံ ကမ္မဖဿဒွါရေဟိ၊ ဒုဝိဓံ သမ္ပဝတ္တတိ.+
၃၆၁. ကာယဒွါရံ ဝစီဒွါရံ၊ မနောဒွါရန္တိ တာဒိနာ၊
ကမ္မဒွါရတ္တယံ ဝုတ္တံ၊ ဖဿဒွါရာ ဆ ဒီပိတာ.
၃၆၂. ကမ္မဒွါရေ မနောဒွါရေ၊ ပဉ္စဒွါရာ သမောဟိတာ၊
ဖဿဒွါရမနောဒွါရံ၊ ကမ္မဒွါရတ္တယံ ကတံ.
၃၆၃. တထာ ဟိ ကာယဝိညတ္တိံ၊ ဇနေတွာ ဇာတစေတနာ၊
ကာယကမ္မံ ဝစီကမ္မံ၊ ဝစီဘေဒပဝတ္တိကာ.
၃၆၄. ဝိညတ္တိဒွယသမ္ပတ္တာ၊ မနောကမ္မန္တိ ဝုစ္စတိ၊
ဘေဒေါယံ ပရိယာယေန၊ ကမ္မာနမိတိ ဒီပိတော.
၃၆၅. ပါဏဃာတာဒိကံ ကမ္မံ၊ ကာယေ ဗာဟုလ္လဝုတ္တိတော၊
ကာယကမ္မံ ဝစီကမ္မံ၊ မုသာဝါဒါဒိကံ တထာ.
၃၆၆. အဘိဇ္ဈာဒိ မနောကမ္မံ၊ တီသု ဒွါရေသု ဇာယတိ၊
ဒွီသု ဒွါရေသု သေသာနိ၊ ဘေဒေါယံ ပရမတ္ထတော.
၃၆၇. ဖဿဒွါရမနောဒွါရေ၊ ဝိညတ္တိဒွယမီရိတံ၊
ပဉ္စဒွါရေ ဒွယံ နတ္ထိ၊ အယမေတ္ထ ဝိနိစ္ဆယော.
၃၆၈. အက္ခန္တိဉာဏ ကောသဇ္ဇံ၊ ဒုဿိလျံ မုဋ္ဌသစ္စတာ၊
ဣစ္စာသံဝရဘေဒေန၊ အဋ္ဌဒွါရေသု ဇာယတိ.
၃၆၉. ကမ္မဒွါရတ္တယဉ္စေဝ၊ ပဉ္စဒွါရာ တထာပရေ၊
အသံဝရာနံ ပဉ္စန္နံ၊ အဋ္ဌ ဒွါရာ ပကာသိတာ.
၃၇၀. တတ္ထ ကမ္မပထပ္ပတ္တံ၊ ပဋိသန္ဓိဖလာဝဟံ၊
ပါဏဃာတာဒိဘေဒေန၊ ဒသဓာ သမ္ပဝတ္တတိ.
၃၇၁. ပါဏာတိပါတော ဖရုသံ၊ ဗျာပါဒေါ စ တထာပရော၊
ဣစ္စေဝံ တိဝိဓံ ကမ္မံ၊ ဒေါသမူလေဟိ ဇာယတိ.
၃၇၂. မိစ္ဆာစာရော အဘိဇ္ဈာ စ၊ မိစ္ဆာဒိဋ္ဌိ တထာပရာ၊
ဣစ္စေဝံ တိဝိဓံ ကမ္မံ၊ လောဘမူလေဟိ ဇာယတိ.
၃၇၃. ထေယျာဒါနံ မုသာဝါဒေါ၊ ပိသုဏံ သမ္ဖလာပနံ၊
ကမ္မံ စတုဗ္ဗိဓမ္မေတံ၊ ဒွိမူလေဟိ ပဝတ္တတိ.
၃၇၄. ဆန္ဒာဒေါသာ ဘယာ မောဟာ၊ ပါပံ ကုဗ္ဗန္တိ ပါဏိနော၊
တသ္မာ ဆန္ဒာဒိဘေဒေန၊ စတ္တာလီသဝိဓံ ဘဝေ.
၃၇၅. ဣစ္စာပုညံ ပကာသေန္တိ၊ စတုရာပါယသာဓကံ၊
အညတ္ထာပိ ပဝတ္တမှိ၊ ဝိပတ္တိဖလသာဓနံ.
၃၇၆. တိဝိဓံ ပန ပုညံ တု၊ အနဝဇ္ဇိဋ္ဌပါကဒံ၊
ဒါနံ သီလံ ဘာဝနာ စ၊ တီသု ဒွါရေသု ဇာယတိ.
၃၇၇. မဟတ္တဂါရဝါ သ္နေဟာ၊ ဒယာ သဒ္ဓုပကာရတော၊
ဘောဂဇီဝါဘယဓမ္မံ၊ ဒဒတော ဒါနမီရိတံ.
၃၇၈. ပုညမာစာရဝါရိတ္တ-ဝတ္တမာရဗ္ဘ ကုဗ္ဗတော၊
ပါပါ စ ဝိရမန္တဿ၊ ဟောတိ သီလမယံ တဒါ.
၃၇၉. ဒါနသီလဝိနိမုတ္တံ၊ ဘာဝနာတိ ပဝုစ္စတိ၊
ပုညံ ဘာဝေန္တိ သန္တာနေ၊ ယသ္မာ တေန ဟိတာဝဟံ.
၃၈၀. ဇနေတွာ ကာယဝိညတ္တိံ၊ ယဒါ ပုညံ ကရီယတိ၊
ကာယကမ္မံ တဒါ ဟောတိ၊ ဒါနံ သီလဉ္စ ဘာဝနာ.
၃၈၁. ဝစီဝိညတ္တိယာ သဒ္ဓိံ၊ ယဒါ ပုညံ ကရီယတိ၊
ဝစီကမ္မံ မနောကမ္မံ၊ ဝိနာ ဝိညတ္တိယာ ကတံ.
၃၈၂. တံတံဒွါရိကမေဝါဟု၊ တံတံဒွါရိကပါပတော၊
ဝိရမန္တဿ ဝိညတ္တိံ၊ ဝိနာ ဝါ သဟ ဝါ ပုန.
၃၈၃. ဒါနံ သီလံ ဘာဝနာ စ၊ ဝေယျာဝစ္စာပစာယနာ၊
ပတ္တာနုမောဒနာ ပတ္တိ-ဒါနံ ဓမ္မဿ ဒေသနာ၊
သဝနံ ဒိဋ္ဌိဇုကမ္မ-မိစ္စေဝံ ဒသဓာ ဌိတံ.
၃၈၄. ကာမပုညံ ပကာသေန္တိ၊ ကာမေ သုဂတိသာဓကံ၊
အညတ္ထာပိ ပဝတ္တမှိ၊ သမ္ပတ္တိဖလသာဓကံ.
၃၈၅. စိတ္တုပ္ပါဒပ္ပဘေဒေန၊ ကမ္မံ ဝီသတိဓာ ဌိတံ၊
ကာမာဝစရမိစ္စေဝံ၊ ဝိဘာဝေန္တိ ဝိဘာဝိနော.
၃၈၆. ရူပါဝစရိကံ ကမ္မ-မပ္ပနာဘာဝနာမယံ၊
ကသိဏာဒိကမာရဗ္ဘ၊ မနောဒွါရေ ပဝတ္တတိ.
၃၈၇. ပထဝါပေါ စ တေဇော စ၊
ဝါယော နီလဉ္စ ပီတကံ၊
လောဟိတောဒါတမာကာသံ၊
အာလောကောတိ ဝိသာရဒါ.
၃၈၈. ကသိဏာနိ ဒသီရေန္တိ၊ အာဒိကမ္မိကယောဂိနော၊
ဥဒ္ဓုမာတံ ဝိနီလဉ္စ၊ ဝိပုဗ္ဗကံ ဝိခါဒိတံ.
၃၈၉. ဝိစ္ဆိဒ္ဒကဉ္စ ဝိက္ခိတ္တံ၊ ဟတဝိက္ခိတ္တလောဟိတံ၊
ပုဠဝံ အဋ္ဌိကဉ္စေတိ၊ အသုဘံ ဒသဓာ ဌိတံ.
၃၉၀. ဗုဒ္ဓေ ဓမ္မေ စ သံဃေ စ၊ သီလေ စာဂေ စ အတ္တနော၊
ဒေဝတောပသမာယဉ္စ၊ ဝုတ္တာနုဿတိဘာဝနာ.
၃၉၁. မရဏေ သတိ နာမေကာ၊ တထာ ကာယဂတာသတိ၊
အာနာပါနသတိစ္စေဝံ၊ ဒသဓာနုဿတီရိတာ.
၃၉၂. မေတ္တာ ကရုဏာ မုဒိတာ၊ ဥပေက္ခာ ဘာဝနာတိ စ၊
စတုဗြဟ္မဝိဟာရာ စ၊ အပ္ပမညာတိ ဘာသိတာ.
၃၉၃. အာဟာရေ တု ပဋိက္ကူလ-သညေကာတိ ပကာသိတာ၊
စတုဓာတုဝဝတ္ထာနံ၊ စတုဓာတုပရိဂ္ဂဟော.
၃၉၄. စတ္တာရောရုပ္ပကာ စေတိ၊ စတ္တာလီသ သမာသတော၊
ကမ္မဋ္ဌာနာနိ ဝုတ္တာနိ၊ သမထေ ဘာဝနာနယေ.
၃၉၅. အာနာပါနဉ္စ ကသိဏံ၊ ပဉ္စကဇ္ဈာနိကံ တဟိံ၊
ပဌမဇ္ဈာနိကာ ဝုတ္တာ၊ ကောဋ္ဌာသာသုဘဘာဝနာ.
၃၉၆. မေတ္တာဒယော စတုဇ္ဈာနာ၊ ဥပေက္ခာ ပဉ္စမီ မတာ၊
အာရုပ္ပါရုပ္ပကာ သေသာ၊ ဥပစာရသမာဓိကာ.
၃၉၇. ကသိဏာသုဘကောဋ္ဌာသေ၊
အာနာပါနေ စ ဇာယတိ၊
ပဋိဘာဂေါ တမာရဗ္ဘ၊
တတ္ထ ဝတ္တတိ အပ္ပနာ.
၃၉၈. ကမ္မဋ္ဌာနေသု သေသေသု၊ ပဋိဘာဂေါ န ဝိဇ္ဇတိ၊