၁. ပဌမော ပရိစ္ဆေဒေါ

နာမတ္တယဝိဘာဂေါ

၃. တတ္ထ စိတ္တံ စေတသိကံ၊ နိဗ္ဗာနန္တိ မတံ တိဓာ၊

နာမံ ရူပံ တု ဒုဝိဓံ၊ ဘူတောပါဒါယဘေဒတော.

၄. ကာမဘူမာဒိဘေဒေန၊ တတ္ထ စိတ္တံ စတုဗ္ဗိဓံ၊

စေတောယုတ္တာ ဒွိပညာသ၊ ဓမ္မာ စေတသိကာ မတာ.

၅. စက္ခုသောတဃာနဇိဝှါ-ကာယဝိညာဏဓာတုယော၊

သမ္ပဋိစ္ဆနစိတ္တဉ္စ၊ တထာ သန္တီရဏဒွယံ.

၆. သောမနဿသဟဂတံ၊ ဥပေက္ခာသဟိတန္တိ စ၊

ဣစ္စာဟေတုကစိတ္တာနိ၊ ပုညပါကာနိ အဋ္ဌဓာ.

၇. သောမနဿယုတံ တတ္ထ၊ ဟိတွာ သန္တီရဏံ တထာ၊

သတ္တာကုသလပါကာနိ၊ တာနေဝါတိ ဝိနိဒ္ဒိသေ.

၈. ပဉ္စဒွါရမနောဒွါရာဝဇ္ဇနံ ဟသနန္တိ စ၊

ကြိယစိတ္တမုဒီရိတံ၊ တိဝိဓမ္ပိ အဟေတုကံ.

၉. ဧဝံ အဋ္ဌာရသဝိဓံ၊ မာနသံ ဟောတိဟေတုကံ၊

မူလဘေဒေနာကုသလံ၊ စိတ္တံ တု တိဝိဓံ မတံ.

၁၀. သောမနဿသဟဂတံ၊ ဥပေက္ခာသဟိတံ တထာ၊

ဒိဋ္ဌိဂတသမ္ပယုတ္တံ၊ ဝိပ္ပယုတ္တန္တိ ဘေဒိတံ.

၁၁. အသင်္ခါရံ သသင်္ခါရမိတိ ဘိန္နံ ပနဋ္ဌဓာ၊

လောဘမူလံ ပကာသေန္တိ၊ တတ္ထာကုသလမာနသံ.

၁၂. ဒေါမနဿသဟဂတံ၊ ပဋိဃေန သမာယုတံ၊

ဒေါသမူလမသင်္ခါရံ၊ သသင်္ခါရန္တိပိ ဒွိဓာ.

၁၃. ဝိစိကိစ္ဆာသဟဂတံ၊ ဥဒ္ဓစ္စသဟိတန္တိ စ၊

မောဟမူလဉ္စ ဒုဝိဓံ၊ ဥပေက္ခာယ သမာယုတံ.

၁၄. ဒွါဒသာကုသလာနေဝံ၊ စိတ္တာနီတိ ဝိဘာဝယေ၊

ဟိတွာဟေတုကပါပါနိ၊ သောဘနာနိ တတော ပရံ.

၁၅. သောမနဿသဟဂတံ၊ ဥပေက္ခာသဟိတံ တထာ၊

ဒွိဓာ ဉာဏေန သံယုတ္တံ၊ ဝိပ္ပယုတ္တန္တိ ဘေဒိတံ.

၁၆. အသင်္ခါရံ သသင်္ခါရမိတိ ဘိန္နံ ပနဋ္ဌဓာ၊

သဟေတုကာမာဝစရ-ပုညပါကကြိယာ ဘဝေ.

၁၇. ကာမေ တေဝီသ ပါကာနိ၊ ပုညာပုညာနိ ဝီသတိ၊

ဧကာဒသ ကြိယာ စေတိ၊ စတုပညာသ သဗ္ဗထာ.

၁၈. တက္ကစာရပီတိသုခေကဂ္ဂတာသဟိတံ ပန၊

ပဌမဇ္ဈာနကုသလံ၊ ဝိပါကဉ္စ ကြိယာ တထာ.

၁၉. ဒုတိယံ တက္ကတော ဟီနံ၊ တတိယံ တု ဝိစာရတော၊

စတုတ္ထံ ပီတိတော ဟီနံ၊ ဥပေက္ခေကဂ္ဂတာယုတံ.

၂၀. ပဉ္စမံ ပဉ္စဒသဓာ၊ ရူပါဝစရမီရိတံ၊

ပဉ္စမဇ္ဈာနမေဝေကမရူပါဝစရံ ပန.

၂၁. အာကာသာနဉ္စာယတနံ၊ ပုညပါကကြိယာ တထာ၊

ဝိညာဏဉ္စာယတနဉ္စ၊ အာကိဉ္စညာယတနကံ၊

နေဝသညာနာသညာယတနံ ဒွါဒသဓာ ဘဝေ.

၂၂. သောတာပတ္တိမဂ္ဂစိတ္တံ၊ ဖလစိတ္တံ တထာပရံ၊

သကဒါဂါမာနာဂါမိ၊ အရဟတ္တန္တိ အဋ္ဌဓာ.

၂၃. ဈာနင်္ဂယောဂဘေဒေန၊ ကတွေကေကံ တု ပဉ္စဓာ၊

ဝိတ္ထာရာနုတ္တရံ စိတ္တံ၊ စတ္တာလီသဝိဓံ ဘဝေ.

၂၄. ရူပါဝစရစိတ္တာနိ၊ ဂယှန္တာနုတ္တရာနိ စ၊

ပဌမာဒိဇ္ဈာနဘေဒေ၊ အာရုပ္ပဉ္စာပိ ပဉ္စမေ.

၂၅. ဒွါဒသာကုသလာနေဝံ၊ ကုသလာနေကဝီသတိ၊

ဆတ္တိံသေဝ ဝိပါကာနိ၊ ကြိယစိတ္တာနိ ဝီသတိ.

၂၆. ဧကဝီသသတံ ဝါထ၊ ဧကူနနဝုတီဝိဓံ၊

စိတ္တံ တံသမ္ပယောဂေန၊ ဘိန္နာ စေတသိကာ တထာ.

၂၇. ဖဿော စ ဝေဒနာ သညာ၊ စေတနေကဂ္ဂတာ တထာ၊

ဇီဝိတံ မနသီကာရော၊ သဗ္ဗသာဓာရဏာ မတာ.

၂၈. တက္ကစာရာဓိမောက္ခာ စ၊ ဝီရိယံ ဆန္ဒပီတိယော၊

ပကိဏ္ဏကာ ဆ အက္ခာတာ၊ တေရသညသမာနတာ.

၂၉. ပကိဏ္ဏကာ န ဝိညာဏေ၊ ဝိတက္ကော ဒုတိယာဒိသု၊

ဝိစာရော တတိယာဒိမှိ၊ အဓိမောက္ခော တု ကင်္ခိတေ.

၃၀. သန္တီရဏမနောဓာတုတ္တိကေသု ဝီရိယံ တထာ၊

စတုတ္ထသုခိတေ ပီတိ၊ ဆန္ဒောဟေတုမှိ မောမုဟေ.

၃၁. ဆသဋ္ဌိ ပဉ္စပညာသ၊ ဧကာဒသ စ သောဠသ၊

သတ္တတိ ဝီသတိ စေဝ၊ တာနိ စိတ္တာနိ ဒီပယေ.

၃၂. မောဟာဟိရိကာနောတ္တပ္ပ-မုဒ္ဓစ္စံ သဗ္ဗပါပဇံ၊

ဣဿာမစ္ဆေရကုက္ကုစ္စဒေါသာ တု ပဋိဃေ တထာ.

၃၃. လောဘော လောဘေ တု ဒိဋ္ဌိ စ၊ ဒိဋ္ဌိယုတ္တေ ဝိယုတ္တကေ၊

မာနော စ ထိနမိဒ္ဓံ တု၊ သသင်္ခါရေသု ပဉ္စသု.

၃၄. ကင်္ခိတေ ဝိစိကိစ္ဆာတိ၊ စုဒ္ဒသာကုသလာနိမေ၊

ဒွါဒသာကုသလေသွေဝ၊ နိယမေန ဝဝတ္ထိတာ.

၃၅. သဒ္ဓါ သတိ ဟိရောတ္တပ္ပံ၊ အလောဘာဒေါသမဇ္ဈတာ၊

ကာယစိတ္တာနံ ပဿဒ္ဓိ၊ လဟုတာ မုဒုတာ တထာ.

၃၆. ကမ္မညတာ စ ပါဂုညဥဇုတာတိ ယုဂါ ဆ စ၊

ဧကူနဝီသတိ ဓမ္မာ၊ အညမညာဝိယောဂိနော၊

ဧကူနသဋ္ဌိစိတ္တေသု၊ သောဘနေသု ပဝတ္တိတာ.

၃၇. သမ္မာဝါစာ စ ကမ္မန္တာဇီဝါတိ ဝိရတီ ဣမာ၊

လောကုတ္တရေ သဒါ သဗ္ဗာ၊ သဟ ကာမသုဘေ ဝိသုံ.

၃၈. ကရုဏာမုဒိတာ နာနာ၊ ရူပေ ပဉ္စမဝဇ္ဇိတေ၊

ကဒါစိ ကာမေ ကုသလေ၊ ကြိယစိတ္တေ သဟေတုကေ.

၃၉. တိဟေတုကေသု စိတ္တေသု၊ ပညာ သဗ္ဗတ္ထ လဗ္ဘတိ၊

ဧတေ သဒ္ဓါဒယော ဓမ္မာ၊ ပဉ္စဝီသတိ သောဘနာ.

၄၀. ဣဿာမစ္ဆေရကုက္ကုစ္စဝိရတီကရုဏာဒယော၊

နာနာ ကဒါစိ မာနော စ၊ ထိနမိဒ္ဓံ တထာ သဟ.

၄၁. သတ္တ သဗ္ဗတ္ထ ဇာယန္တိ၊ ဆ တု ဓမ္မာ ယထာရဟံ၊

စုဒ္ဒသာကုသလေသွေဝ၊ သောဘနေသွေဝ သောဘနာ.

၄၂. ဒွေပညာသ ပနိစ္စေဝံ၊ ဓမ္မေ သင်္ဂယှ မာနသေ၊

လဗ္ဘမာနေ ဝိဘာဝေယျ၊ ပစ္စေကမ္ပိ ဝိစက္ခဏော.

၄၃. သောဘနညသမာနာ စ၊ ပဌမေ ဝိရတီ ဝိနာ၊

ဒုတိယာဒီသု တက္ကဉ္စ၊ ဝိစာရံ တတိယာဒိသု.

၄၄. စတုတ္ထာဒီသု ပီတိဉ္စ၊ ကရုဏာဒိဉ္စ ပဉ္စမေ၊

ဟိတွာ နေဝ ဝိယောဇေယျ၊ သင်္ခိပိတွာန ပဉ္စဓာ.

၄၅. ပဉ္စတိံသ စတုတ္တိံသ၊ တေတ္တိံသ စ ယထာက္ကမံ၊

ဒွတ္တိံသ တိံသ ဧဝါထ၊ ဇာယန္တီတိ မဟဂ္ဂတေ.

၄၆. ဂဟေတွာ ဝိရတီ သဗ္ဗာ၊ ဟိတွာန ကရုဏာဒယော၊

ပဌမေ ဒုတိယာဒိမှိ၊ ဝိတက္ကာဒိံ ဝိနာ တထာ.

၄၇. ပဉ္စဓာဝ ဂဏေယျေဝံ၊ ဆတ္တိံသာ စ ယထာက္ကမံ၊

ပဉ္စတိံသ စတုတ္တိံသ၊ တေတ္တိံသဒွယမုတ္တရေ.

၄၈. သောဘနညသမာနာ စ၊ ကာမေသု ကုသလေ ကြိယေ၊

ဟိတွာ ဝိရတိယော ပါကေ၊ ဝိရတီကရုဏာဒယော.

၄၉. ဉာဏယုတ္တေ သောမနဿေ၊ ဝိယုတ္တေ ဉာဏဝဇ္ဇိတာ၊

ဥပေက္ခကေ ပီတိဟီနာ၊ ဝိပ္ပယုတ္တေ ဒွယံ ဝိနာ.

၅၀. စတုဓာ တိဝိဓေသွေဝံ၊ ဝိဂဏေယျ ဒွယံ ဒွယံ၊

န သန္တုပေက္ခာသဟိတေ၊ ကရုဏာဒီတိ ကေစန.

၅၁. အဋ္ဌတိံသ သတ္တတိံသဒွယံ ဆတ္တိံသကံ သုဘေ၊

ပဉ္စတိံသ စတုတ္တိံသဒွယံ တေတ္တိံသကံ ကြိယေ.

၅၂. တေတ္တိံသ ပါကေ ဒွတ္တိံသဒွယေကတိံသကံ ဘဝေ၊

သဟေတုကာမာဝစရပုညပါကကြိယာမနေ.

၅၃. မောဟာဒယော သမာနာ စ၊ ပဌမေ လောဘဒိဋ္ဌိယာ၊

တတိယေ လောဘမာနေန၊ ဇာယန္တေကူနဝီသတိ.

၅၄. အဋ္ဌာရသ ပီတိဟီနာ၊ ပဉ္စမေ သတ္တမေ တထာ၊

နဝမေ ဒေါသကုက္ကုစ္စမစ္ဆရိဿာဟိ ဝီသတိ.

၅၅. ပဌမာဒီသု ဝုတ္တာဝ၊ ဒုတိယာဒီသု ဇာယရေ၊

ထိနမိဒ္ဓေနေကဝီသ၊ ဝီသ ဒွေဝီသတိက္ကမာ.

၅၆. ဆန္ဒပီတိံ ဝိနုဒ္ဓစ္စေ၊ ကင်္ခိတေ နိစ္ဆယံ ဝိနာ၊

ပဉ္စဒသေဝ ကင်္ခါယ၊ အသုဘေသု ဝိဘာဝယေ.

၅၇. သိတေ သမာနာ နိစ္ဆန္ဒာ၊ ဒွါဒသေကာဒသေဝ တု၊

ပီတိံ ဟိတွာန ဝေါဋ္ဌဗ္ဗေ၊ ဝီရိယံ သုခတီရဏေ.

၅၈. ဒွယံ ဟိတွာ မနောဓာတု၊ ဥပေက္ခာတီရဏေ ဒသ၊

သတ္တ သာဓာရဏာ ဧဝ၊ ပဉ္စဝိညာဏသမ္ဘဝါ.

၅၉. ဣတိ စေတသိ သမ္ဘူတာ၊

ဒွေပညာသ ယထာရဟံ၊

ဉေယျာ စေတသိကာ ဓမ္မာ၊

စေတောဘေဒပ္ပဘေဒိနော.

၆၀. သုညတဉ္စာနိမိတ္တဉ္စ၊ တထာပဏိဟိတန္တိ စ၊

တိဝိဓာကာရမီရေန္တိ၊ နိဗ္ဗာနမမတံ ဗုဓာ.

၆၁. ယံ အာရဗ္ဘ ပဝတ္တန္တံ၊ တတ္ထာနုတ္တရမာနသံ၊

သုညတာဒိဝိမောက္ခောတိ၊ နာမမာလမ္ဗတော လဘေ.

၆၂. သောပါဒိသေသနိဗ္ဗာနဓာတု စေဝ တထာပရာ၊

အနုပါဒိသေသာ စာတိ၊ ဒုဝိဓာ ပရိယာယတော.

၆၃. တဒေတံ ဝါနနိက္ခန္တမစ္စန္တံ သန္တိလက္ခဏံ၊

အဿာသကရဏရသံ၊ ခေမဘာဝေန ဂယှတိ.

၆၄. တံ နာမေတီတိ နိဗ္ဗာနံ၊ နမန္တီတိ တတောပရေ၊

တေပညာသာတိ နာမာနိ၊ စတုပညာသ သဗ္ဗထာ.

၆၅. စိတ္တစေတသိကယောဇနာနယံ၊

စိတ္တမုတ္တမမိဒံ ပကာသိတံ၊

သာဓု စေတသိ နိဓာယ ပဏ္ဍိတာ၊

သာဓု သာသနဓရာ ဘဝန္တိ တေ.

၆၆. ဗုဒ္ဓပ္ပဝတ္တမဝဂါဟိတဗောဓိဉာဏ-

မိစ္စာဘိဓမ္မမဝဂါဟိတသဗ္ဗဓမ္မံ၊

ဩဂယှ နာမဂတရာသိမသေသယိတွာ၊

သင်္ဂယှ သဗ္ဗမိဓ ယောဇိတမာဒရေန.

ဣတိ နာမရူပပရိစ္ဆေဒေ နာမတ္တယဝိဘာဂေါ နာမ

ပဌမော ပရိစ္ဆေဒေါ.