ကလာပယောဇနာဝဏ္ဏနာ

၄၅. ယသ္မာ ပနေတာနိ ရူပါနိ ကမ္မာဒိတော ဥပ္ပဇ္ဇမာနာနိပိ န ဧကေကံ သမုဋ္ဌဟန္တိ၊ အထ ခေါ ပိဏ္ဍတောဝ. တသ္မာ ပိဏ္ဍာနံ ဂဏနပရိစ္ဆေဒံ၊ သရူပဉ္စ ဒဿေတုံ ‘‘ဧကုပ္ပါဒါ’’တျာဒိ ဝုတ္တံ. သဟဝုတ္တိနောတိ ဝိသုံ ဝိသုံ ကလာပဂတရူပဝသေန သဟဝုတ္တိနော၊ န သဗ္ဗကလာပါနံ အညမညံ သဟုပ္ပတ္တိဝသေန.

၄၆. ဒသ ပရိမာဏာ အဿာတိ ဒသကံ၊ သမုဒါယဿေတံ နာမံ၊ စက္ခုနာ ဥပလက္ခိတံ၊ တပ္ပဓာနံ ဝါ ဒသကံ စက္ခုဒသကံ. ဧဝံ သေသေသုပိ.

၄၇. ဝစီဝိညတ္တိဂ္ဂဟဏေန သဒ္ဒေါပိ သင်္ဂဟိတော ဟောတိ တဿာ တဒဝိနာဘာဝတောတိ ဝုတ္တံ ‘‘ဝစီဝိညတ္တိဒသက’’န္တိ.

၅၀. ကိံ ပနေတေ ဧကဝီသတိ ကလာပါ သဗ္ဗေပိ သဗ္ဗတ္ထ ဟောန္တိ၊ ဥဒါဟု ကေစိ ကတ္ထစီတိ အာဟ ‘‘တတ္ထာ’’တျာဒိ.

ကလာပယောဇနာဝဏ္ဏနာ နိဋ္ဌိတာ.