၃. ဓာတုကထာမာတိကာ

နယမာတိကာ

သင်္ဂဟော အသင်္ဂဟော (ဓာတု. ၁). သင်္ဂဟိတေန အသင်္ဂဟိတံ. အသင်္ဂဟိတေန သင်္ဂဟိတံ. သင်္ဂဟိတေန သင်္ဂဟိတံ. အသင်္ဂဟိတေန အသင်္ဂဟိတံ. သမ္ပယောဂေါ ဝိပ္ပယောဂေါ. သမ္ပယုတ္တေန ဝိပ္ပယုတ္တံ. ဝိပ္ပယုတ္တေန သမ္ပယုတ္တံ. သမ္ပယုတ္တေန သမ္ပယုတ္တံ. ဝိပ္ပယုတ္တေန ဝိပ္ပယုတ္တံ. သင်္ဂဟိတေန သမ္ပယုတ္တံ ဝိပ္ပယုတ္တံ. သမ္ပယုတ္တေန သင်္ဂဟိတံ အသင်္ဂဟိတံ. အသင်္ဂဟိတေန သမ္ပယုတ္တံ ဝိပ္ပယုတ္တံ. ဝိပ္ပယုတ္တေန သင်္ဂဟိတံ အသင်္ဂဟိတံ.

အဗ္ဘန္တရမာတိကာ

ပဉ္စက္ခန္ဓာ. ဒွါဒသာယတနာနိ. အဋ္ဌာရသ ဓာတုယော. စတ္တာရိ သစ္စာနိ. ဗာဝီသတိန္ဒြိယာနိ. ပဋိစ္စသမုပ္ပါဒေါ. စတ္တာရော သတိပဋ္ဌာနာ. စတ္တာရော သမ္မပ္ပဓာနာ. စတ္တာရော ဣဒ္ဓိပါဒါ. စတ္တာရိ ဈာနာနိ. စတဿော အပ္ပမညာယော. ပဉ္စိန္ဒြိယာနိ. ပဉ္စ ဗလာနိ. သတ္တ ဗောဇ္ဈင်္ဂါ. အရိယော အဋ္ဌင်္ဂိကော မဂ္ဂေါ. ဖဿော ဝေဒနာ သညာ စေတနာ စိတ္တံ အဓိမောက္ခော မနသိကာရော.

နယမုခမာတိကာ

တီဟိ သင်္ဂဟော. တီဟိ အသင်္ဂဟော. စတူဟိ သမ္ပယောဂေါ. စတူဟိ ဝိပ္ပယောဂေါ.

လက္ခဏမာတိကာ

သဘာဂေါ. ဝိသဘာဂေါ.

ဗာဟိရမာတိကာ

သဗ္ဗာပိ ဓမ္မသင်္ဂဏီ ဓာတုကထာယ မာတိကာတိ.

ဓာတုကထာမာတိကာ နိဋ္ဌိတာ.