၁. ဓမ္မသင်္ဂဏီမာတိကာ

တိကမာတိကာ

ကုသလာ ဓမ္မာ (ဓ. သ. တိကမာတိကာ ၁-၂၂)၊ အကုသလာ ဓမ္မာ၊ အဗျာကတာ ဓမ္မာ. သုခါယ ဝေဒနာယ သမ္ပယုတ္တာ ဓမ္မာ၊ ဒုက္ခာယ ဝေဒနာယ သမ္ပယုတ္တာ ဓမ္မာ၊ အဒုက္ခမသုခါယ ဝေဒနာယ သမ္ပယုတ္တာ ဓမ္မာ. ဝိပါကာ ဓမ္မာ၊ ဝိပါကဓမ္မဓမ္မာ၊ နေဝဝိပါကနဝိပါကဓမ္မဓမ္မာ. ဥပါဒိဏ္ဏုပါဒါနိယာ ဓမ္မာ၊ အနုပါဒိဏ္ဏုပါဒါနိယာ ဓမ္မာ၊ အနုပါဒိဏ္ဏအနုပါဒါနိယာ ဓမ္မာ. သံကိလိဋ္ဌသံကိလေသိကာ ဓမ္မာ၊ အသံကိလိဋ္ဌသံကိလေသိကာ ဓမ္မာ၊ အသံကိလိဋ္ဌအသံကိလေသိကာ ဓမ္မာ. သဝိတက္ကသဝိစာရာ ဓမ္မာ၊ အဝိတက္ကဝိစာရမတ္တာ ဓမ္မာ၊ အဝိတက္ကအဝိစာရာ ဓမ္မာ. ပီတိသဟဂတာ ဓမ္မာ၊ သုခသဟဂတာ ဓမ္မာ၊ ဥပေက္ခာသဟဂတာ ဓမ္မာ. ဒဿနေန ပဟာတဗ္ဗာ ဓမ္မာ၊ ဘာဝနာယ ပဟာတဗ္ဗာ ဓမ္မာ၊ နေဝ ဒဿနေန န ဘာဝနာယ ပဟာတဗ္ဗာ ဓမ္မာ. ဒဿနေန ပဟာတဗ္ဗဟေတုကာ ဓမ္မာ၊ ဘာဝနာယ ပဟာတဗ္ဗဟေတုကာ ဓမ္မာ၊ နေဝ ဒဿနေန န ဘာဝနာယ ပဟာတဗ္ဗဟေတုကာ ဓမ္မာ. အာစယဂါမိနော ဓမ္မာ၊ အပစယဂါမိနော ဓမ္မာ၊ နေဝါစယဂါမိနာပစယဂါမိနော ဓမ္မာ. သေက္ခာ ဓမ္မာ၊ အသေက္ခာ ဓမ္မာ၊ နေဝသေက္ခနာသေက္ခာ ဓမ္မာ. ပရိတ္တာ ဓမ္မာ၊ မဟဂ္ဂတာ ဓမ္မာ၊ အပ္ပမာဏာ ဓမ္မာ. ပရိတ္တာရမ္မဏာ ဓမ္မာ၊ မဟဂ္ဂတာရမ္မဏာ ဓမ္မာ၊ အပ္ပမာဏာရမ္မဏာ ဓမ္မာ. ဟီနာ ဓမ္မာ၊ မဇ္ဈိမာ ဓမ္မာ၊ ပဏီတာ ဓမ္မာ. မိစ္ဆတ္တနိယတာ ဓမ္မာ၊ သမ္မတ္တနိယတာ ဓမ္မာ၊ အနိယတာ ဓမ္မာ. မဂ္ဂါရမ္မဏာ ဓမ္မာ၊ မဂ္ဂဟေတုကာ ဓမ္မာ၊ မဂ္ဂါဓိပတိနော ဓမ္မာ. ဥပ္ပန္နာ ဓမ္မာ၊ အနုပ္ပန္နာ ဓမ္မာ၊ ဥပ္ပါဒိနော ဓမ္မာ. အတီတာ ဓမ္မာ၊ အနာဂတာ ဓမ္မာ၊ ပစ္စုပ္ပန္နာ ဓမ္မာ. အတီတာရမ္မဏာ ဓမ္မာ၊ အနာဂတာရမ္မဏာ ဓမ္မာ၊ ပစ္စုပ္ပန္နာရမ္မဏာ ဓမ္မာ. အဇ္ဈတ္တာ ဓမ္မာ၊ ဗဟိဒ္ဓါ ဓမ္မာ၊ အဇ္ဈတ္တဗဟိဒ္ဓါ ဓမ္မာ. အဇ္ဈတ္တာရမ္မဏာ ဓမ္မာ၊ ဗဟိဒ္ဓါရမ္မဏာ ဓမ္မာ၊ အဇ္ဈတ္တဗဟိဒ္ဓါရမ္မဏာ ဓမ္မာ. သနိဒဿနသပ္ပဋိဃာ ဓမ္မာ၊ အနိဒဿနသပ္ပဋိဃာ ဓမ္မာ၊ အနိဒဿနအပ္ပဋိဃာ ဓမ္မာ (ဓ. သ. တိကမာတိကာ ၁-၂၂).

ဒွါဝီသတိတိကံ.

ဒုကမာတိကာ

ဟေတုဂေါစ္ဆကံ

ဟေတူ ဓမ္မာ၊ န ဟေတူ ဓမ္မာ. သဟေတုကာ ဓမ္မာ၊ အဟေတုကာ ဓမ္မာ. ဟေတုသမ္ပယုတ္တာ ဓမ္မာ၊ ဟေတုဝိပ္ပယုတ္တာ ဓမ္မာ. ဟေတူ စေဝ ဓမ္မာ သဟေတုကာ စ၊ သဟေတုကာ စေဝ ဓမ္မာ န စ ဟေတူ. ဟေတူ စေဝ ဓမ္မာ ဟေတုသမ္ပယုတ္တာ စ၊ ဟေတုသမ္ပယုတ္တာ စေဝ ဓမ္မာ န စ ဟေတူ. န ဟေတူ ခေါ ပန ဓမ္မာ သဟေတုကာပိ၊ အဟေတုကာပိ. ဟေတုဂေါစ္ဆကံ.

စူဠန္တရဒုကံ

သပ္ပစ္စယာ ဓမ္မာ၊ အပ္ပစ္စယာ ဓမ္မာ. သင်္ခတာ ဓမ္မာ၊ အသင်္ခတာ ဓမ္မာ. သနိဒဿနာ ဓမ္မာ၊ အနိဒဿနာ ဓမ္မာ. သပ္ပဋိဃာ ဓမ္မာ၊ အပ္ပဋိဃာ ဓမ္မာ. ရူပိနော ဓမ္မာ၊ အရူပိနော ဓမ္မာ. လောကိယာ ဓမ္မာ၊ လောကုတ္တရာ ဓမ္မာ. ကေနစိ ဝိညေယျာ ဓမ္မာ၊ ကေနစိ န ဝိညေယျာ ဓမ္မာ. စူဠန္တရဒုကံ.

အာသဝဂေါစ္ဆကံ

အာသဝါ ဓမ္မာ၊ နော အာသဝါ ဓမ္မာ. သာသဝါ ဓမ္မာ၊ အနာသဝါ ဓမ္မာ. အာသဝသမ္ပယုတ္တာ ဓမ္မာ၊ အာသဝဝိပ္ပယုတ္တာ ဓမ္မာ. အာသဝါ စေဝ ဓမ္မာ သာသဝါ စ၊ သာသဝါ စေဝ ဓမ္မာ နော စ အာသဝါ. အာသဝါ စေဝ ဓမ္မာ အာသဝသမ္ပယုတ္တာ စ၊ အာသဝသမ္ပယုတ္တာ စေဝ ဓမ္မာ နော စ အာသဝါ. အာသဝဝိပ္ပယုတ္တာ ခေါ ပန ဓမ္မာ သာသဝါပိ၊ အနာသဝါပိ. အာသဝဂေါစ္ဆကံ.

သညောဇနဂေါစ္ဆကံ

သညောဇနာ ဓမ္မာ၊ နော သညောဇနာ ဓမ္မာ. သညောဇနိယာ ဓမ္မာ၊ အသညောဇနိယာ ဓမ္မာ. သညောဇနသမ္ပယုတ္တာ ဓမ္မာ၊ သညောဇနဝိပ္ပယုတ္တာ ဓမ္မာ. သညောဇနာ စေဝ ဓမ္မာ သညောဇနိယာ စ၊ သညောဇနိယာ စေဝ ဓမ္မာ နော စ သညောဇနာ. သညောဇနာ စေဝ ဓမ္မာ သညောဇနသမ္ပယုတ္တာ စ၊ သညောဇနသမ္ပယုတ္တာ စေဝ ဓမ္မာ နော စ သညောဇနာ. သညောဇနဝိပ္ပယုတ္တာ ခေါ ပန ဓမ္မာ သညောဇနိယာပိ၊ အသညောဇနိယာပိ. သညောဇနဂေါစ္ဆကံ.

ဂန္ထဂေါစ္ဆကံ

ဂန္ထာ ဓမ္မာ၊ နော ဂန္ထာ ဓမ္မာ. ဂန္ထနိယာ ဓမ္မာ၊ အဂန္ထနိယာ ဓမ္မာ. ဂန္ထသမ္ပယုတ္တာ ဓမ္မာ၊ ဂန္ထဝိပ္ပယုတ္တာ ဓမ္မာ. ဂန္ထာ စေဝ ဓမ္မာ ဂန္ထနိယာ စ၊ ဂန္ထနိယာ စေဝ ဓမ္မာ နော စ ဂန္ထာ. ဂန္ထာ စေဝ ဓမ္မာ ဂန္ထသမ္ပယုတ္တာ စ၊ ဂန္ထသမ္ပယုတ္တာ စေဝ ဓမ္မာ နော စ ဂန္ထာ. ဂန္ထဝိပ္ပယုတ္တာ ခေါ ပန ဓမ္မာ ဂန္ထနိယာပိ၊ အဂန္ထနိယာပိ. ဂန္ထဂေါစ္ဆကံ.

ဩဃဂေါစ္ဆကံ

ဩဃာ ဓမ္မာ၊ နော ဩဃာ ဓမ္မာ. ဩဃနိယာ ဓမ္မာ၊ အနောဃနိယာ ဓမ္မာ. ဩဃသမ္ပယုတ္တာ ဓမ္မာ၊ ဩဃဝိပ္ပယုတ္တာ ဓမ္မာ. ဩဃာ စေဝ ဓမ္မာ ဩဃနိယာ စ၊ ဩဃနိယာ စေဝ ဓမ္မာ နော စ ဩဃာ. ဩဃာ စေဝ ဓမ္မာ ဩဃသမ္ပယုတ္တာ စ၊ ဩဃသမ္ပယုတ္တာ စေဝ ဓမ္မာ နော စ ဩဃာ. ဩဃဝိပ္ပယုတ္တာ ခေါ ပန ဓမ္မာ ဩဃနိယာပိ၊ အနောဃနိယာပိ. ဩဃဂေါစ္ဆကံ.

ယောဂဂေါစ္ဆကံ

ယောဂါ ဓမ္မာ၊ နော ယောဂါ ဓမ္မာ. ယောဂနိယာ ဓမ္မာ၊ အယောဂနိယာ ဓမ္မာ. ယောဂသမ္ပယုတ္တာ ဓမ္မာ၊ ယောဂဝိပ္ပယုတ္တာ ဓမ္မာ. ယောဂါ စေဝ ဓမ္မာ ယောဂနိယာ စ၊ ယောဂနိယာ စေဝ ဓမ္မာ နော စ ယောဂါ. ယောဂါ စေဝ ဓမ္မာ ယောဂသမ္ပယုတ္တာ စ၊ ယောဂသမ္ပယုတ္တာ စေဝ ဓမ္မာ နော စ ယောဂါ. ယောဂဝိပ္ပယုတ္တာ ခေါ ပန ဓမ္မာ ယောဂနိယာပိ၊ အယောဂနိယာပိ. ယောဂဂေါစ္ဆကံ.

နီဝရဏဂေါစ္ဆကံ

နီဝရဏာ ဓမ္မာ၊ နော နီဝရဏာ ဓမ္မာ. နီဝရဏိယာ ဓမ္မာ၊ အနီဝရဏိယာ ဓမ္မာ. နီဝရဏသမ္ပယုတ္တာ ဓမ္မာ၊ နီဝရဏဝိပ္ပယုတ္တာ ဓမ္မာ. နီဝရဏာ စေဝ ဓမ္မာ နီဝရဏိယာ စ၊ နီဝရဏိယာ စေဝ ဓမ္မာ နော စ နီဝရဏာ. နီဝရဏာ စေဝ ဓမ္မာ နီဝရဏသမ္ပယုတ္တာ စ၊ နီဝရဏသမ္ပယုတ္တာ စေဝ ဓမ္မာ နော စ နီဝရဏာ. နီဝရဏဝိပ္ပယုတ္တာ ခေါ ပန ဓမ္မာ နီဝရဏိယာပိ၊ အနီဝရဏိယာပိ. နီဝရဏဂေါစ္ဆကံ.

ပရာမာသဂေါစ္ဆကံ

ပရာမာသာ ဓမ္မာ၊ နော ပရာမာသာ ဓမ္မာ. ပရာမဋ္ဌာ ဓမ္မာ၊ အပရာမဋ္ဌာ ဓမ္မာ. ပရာမာသသမ္ပယုတ္တာ ဓမ္မာ၊ ပရာမာသဝိပ္ပယုတ္တာ ဓမ္မာ. ပရာမာသာ စေဝ ဓမ္မာ ပရာမဋ္ဌာ စ၊ ပရာမဋ္ဌာစေဝ ဓမ္မာ နော စ ပရာမာသာ. ပရာမာသဝိပ္ပယုတ္တာ ခေါ ပန ဓမ္မာ ပရာမဋ္ဌာပိ၊ အပရာမဋ္ဌာပိ. ပရာမာသဂေါစ္ဆကံ.

မဟန္တရဒုကံ

သာရမ္မဏာ ဓမ္မာ၊ အနာရမ္မဏာ ဓမ္မာ. စိတ္တာ ဓမ္မာ၊ နော စိတ္တာ ဓမ္မာ. စေတသိကာ ဓမ္မာ၊ အစေတသိကာ ဓမ္မာ. စိတ္တသမ္ပယုတ္တာ ဓမ္မာ၊ စိတ္တဝိပ္ပယုတ္တာ ဓမ္မာ. စိတ္တသံသဋ္ဌာ ဓမ္မာ၊ စိတ္တဝိသံသဋ္ဌာ ဓမ္မာ. စိတ္တသမုဋ္ဌာနာ ဓမ္မာ၊ နော စိတ္တသမုဋ္ဌာနာ ဓမ္မာ. စိတ္တသဟဘုနော ဓမ္မာ၊ နော စိတ္တသဟဘုနော ဓမ္မာ. စိတ္တာနုပရိဝတ္တိနော ဓမ္မာ၊ နော စိတ္တာနုပရိဝတ္တိနော ဓမ္မာ. စိတ္တသံသဋ္ဌသမုဋ္ဌာနာ ဓမ္မာ၊ နော စိတ္တသံသဋ္ဌသမုဋ္ဌာနာ ဓမ္မာ. စိတ္တသံသဋ္ဌသမုဋ္ဌာနသဟဘုနော ဓမ္မာ၊ နော စိတ္တသံသဋ္ဌသမုဋ္ဌာနသဟဘုနော ဓမ္မာ. စိတ္တသံသဋ္ဌသမုဋ္ဌာနာနုပရိဝတ္တိနော ဓမ္မာ၊ နော စိတ္တသံသဋ္ဌသမုဋ္ဌာနာနုပရိဝတ္တိနော ဓမ္မာ. အဇ္ဈတ္တိကာ ဓမ္မာ၊ ဗာဟိရာ ဓမ္မာ. ဥပါဒါ ဓမ္မာ၊ နော ဥပါဒါ ဓမ္မာ. ဥပါဒိဏ္ဏာ ဓမ္မာ၊ အနုပါဒိဏ္ဏာ ဓမ္မာ. မဟန္တရဒုကံ.

ဥပါဒါနဂေါစ္ဆကံ

ဥပါဒါနာ ဓမ္မာ၊ နော ဥပါဒါနာ ဓမ္မာ. ဥပါဒါနိယာ ဓမ္မာ၊ အနုပါဒါနိယာ ဓမ္မာ. ဥပါဒါနသမ္ပယုတ္တာ ဓမ္မာ၊ ဥပါဒါနဝိပ္ပယုတ္တာ ဓမ္မာ. ဥပါဒါနာ စေဝ ဓမ္မာ ဥပါဒါနိယာ စ၊ ဥပါဒါနိယာ စေဝ ဓမ္မာ နော စ ဥပါဒါနာ. ဥပါဒါနာ စေဝ ဓမ္မာ ဥပါဒါနသမ္ပယုတ္တာ စ၊ ဥပါဒါနသမ္ပယုတ္တာ စေဝ ဓမ္မာ နော စ ဥပါဒါနာ. ဥပါဒါနဝိပ္ပယုတ္တာ ခေါ ပန ဓမ္မာ ဥပါဒါနိယာပိ၊ အနုပါဒါနိယာပိ. ဥပါဒါနဂေါစ္ဆကံ.

ကိလေသဂေါစ္ဆကံ

ကိလေသာ ဓမ္မာ၊ နော ကိလေသာ ဓမ္မာ. သံကိလေသိကာ ဓမ္မာ၊ အသံကိလေသိကာ ဓမ္မာ. သံကိလိဋ္ဌာ ဓမ္မာ၊ အသံကိလိဋ္ဌာ ဓမ္မာ. ကိလေသသမ္ပယုတ္တာ ဓမ္မာ၊ ကိလေသဝိပ္ပယုတ္တာ ဓမ္မာ. ကိလေသာ စေဝ ဓမ္မာ သံကိလေသိကာ စ၊ သံကိလေသိကာ စေဝ ဓမ္မာ နော စ ကိလေသာ. ကိလေသာ စေဝ ဓမ္မာ သံကိလိဋ္ဌာ စ၊ သံကိလိဋ္ဌာ စေဝ ဓမ္မာ နော စ ကိလေသာ. ကိလေသာ စေဝ ဓမ္မာ ကိလေသသမ္ပယုတ္တာ စ၊ ကိလေသသမ္ပယုတ္တာ စေဝ ဓမ္မာ နော စ ကိလေသာ. ကိလေသဝိပ္ပယုတ္တာ ခေါ ပန ဓမ္မာ သံကိလေသိကာပိ၊ အသံကိလေသိကာပိ. ကိလေသဂေါစ္ဆကံ.

ပိဋ္ဌိဒုကံ

ဒဿနေန ပဟာတဗ္ဗာ ဓမ္မာ၊ န ဒဿနေန ပဟာတဗ္ဗာ ဓမ္မာ. ဘာဝနာယ ပဟာတဗ္ဗာ ဓမ္မာ၊ န ဘာဝနာယ ပဟာတဗ္ဗာ ဓမ္မာ. ဒဿနေန ပဟာတဗ္ဗဟေတုကာ ဓမ္မာ၊ န ဒဿနေန ပဟာတဗ္ဗဟေတုကာ ဓမ္မာ. ဘာဝနာယ ပဟာတဗ္ဗဟေတုကာ ဓမ္မာ၊ န ဘာဝနာယ ပဟာတဗ္ဗဟေတုကာ ဓမ္မာ. သဝိတက္ကာ ဓမ္မာ၊ အဝိတက္ကာ ဓမ္မာ. သဝိစာရာ ဓမ္မာ၊ အဝိစာရာ ဓမ္မာ. သပ္ပီတိကာ ဓမ္မာ၊ အပ္ပီတိကာ ဓမ္မာ. ပီတိသဟဂတာ ဓမ္မာ၊ န ပီတိသဟဂတာ ဓမ္မာ. သုခသဟဂတာ ဓမ္မာ၊ န သုခသဟဂတာ ဓမ္မာ. ဥပေက္ခာသဟဂတာ ဓမ္မာ၊ န ဥပေက္ခာသဟဂတာ ဓမ္မာ. ကာမာဝစရာ ဓမ္မာ၊ န ကာမာဝစရာ ဓမ္မာ. ရူပါဝစရာ ဓမ္မာ၊ န ရူပါဝစရာ ဓမ္မာ. အရူပါဝစရာ ဓမ္မာ၊ န အရူပါဝစရာ ဓမ္မာ. ပရိယာပန္နာ ဓမ္မာ၊ အပရိယာပန္နာ ဓမ္မာ. နိယျာနိကာ ဓမ္မာ၊ အနိယျာနိကာ ဓမ္မာ. နိယတာ ဓမ္မာ၊ အနိယတာ ဓမ္မာ. သဥတ္တရာ ဓမ္မာ၊ အနုတ္တရာ ဓမ္မာ. သရဏာ ဓမ္မာ၊ အရဏာ ဓမ္မာ. ပိဋ္ဌိဒုကံ.

အဘိဓမ္မဒုကမာတိကာ.

သုတ္တန္တိကဒုကမာတိကာ

ဝိဇ္ဇာဘာဂိနော ဓမ္မာ၊ အဝိဇ္ဇာဘာဂိနော ဓမ္မာ. ဝိဇ္ဇူပမာ ဓမ္မာ၊ ဝဇိရူပမာ ဓမ္မာ. ဗာလာ ဓမ္မာ၊ ပဏ္ဍိတာ ဓမ္မာ. ကဏှာ ဓမ္မာ၊ သုက္ကာ ဓမ္မာ. တပနီယာ ဓမ္မာ၊ အတပနီယာ ဓမ္မာ. အဓိဝစနာ ဓမ္မာ၊ အဓိဝစနပထာ ဓမ္မာ. နိရုတ္တိ ဓမ္မာ၊ နိရုတ္တိပထာ ဓမ္မာ. ပညတ္တိ ဓမ္မာ၊ ပညတ္တိပထာ ဓမ္မာ. နာမဉ္စ၊ ရူပဉ္စ. အဝိဇ္ဇာ စ၊ ဘဝတဏှာ စ. ဘဝဒိဋ္ဌိ စ၊ ဝိဘဝဒိဋ္ဌိ စ. သဿတဒိဋ္ဌိ စ၊ ဥစ္ဆေဒဒိဋ္ဌိ စ. အန္တဝါ ဒိဋ္ဌိ စ၊ အနန္တဝါ ဒိဋ္ဌိ စ. ပုဗ္ဗန္တာနုဒိဋ္ဌိ စ၊ အပရန္တာနုဒိဋ္ဌိ စ. အဟိရိကဉ္စ၊ အနောတ္တပ္ပဉ္စ. ဟိရီ စ၊ ဩတ္တပ္ပဉ္စ. ဒေါဝစဿတာ စ၊ ပါပမိတ္တတာ စ. သောဝစဿတာ စ၊ ကလျာဏမိတ္တတာ စ. အာပတ္တိကုသလတာ စ၊ အာပတ္တိဝုဋ္ဌာနကုသလတာ စ. သမာပတ္တိကုသလတာ စ၊ သမာပတ္တိဝုဋ္ဌာနကုသလတာ စ. ဓာတုကုသလတာ စ၊ မနသိကာရကုသလတာ စ. အာယတနကုသလတာ စ၊ ပဋိစ္စသမုပ္ပါဒကုသလတာ စ. ဌာနကုသလတာ စ၊ အဋ္ဌာနကုသလတာ စ. အဇ္ဇဝေါ စ၊ မဒ္ဒဝေါ စ. ခန္တိ စ၊ သောရစ္စဉ္စ. သာခလျဉ္စ၊ ပဋိသန္ထာရော စ. ဣန္ဒြိယေသု အဂုတ္တဒွါရတာ စ၊ ဘောဇနေ အမတ္တညုတာ စ. ဣန္ဒြိယေသု ဂုတ္တဒွါရတာ စ၊ ဘောဇနေ မတ္တညုတာ စ. မုဋ္ဌဿစ္စဉ္စ၊ အသမ္ပဇညဉ္စ. သတိ စ၊ သမ္ပဇညဉ္စ. ပဋိသင်္ခါနဗလဉ္စ၊ ဘာဝနာဗလဉ္စ. သမထော စ၊ ဝိပဿနာ စ. သမထနိမိတ္တဉ္စ၊ ပဂ္ဂါဟနိမိတ္တဉ္စ. ပဂ္ဂါဟော စ၊ အဝိက္ခေပေါ စ. သီလဝိပတ္တိ စ၊ ဒိဋ္ဌိဝိပတ္တိ စ. သီလသမ္ပဒါ စ၊ ဒိဋ္ဌိသမ္ပဒါ စ. သီလဝိသုဒ္ဓိ စ၊ ဒိဋ္ဌိဝိသုဒ္ဓိ စ. ဒိဋ္ဌိဝိသုဒ္ဓိ ခေါ ပန၊ ယထာဒိဋ္ဌိဿ စ ပဓာနံ. သံဝေဂေါ စ သံဝေဇနိယေသု ဌာနေသု၊ သံဝိဂ္ဂဿ စ ယောနိသော ပဓာနံ. အသန္တုဋ္ဌိတာ စ ကုသလေသု ဓမ္မေသု၊ အပ္ပဋိဝါနိတာ စ ပဓာနသ္မိံ. ဝိဇ္ဇာ စ၊ ဝိမုတ္တိ စ. ခယေ ဉာဏံ၊ အနုပ္ပါဒေ ဉာဏန္တိ.

သုတ္တန္တိကဒုကမာတိကာ.

ဓမ္မသင်္ဂဏီမာတိကာ နိဋ္ဌိတာ.