၁၂. ဒုတိယသိင်္ဂါလသုတ္တံ

၂၃၄. သာဝတ္ထိယံ ဝိဟရတိ။ပေ။ ‘‘အဿုတ္ထ နော တုမှေ၊ ဘိက္ခဝေ၊ ရတ္တိယာ ပစ္စူသသမယံ ဇရသိင်္ဂါလဿ ဝဿမာနဿာ’’တိ? ‘‘ဧဝံ၊ ဘန္တေ’’. ‘‘သိယာ ခေါ၊ ဘိက္ခဝေ၊ တသ္မိံ ဇရသိင်္ဂါလေ ယာ ကာစိ ကတညုတာ ကတဝေဒိတာ၊ န တွေဝ ဣဓေကစ္စေ သကျပုတ္တိယပဋိညေ သိယာ ယာ ကာစိ ကတညုတာ ကတဝေဒိတာ. တသ္မာတိဟ၊ ဘိက္ခဝေ၊ ဧဝံ သိက္ခိတဗ္ဗံ – ‘ကတညုနော ဘဝိဿာမ ကတဝေဒိနော၊ န စ နော [န စ နောတိ ဣဒံ သီ. ပီ. ပေါတ္ထကေသု နတ္ထိ] အမှေသု အပ္ပကမ္ပိ ကတံ နဿိဿတီ’တိ [မာ နဿိဿတီတိ (သီ. ပီ.)၊ ဝိနဿိဿတီတိ (သျာ. ကံ.)]. ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. ဒွါဒသမံ.

ဩပမ္မသံယုတ္တံ သမတ္တံ.