၉. ရဇ္ဇုသုတ္တံ

၁၇၈. သာဝတ္ထိယံ ဝိဟရတိ။ပေ။ ‘‘ဒါရုဏော၊ ဘိက္ခဝေ၊ လာဘသက္ကာရသိလောကော. လာဘသက္ကာရသိလောကော၊ ဘိက္ခဝေ၊ ဆဝိံ ဆိန္ဒတိ၊ ဆဝိံ ဆေတွာ စမ္မံ ဆိန္ဒတိ၊ စမ္မံ ဆေတွာ မံသံ ဆိန္ဒတိ၊ မံသံ ဆေတွာ နှာရုံ ဆိန္ဒတိ၊ နှာရုံ ဆေတွာ အဋ္ဌိံ ဆိန္ဒတိ၊ အဋ္ဌိံ ဆေတွာ အဋ္ဌိမိဉ္ဇံ အာဟစ္စ တိဋ္ဌတိ’’.

‘‘သေယျထာပိ၊ ဘိက္ခဝေ၊ ဗလဝါ ပုရိသော ဒဠှာယ ဝါဠရဇ္ဇုယာ ဇင်္ဃံ ဝေဌေတွာ ဃံသေယျ. သာ ဆဝိံ ဆိန္ဒေယျ၊ ဆဝိံ ဆေတွာ စမ္မံ ဆိန္ဒေယျ၊ စမ္မံ ဆေတွာ မံသံ ဆိန္ဒေယျ၊ မံသံ ဆေတွာ နှာရုံ ဆိန္ဒေယျ၊ နှာရုံ ဆေတွာ အဋ္ဌိံ ဆိန္ဒေယျ၊ အဋ္ဌိံ ဆေတွာ အဋ္ဌိမိဉ္ဇံ အာဟစ္စ တိဋ္ဌေယျ. ဧဝမေဝ ခေါ၊ ဘိက္ခဝေ၊ လာဘသက္ကာရသိလောကော ဆဝိံ ဆိန္ဒတိ၊ ဆဝိံ ဆေတွာ စမ္မံ ဆိန္ဒတိ၊ စမ္မံ ဆေတွာ မံသံ ဆိန္ဒတိ၊ မံသံ ဆေတွာ နှာရုံ ဆိန္ဒတိ၊ နှာရုံ ဆေတွာ အဋ္ဌိံ ဆိန္ဒတိ၊ အဋ္ဌိံ ဆေတွာ အဋ္ဌိံမိဉ္ဇံ အာဟစ္စ တိဋ္ဌတိ. ဧဝံ ဒါရုဏော ခေါ၊ ဘိက္ခဝေ၊ လာဘသက္ကာရသိလောကော။ပေ။ ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. နဝမံ.