၅. ပထဝီသုတ္တံ

၇၈. သာဝတ္ထိယံ ဝိဟရတိ။ပေ။ ‘‘သေယျထာပိ၊ ဘိက္ခဝေ၊ ပုရိသော မဟာပထဝိယာ သတ္တ ကောလဋ္ဌိမတ္တိယော ဂုဠိကာ ဥပနိက္ခိပေယျ. တံ ကိံ မညထ၊ ဘိက္ခဝေ၊ ကတမံ နု ခေါ ဗဟုတရံ၊ ယာ ဝါ သတ္တ ကောလဋ္ဌိမတ္တိယော ဂုဠိကာ ဥပနိက္ခိတ္တာ အယံ [ယာ (သျာ. က.)] ဝါ မဟာပထဝီ’’တိ?

‘‘ဧတဒေဝ၊ ဘန္တေ၊ ဗဟုတရံ၊ ယဒိဒံ မဟာပထဝီ၊ အပ္ပမတ္တိကာ သတ္တ ကောလဋ္ဌိမတ္တိယော ဂုဠိကာ ဥပနိက္ခိတ္တာ. နေဝ သတိမံ ကလံ ဥပေန္တိ န သဟဿိမံ ကလံ ဥပေန္တိ န သတသဟဿိမံ ကလံ ဥပေန္တိ မဟာပထဝိံ ဥပနိဓာယ သတ္တ ကောလဋ္ဌိမတ္တိယော ဂုဠိကာ ဥပနိက္ခိတ္တာ’’တိ. ‘‘ဧဝမေဝ ခေါ၊ ဘိက္ခဝေ။ပေ။ ဓမ္မစက္ခုပဋိလာဘော’’တိ. ပဉ္စမံ.