၂. မဟာရာဟုလောဝါဒသုတ္တံ

၁၁၃. ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. အထ ခေါ ဘဂဝါ ပုဗ္ဗဏှသမယံ နိဝါသေတွာ ပတ္တစီဝရမာဒါယ သာဝတ္ထိံ ပိဏ္ဍာယ ပါဝိသိ. အာယသ္မာပိ ခေါ ရာဟုလော ပုဗ္ဗဏှသမယံ နိဝါသေတွာ ပတ္တစီဝရမာဒါယ ဘဂဝန္တံ ပိဋ္ဌိတော ပိဋ္ဌိတော အနုဗန္ဓိ. အထ ခေါ ဘဂဝါ အပလောကေတွာ အာယသ္မန္တံ ရာဟုလံ အာမန္တေသိ – ‘‘ယံ ကိဉ္စိ၊ ရာဟုလ၊ ရူပံ – အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ – သဗ္ဗံ ရူပံ ‘နေတံ မမ၊ နေသောဟမသ္မိ၊ န မေသော အတ္တာ’တိ ဧဝမေတံ ယထာဘူတံ သမ္မပ္ပညာယ ဒဋ္ဌဗ္ဗ’’န္တိ. ‘‘ရူပမေဝ နု ခေါ၊ ဘဂဝါ၊ ရူပမေဝ နု ခေါ၊ သုဂတာ’’တိ? ‘‘ရူပမ္ပိ၊ ရာဟုလ၊ ဝေဒနာပိ၊ ရာဟုလ၊ သညာပိ၊ ရာဟုလ၊ သင်္ခါရာပိ၊ ရာဟုလ၊ ဝိညာဏမ္ပိ၊ ရာဟုလာ’’တိ. အထ ခေါ အာယသ္မာ ရာဟုလော ‘‘ကော နဇ္ဇ [ကော နုဇ္ဇ (သျာ. ကံ.)] ဘဂဝတာ သမ္မုခါ ဩဝါဒေန ဩဝဒိတော ဂါမံ ပိဏ္ဍာယ ပဝိသိဿတီ’’တိ တတော ပဋိနိဝတ္တိတွာ အညတရသ္မိံ ရုက္ခမူလေ နိသီဒိ ပလ္လင်္ကံ အာဘုဇိတွာ ဥဇုံ ကာယံ ပဏိဓာယ ပရိမုခံ သတိံ ဥပဋ္ဌပေတွာ. အဒ္ဒသာ ခေါ အာယသ္မာ သာရိပုတ္တော အာယသ္မန္တံ ရာဟုလံ အညတရသ္မိံ ရုက္ခမူလေ နိသိန္နံ ပလ္လင်္ကံ အာဘုဇိတွာ ဥဇုံ ကာယံ ပဏိဓာယ ပရိမုခံ သတိံ ဥပဋ္ဌပေတွာ. ဒိသွာန အာယသ္မန္တံ ရာဟုလံ အာမန္တေသိ – ‘‘အာနာပါနဿတိံ၊ ရာဟုလ၊ ဘာဝနံ ဘာဝေဟိ. အာနာပါနဿတိ၊ ရာဟုလ၊ ဘာဝနာ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ’’တိ.

၁၁၄. အထ ခေါ အာယသ္မာ ရာဟုလော သာယနှသမယံ ပဋိသလ္လာနာ ဝုဋ္ဌိတော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ ရာဟုလော ဘဂဝန္တံ ဧတဒဝေါစ – ‘‘ကထံ ဘာဝိတာ နု ခေါ၊ ဘန္တေ၊ အာနာပါနဿတိ၊ ကထံ ဗဟုလီကတာ မဟပ္ဖလာ ဟောတိ မဟာနိသံသာ’’တိ? ‘‘ယံ ကိဉ္စိ၊ ရာဟုလ၊ အဇ္ဈတ္တံ ပစ္စတ္တံ ကက္ခဠံ ခရိဂတံ ဥပါဒိန္နံ၊ သေယျထိဒံ – ကေသာ လောမာ နခါ ဒန္တာ တစော မံသံ နှာရု [နဟာရု (သီ. သျာ. ကံ. ပီ.)] အဋ္ဌိ အဋ္ဌိမိဉ္ဇံ ဝက္ကံ ဟဒယံ ယကနံ ကိလောမကံ ပိဟကံ ပပ္ဖါသံ အန္တံ အန္တဂုဏံ ဥဒရိယံ ကရီသံ၊ ယံ ဝါ ပနညမ္ပိ ကိဉ္စိ အဇ္ဈတ္တံ ပစ္စတ္တံ ကက္ခဠံ ခရိဂတံ ဥပါဒိန္နံ – အယံ ဝုစ္စတိ၊ ရာဟုလ၊ အဇ္ဈတ္တိကာ ပထဝီဓာတု [ပဌဝီဓာတု (သီ. သျာ. ကံ. ပီ.)]. ယာ စေဝ ခေါ ပန အဇ္ဈတ္တိကာ ပထဝီဓာတု ယာ စ ဗာဟိရာ ပထဝီဓာတု၊ ပထဝီဓာတုရေဝေသာ. တံ ‘နေတံ မမ၊ နေသောဟမသ္မိ၊ န မေသော အတ္တာ’တိ – ဧဝမေတံ ယထာဘူတံ သမ္မပ္ပညာယ ဒဋ္ဌဗ္ဗံ. ဧဝမေတံ ယထာဘူတံ သမ္မပ္ပညာယ ဒိသွာ ပထဝီဓာတုယာ နိဗ္ဗိန္ဒတိ၊ ပထဝီဓာတုယာ စိတ္တံ ဝိရာဇေတိ’’.

၁၁၅. ‘‘ကတမာ စ၊ ရာဟုလ၊ အာပေါဓာတု? အာပေါဓာတု သိယာ အဇ္ဈတ္တိကာ၊ သိယာ ဗာဟိရာ. ကတမာ စ၊ ရာဟုလ၊ အဇ္ဈတ္တိကာ အာပေါဓာတု? ယံ အဇ္ဈတ္တံ ပစ္စတ္တံ အာပေါ အာပေါဂတံ ဥပါဒိန္နံ၊ သေယျထိဒံ – ပိတ္တံ သေမှံ ပုဗ္ဗော လောဟိတံ သေဒေါ မေဒေါ အဿု ဝသာ ခေဠော သိင်္ဃာဏိကာ လသိကာ မုတ္တံ၊ ယံ ဝါ ပနညမ္ပိ ကိဉ္စိ အဇ္ဈတ္တံ ပစ္စတ္တံ အာပေါ အာပေါဂတံ ဥပါဒိန္နံ – အယံ ဝုစ္စတိ၊ ရာဟုလ၊ အဇ္ဈတ္တိကာ အာပေါဓာတု. ယာ စေဝ ခေါ ပန အဇ္ဈတ္တိကာ အာပေါဓာတု ယာ စ ဗာဟိရာ အာပေါဓာတု အာပေါဓာတုရေဝေသာ. တံ ‘နေတံ မမ၊ နေသောဟမသ္မိ၊ န မေသော အတ္တာ’တိ – ဧဝမေတံ ယထာဘူတံ သမ္မပ္ပညာယ ဒဋ္ဌဗ္ဗံ. ဧဝမေတံ ယထာဘူတံ သမ္မပ္ပညာယ ဒိသွာ အာပေါဓာတုယာ နိဗ္ဗိန္ဒတိ၊ အာပေါဓာတုယာ စိတ္တံ ဝိရာဇေတိ.

၁၁၆. ‘‘ကတမာ စ၊ ရာဟုလ၊ တေဇောဓာတု? တေဇောဓာတု သိယာ အဇ္ဈတ္တိကာ၊ သိယာ ဗာဟိရာ. ကတမာ စ၊ ရာဟုလ၊ အဇ္ဈတ္တိကာ တေဇောဓာတု? ယံ အဇ္ဈတ္တံ ပစ္စတ္တံ တေဇော တေဇောဂတံ ဥပါဒိန္နံ၊ သေယျထိဒံ – ယေန စ သန္တပ္ပတိ ယေန စ ဇီရီယတိ ယေန စ ပရိဍယှတိ ယေန စ အသိတပီတခါယိတသာယိတံ သမ္မာ ပရိဏာမံ ဂစ္ဆတိ၊ ယံ ဝါ ပနညမ္ပိ ကိဉ္စိ အဇ္ဈတ္တံ ပစ္စတ္တံ တေဇော တေဇောဂတံ ဥပါဒိန္နံ – အယံ ဝုစ္စတိ၊ ရာဟုလ၊ အဇ္ဈတ္တိကာ တေဇောဓာတု. ယာ စေဝ ခေါ ပန အဇ္ဈတ္တိကာ တေဇောဓာတု ယာ စ ဗာဟိရာ တေဇောဓာတု တေဇောဓာတုရေဝေသာ. တံ ‘နေတံ မမ၊ နေသောဟမသ္မိ၊ န မေသော အတ္တာ’တိ – ဧဝမေတံ ယထာဘူတံ သမ္မပ္ပညာယ ဒဋ္ဌဗ္ဗံ. ဧဝမေတံ ယထာဘူတံ သမ္မပ္ပညာယ ဒိသွာ တေဇောဓာတုယာ နိဗ္ဗိန္ဒတိ၊ တေဇောဓာတုယာ စိတ္တံ ဝိရာဇေတိ.

၁၁၇. ‘‘ကတမာ စ၊ ရာဟုလ၊ ဝါယောဓာတု? ဝါယောဓာတု သိယာ အဇ္ဈတ္တိကာ၊ သိယာ ဗာဟိရာ. ကတမာ စ၊ ရာဟုလ၊ အဇ္ဈတ္တိကာ ဝါယောဓာတု? ယံ အဇ္ဈတ္တံ ပစ္စတ္တံ ဝါယော ဝါယောဂတံ ဥပါဒိန္နံ၊ သေယျထိဒံ – ဥဒ္ဓင်္ဂမာ ဝါတာ၊ အဓောဂမာ ဝါတာ၊ ကုစ္ဆိသယာ ဝါတာ၊ ကောဋ္ဌာသယာ [ကောဋ္ဌသယာ (သီ. ပီ.)] ဝါတာ၊ အင်္ဂမင်္ဂါနုသာရိနော ဝါတာ၊ အဿာသော ပဿာသော၊ ဣတိ ယံ ဝါ ပနညမ္ပိ ကိဉ္စိ အဇ္ဈတ္တံ ပစ္စတ္တံ ဝါယော ဝါယောဂတံ ဥပါဒိန္နံ – အယံ ဝုစ္စတိ၊ ရာဟုလ၊ အဇ္ဈတ္တိကာ ဝါယောဓာတု. ယာ စေဝ ခေါ ပန အဇ္ဈတ္တိကာ ဝါယောဓာတု ယာ စ ဗာဟိရာ ဝါယောဓာတု ဝါယောဓာတုရေဝေသာ. တံ ‘နေတံ မမ၊ နေသောဟမသ္မိ၊ န မေသော အတ္တာ’တိ – ဧဝမေတံ ယထာဘူတံ သမ္မပ္ပညာယ ဒဋ္ဌဗ္ဗံ. ဧဝမေတံ ယထာဘူတံ သမ္မပ္ပညာယ ဒိသွာ ဝါယောဓာတုယာ နိဗ္ဗိန္ဒတိ၊ ဝါယောဓာတုယာ စိတ္တံ ဝိရာဇေတိ.

၁၁၈. ‘‘ကတမာ စ၊ ရာဟုလ၊ အာကာသဓာတု? အာကာသဓာတု သိယာ အဇ္ဈတ္တိကာ၊ သိယာ ဗာဟိရာ. ကတမာ စ၊ ရာဟုလ၊ အဇ္ဈတ္တိကာ အာကာသဓာတု? ယံ အဇ္ဈတ္တံ ပစ္စတ္တံ အာကာသံ အာကာသဂတံ ဥပါဒိန္နံ၊ သေယျထိဒံ – ကဏ္ဏစ္ဆိဒ္ဒံ နာသစ္ဆိဒ္ဒံ မုခဒွါရံ၊ ယေန စ အသိတပီတခါယိတသာယိတံ အဇ္ဈောဟရတိ၊ ယတ္ထ စ အသိတပီတခါယိတသာယိတံ သန္တိဋ္ဌတိ၊ ယေန စ အသိတပီတခါယိတသာယိတံ အဓောဘာဂံ [အဓောဘာဂါ (သီ. သျာ. ကံ. ပီ.)] နိက္ခမတိ၊ ယံ ဝါ ပနညမ္ပိ ကိဉ္စိ အဇ္ဈတ္တံ ပစ္စတ္တံ အာကာသံ အာကာသဂတံ၊ အဃံ အဃဂတံ၊ ဝိဝရံ ဝိဝရဂတံ၊ အသမ္ဖုဋ္ဌံ၊ မံသလောဟိတေဟိ ဥပါဒိန္နံ [အာကာသဂတံ ဥပါဒိန္နံ (သီ. ပီ.)] – အယံ ဝုစ္စတိ၊ ရာဟုလ၊ အဇ္ဈတ္တိကာ အာကာသဓာတု. ယာ စေဝ ခေါ ပန အဇ္ဈတ္တိကာ အာကာသဓာတု ယာ စ ဗာဟိရာ အာကာသဓာတု အာကာသဓာတုရေဝေသာ. တံ ‘နေတံ မမ၊ နေသောဟမသ္မိ၊ န မေသော အတ္တာ’တိ – ဧဝမေတံ ယထာဘူတံ သမ္မပ္ပညာယ ဒဋ္ဌဗ္ဗံ. ဧဝမေတံ ယထာဘူတံ သမ္မပ္ပညာယ ဒိသွာ အာကာသဓာတုယာ စိတ္တံ နိဗ္ဗိန္ဒတိ၊ အာကာသဓာတုယာ စိတ္တံ ဝိရာဇေတိ.

၁၁၉. ‘‘ပထဝီသမံ၊ ရာဟုလ၊ ဘာဝနံ ဘာဝေဟိ. ပထဝီသမဉှိ တေ၊ ရာဟုလ၊ ဘာဝနံ ဘာဝယတော ဥပ္ပန္နာ မနာပါမနာပါ ဖဿာ စိတ္တံ န ပရိယာဒါယ ဌဿန္တိ. သေယျထာပိ၊ ရာဟုလ၊ ပထဝိယာ သုစိမ္ပိ နိက္ခိပန္တိ၊ အသုစိမ္ပိ နိက္ခိပန္တိ၊ ဂူထဂတမ္ပိ နိက္ခိပန္တိ၊ မုတ္တဂတမ္ပိ နိက္ခိပန္တိ၊ ခေဠဂတမ္ပိ နိက္ခိပန္တိ၊ ပုဗ္ဗဂတမ္ပိ နိက္ခိပန္တိ၊ လောဟိတဂတမ္ပိ နိက္ခိပန္တိ၊ န စ တေန ပထဝီ အဋ္ဋီယတိ ဝါ ဟရာယတိ ဝါ ဇိဂုစ္ဆတိ ဝါ၊ ဧဝမေဝ ခေါ တွံ၊ ရာဟုလ၊ ပထဝီသမံ ဘာဝနံ ဘာဝေဟိ. ပထဝီသမဉှိ တေ၊ ရာဟုလ၊ ဘာဝနံ ဘာဝယတော ဥပ္ပန္နာ မနာပါမနာပါ ဖဿာ စိတ္တံ န ပရိယာဒါယ ဌဿန္တိ.

‘‘အာပေါသမံ၊ ရာဟုလ၊ ဘာဝနံ ဘာဝေဟိ. အာပေါသမဉှိ တေ၊ ရာဟုလ၊ ဘာဝနံ ဘာဝယတော ဥပ္ပန္နာ မနာပါမနာပါ ဖဿာ စိတ္တံ န ပရိယာဒါယ ဌဿန္တိ. သေယျထာပိ၊ ရာဟုလ၊ အာပသ္မိံ သုစိမ္ပိ ဓောဝန္တိ၊ အသုစိမ္ပိ ဓောဝန္တိ၊ ဂူထဂတမ္ပိ ဓောဝန္တိ၊ မုတ္တဂတမ္ပိ ဓောဝန္တိ၊ ခေဠဂတမ္ပိ ဓောဝန္တိ၊ ပုဗ္ဗဂတမ္ပိ ဓောဝန္တိ၊ လောဟိတဂတမ္ပိ ဓောဝန္တိ၊ န စ တေန အာပေါ အဋ္ဋီယတိ ဝါ ဟရာယတိ ဝါ ဇိဂုစ္ဆတိ ဝါ၊ ဧဝမေဝ ခေါ တွံ၊ ရာဟုလ၊ အာပေါသမံ ဘာဝနံ ဘာဝေဟိ. အာပေါသမဉှိ တေ၊ ရာဟုလ၊ ဘာဝနံ ဘာဝယတော ဥပ္ပန္နာ မနာပါမနာပါ ဖဿာ စိတ္တံ န ပရိယာဒါယ ဌဿန္တိ.

‘‘တေဇောသမံ၊ ရာဟုလ၊ ဘာဝနံ ဘာဝေဟိ. တေဇောသမဉှိ တေ၊ ရာဟုလ၊ ဘာဝနံ ဘာဝယတော ဥပ္ပန္နာ မနာပါမနာပါ ဖဿာ စိတ္တံ န ပရိယာဒါယ ဌဿန္တိ. သေယျထာပိ၊ ရာဟုလ၊ တေဇော သုစိမ္ပိ ဒဟတိ၊ အသုစိမ္ပိ ဒဟတိ၊ ဂူထဂတမ္ပိ ဒဟတိ၊ မုတ္တဂတမ္ပိ ဒဟတိ၊ ခေဠဂတမ္ပိ ဒဟတိ၊ ပုဗ္ဗဂတမ္ပိ ဒဟတိ၊ လောဟိတဂတမ္ပိ ဒဟတိ၊ န စ တေန တေဇော အဋ္ဋီယတိ ဝါ ဟရာယတိ ဝါ ဇိဂုစ္ဆတိ ဝါ၊ ဧဝမေဝ ခေါ တွံ၊ ရာဟုလ၊ တေဇောသမံ ဘာဝနံ ဘာဝေဟိ. တေဇောသမဉှိ တေ၊ ရာဟုလ၊ ဘာဝနံ ဘာဝယတော ဥပ္ပန္နာ မနာပါမနာပါ ဖဿာ စိတ္တံ န ပရိယာဒါယ ဌဿန္တိ.

‘‘ဝါယောသမံ၊ ရာဟုလ၊ ဘာဝနံ ဘာဝေဟိ. ဝါယောသမဉှိ တေ၊ ရာဟုလ၊ ဘာဝနံ ဘာဝယတော ဥပ္ပန္နာ မနာပါမနာပါ ဖဿာ စိတ္တံ န ပရိယာဒါယ ဌဿန္တိ. သေယျထာပိ၊ ရာဟုလ၊ ဝါယော သုစိမ္ပိ ဥပဝါယတိ၊ အသုစိမ္ပိ ဥပဝါယတိ၊ ဂူထဂတမ္ပိ ဥပဝါယတိ၊ မုတ္တဂတမ္ပိ ဥပဝါယတိ၊ ခေဠဂတမ္ပိ ဥပဝါယတိ၊ ပုဗ္ဗဂတမ္ပိ ဥပဝါယတိ၊ လောဟိတဂတမ္ပိ ဥပဝါယတိ၊ န စ တေန ဝါယော အဋ္ဋီယတိ ဝါ ဟရာယတိ ဝါ ဇိဂုစ္ဆတိ ဝါ၊ ဧဝမေဝ ခေါ တွံ၊ ရာဟုလ၊ ဝါယောသမံ ဘာဝနံ ဘာဝေဟိ. ဝါယောသမဉှိ တေ၊ ရာဟုလ၊ ဘာဝနံ ဘာဝယတော ဥပ္ပန္နာ မနာပါမနာပါ ဖဿာ စိတ္တံ န ပရိယာဒါယ ဌဿန္တိ.

‘‘အာကာသသမံ၊ ရာဟုလ၊ ဘာဝနံ ဘာဝေဟိ. အာကာသသမဉှိ တေ၊ ရာဟုလ၊ ဘာဝနံ ဘာဝယတော ဥပ္ပန္နာ မနာပါမနာပါ ဖဿာ စိတ္တံ န ပရိယာဒါယ ဌဿန္တိ. သေယျထာပိ၊ ရာဟုလ၊ အာကာသော န ကတ္ထစိ ပတိဋ္ဌိတော၊ ဧဝမေဝ ခေါ တွံ၊ ရာဟုလ၊ အာကာသသမံ ဘာဝနံ ဘာဝေဟိ. အာကာသသမဉှိ တေ၊ ရာဟုလ၊ ဘာဝနံ ဘာဝယတော ဥပ္ပန္နာ မနာပါမနာပါ ဖဿာ စိတ္တံ န ပရိယာဒါယ ဌဿန္တိ.

၁၂၀. ‘‘မေတ္တံ၊ ရာဟုလ၊ ဘာဝနံ ဘာဝေဟိ. မေတ္တဉှိ တေ၊ ရာဟုလ၊ ဘာဝနံ ဘာဝယတော ယော ဗျာပါဒေါ သော ပဟီယိဿတိ. ကရုဏံ၊ ရာဟုလ၊ ဘာဝနံ ဘာဝေဟိ. ကရုဏဉှိ တေ၊ ရာဟုလ၊ ဘာဝနံ ဘာဝယတော ယာ ဝိဟေသာ သာ ပဟီယိဿတိ. မုဒိတံ၊ ရာဟုလ၊ ဘာဝနံ ဘာဝေဟိ. မုဒိတဉှိ တေ၊ ရာဟုလ၊ ဘာဝနံ ဘာဝယတော ယာ အရတိ သာ ပဟီယိဿတိ. ဥပေက္ခံ၊ ရာဟုလ၊ ဘာဝနံ ဘာဝေဟိ. ဥပေက္ခဉှိ တေ၊ ရာဟုလ၊ ဘာဝနံ ဘာဝယတော ယော ပဋိဃော သော ပဟီယိဿတိ. အသုဘံ၊ ရာဟုလ၊ ဘာဝနံ ဘာဝေဟိ. အသုဘဉှိ တေ၊ ရာဟုလ၊ ဘာဝနံ ဘာဝယတော ယော ရာဂေါ သော ပဟီယိဿတိ. အနိစ္စသညံ၊ ရာဟုလ၊ ဘာဝနံ ဘာဝေဟိ. အနိစ္စသညဉှိ တေ၊ ရာဟုလ၊ ဘာဝနံ ဘာဝယတော ယော အသ္မိမာနော သော ပဟီယိဿတိ.

၁၂၁. ‘‘အာနာပါနဿတိံ၊ ရာဟုလ၊ ဘာဝနံ ဘာဝေဟိ. အာနာပါနဿတိ ဟိ တေ၊ ရာဟုလ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ. ကထံ ဘာဝိတာ စ၊ ရာဟုလ၊ အာနာပါနဿတိ၊ ကထံ ဗဟုလီကတာ မဟပ္ဖလာ ဟောတိ မဟာနိသံသာ? ဣဓ၊ ရာဟုလ၊ ဘိက္ခု အရညဂတော ဝါ ရုက္ခမူလဂတော ဝါ သုညာဂါရဂတော ဝါ နိသီဒတိ ပလ္လင်္ကံ အာဘုဇိတွာ ဥဇုံ ကာယံ ပဏိဓာယ ပရိမုခံ သတိံ ဥပဋ္ဌပေတွာ. သော သတောဝ အဿသတိ သတောဝ [သတော (သီ. သျာ. ကံ. ပီ.)] ပဿသတိ.

‘‘ဒီဃံ ဝါ အဿသန္တော ‘ဒီဃံ အဿသာမီ’တိ ပဇာနာတိ၊ ဒီဃံ ဝါ ပဿသန္တော ‘ဒီဃံ ပဿသာမီ’တိ ပဇာနာတိ၊ ရဿံ ဝါ အဿသန္တော ‘ရဿံ အဿသာမီ’တိ ပဇာနာတိ၊ ရဿံ ဝါ ပဿသန္တော ‘ရဿံ ပဿသာမီ’တိ ပဇာနာတိ. ‘သဗ္ဗကာယပ္ပဋိသံဝေဒီ အဿသိဿာမီ’တိ သိက္ခတိ၊ ‘သဗ္ဗကာယပ္ပဋိသံဝေဒီ ပဿသိဿာမီ’တိ သိက္ခတိ၊ ‘ပဿမ္ဘယံ ကာယသင်္ခါရံ အဿသိဿာမီ’တိ သိက္ခတိ၊ ‘ပဿမ္ဘယံ ကာယသင်္ခါရံ ပဿသိဿာမီ’တိ သိက္ခတိ.

‘‘‘ပီတိပ္ပဋိသံဝေဒီ အဿသိဿာမီ’တိ သိက္ခတိ၊ ‘ပီတိပ္ပဋိသံဝေဒီ ပဿသိဿာမီ’တိ သိက္ခတိ၊ ‘သုခပ္ပဋိသံဝေဒီ အဿသိဿာမီ’တိ သိက္ခတိ၊ ‘သုခပ္ပဋိသံဝေဒီ ပဿသိဿာမီ’တိ သိက္ခတိ၊ ‘စိတ္တသင်္ခါရပ္ပဋိသံဝေဒီ အဿသိဿာမီ’တိ သိက္ခတိ၊ ‘စိတ္တသင်္ခါရပ္ပဋိသံဝေဒီ ပဿသိဿာမီ’တိ သိက္ခတိ၊ ‘ပဿမ္ဘယံ စိတ္တသင်္ခါရံ အဿသိဿာမီ’တိ သိက္ခတိ၊ ‘ပဿမ္ဘယံ စိတ္တသင်္ခါရံ ပဿသိဿာမီ’တိ သိက္ခတိ.

‘‘‘စိတ္တပ္ပဋိသံဝေဒီ အဿသိဿာမီ’တိ သိက္ခတိ၊ ‘စိတ္တပ္ပဋိသံဝေဒီ ပဿသိဿာမီ’တိ သိက္ခတိ၊ ‘အဘိပ္ပမောဒယံ စိတ္တံ အဿသိဿာမီ’တိ သိက္ခတိ၊ ‘အဘိပ္ပမောဒယံ စိတ္တံ ပဿသိဿာမီ’တိ သိက္ခတိ၊ ‘သမာဒဟံ စိတ္တံ အဿသိဿာမီ’တိ သိက္ခတိ၊ ‘သမာဒဟံ စိတ္တံ ပဿသိဿာမီ’တိ သိက္ခတိ၊ ‘ဝိမောစယံ စိတ္တံ အဿသိဿာမီ’တိ သိက္ခတိ၊ ‘ဝိမောစယံ စိတ္တံ ပဿသိဿာမီ’တိ သိက္ခတိ.

‘‘‘အနိစ္စာနုပဿီ အဿသိဿာမီ’တိ သိက္ခတိ၊ ‘အနိစ္စာနုပဿီ ပဿသိဿာမီ’တိ သိက္ခတိ၊ ‘ဝိရာဂါနုပဿီ အဿသိဿာမီ’တိ သိက္ခတိ၊ ‘ဝိရာဂါနုပဿီ ပဿသိဿာမီ’တိ သိက္ခတိ၊ ‘နိရောဓာနုပဿီ အဿသိဿာမီ’တိ သိက္ခတိ၊ ‘နိရောဓာနုပဿီ ပဿသိဿာမီ’တိ သိက္ခတိ၊ ‘ပဋိနိဿဂ္ဂါနုပဿီ အဿသိဿာမီ’တိ သိက္ခတိ၊ ‘ပဋိနိဿဂ္ဂါနုပဿီ ပဿသိဿာမီ’တိ သိက္ခတိ.

‘‘ဧဝံ ဘာဝိတာ ခေါ၊ ရာဟုလ၊ အာနာပါနဿတိ၊ ဧဝံ ဗဟုလီကတာ မဟပ္ဖလာ ဟောတိ မဟာနိသံသာ. ဧဝံ ဘာဝိတာယ၊ ရာဟုလ၊ အာနာပါနဿတိယာ၊ ဧဝံ ဗဟုလီကတာယ ယေပိ တေ စရိမကာ အဿာသာ တေပိ ဝိဒိတာဝ နိရုဇ္ဈန္တိ နော အဝိဒိတာ’’တိ.

ဣဒမဝေါစ ဘဂဝါ. အတ္တမနော အာယသ္မာ ရာဟုလော ဘဂဝတော ဘာသိတံ အဘိနန္ဒီတိ.

မဟာရာဟုလောဝါဒသုတ္တံ နိဋ္ဌိတံ ဒုတိယံ.