၁. စိတ္တလတာဝိမာနဝတ္ထု
၁၁၁၄. ‘‘ယထာ ဝနံ စိတ္တလတံ ပဘာသတိ၊ ဥယျာနသေဋ္ဌံ တိဒသာနမုတ္တမံ၊
တထူပမံ တုယှမိဒံ ဝိမာနံ၊ ဩဘာသယံ တိဋ္ဌတိ အန္တလိက္ခေ.
၁၁၁၅. ‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ၊
ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.
၁၁၁၆. သော ဒေဝပုတ္တော အတ္တမနော။ပေ။ ယဿ ကမ္မဿိဒံ ဖလံ.
၁၁၁၇. ‘‘အဟံ မနုဿေသု မနုဿဘူတော၊ ဒလိဒ္ဒေါ အတာဏော ကပဏော ကမ္မကရော အဟောသိံ၊
ဇိဏ္ဏေ စ မာတာပိတရော အဘာရိံ [အဘရိံ (သီ. သျာ.)]၊ ပိယာ စ မေ သီလဝန္တော အဟေသုံ၊
အန္နဉ္စ ပါနဉ္စ ပသန္နစိတ္တော၊ သက္ကစ္စ ဒါနံ ဝိပုလံ အဒါသိ.
၁၁၁၈. ‘‘တေန မေတာဒိသော ဝဏ္ဏော။ပေ။ ဝဏ္ဏော စ မေ သဗ္ဗဒိသာ ပဘာသတီ’’တိ.
စိတ္တလတာဝိမာနံ ပဌမံ.