၁၀. (ဥတ္တရ) ပါယာသိဝိမာနဝတ္ထု

၁၁၀၈. ‘‘ယာ ဒေဝရာဇဿ သဘာ သုဓမ္မာ၊ ယတ္ထစ္ဆတိ ဒေဝသံဃော သမဂ္ဂေါ၊

တထူပမံ တုယှမိဒံ ဝိမာနံ၊ ဩဘာသယံ တိဋ္ဌတိ အန္တလိက္ခေ.

၁၁၀၉. ‘‘ဒေဝိဒ္ဓိပတ္တောသိ မဟာနုဘာဝေါ၊ မနုဿဘူတော ကိမကာသိ ပုညံ၊

ကေနာသိ ဧဝံ ဇလိတာနုဘာဝေါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.

၁၁၁၀. သော ဒေဝပုတ္တော အတ္တမနော။ပေ။ ယဿ ကမ္မဿိဒံ ဖလံ.

၁၁၁၁. ‘‘အဟံ မနုဿေသု မနုဿဘူတော၊ ရညော ပါယာသိဿ အဟောသိံ မာဏဝေါ၊

လဒ္ဓါ ဓနံ သံဝိဘာဂံ အကာသိံ၊ ပိယာ စ မေ သီလဝန္တော အဟေသုံ၊

အန္နဉ္စ ပါနဉ္စ ပသန္နစိတ္တော၊ သက္ကစ္စ ဒါနံ ဝိပုလံ အဒါသိံ.

၁၁၁၂. ‘‘တေန မေတာဒိသော ဝဏ္ဏော။ပေ. ။ဝဏ္ဏော စ မေ သဗ္ဗဒိသာ ပဘာသတီ’’တိ.

(ဥတ္တရ) ပါယာသိဝိမာနံ [ဥတ္တရဝိမာနံ (သီ. သျာ. အဋ္ဌ.)] ဒသမံ.

ပါယာသိဝဂ္ဂေါ ဆဋ္ဌော နိဋ္ဌိတော.

တဿုဒ္ဒါနံ –

ဒွေ အဂါရိနော ဖလဒါယီ၊ ဒွေ ဥပဿယဒါယီ ဘိက္ခာယ ဒါယီ၊

ယဝပါလကော စေဝ ဒွေ၊ ကုဏ္ဍလိနော ပါယာသီတိ [ပါဌဘေဒေါ နတ္ထိ]၊

ပုရိသာနံ ဒုတိယော ဝဂ္ဂေါ ပဝုစ္စတီတိ.