၅. ဒွါရပါလဝိမာနဝတ္ထု
၉၁၈. ‘‘ဥစ္စမိဒံ မဏိထူဏံ ဝိမာနံ၊ သမန္တတော ဒွါဒသ ယောဇနာနိ၊
ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ.
၉၁၉. ‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ၊
ဒိဗ္ဗာ ရသာ ကာမဂုဏေတ္ထ ပဉ္စ၊ နာရိယော စ နစ္စန္တိ သုဝဏ္ဏဆန္နာ.
၉၂၀. ‘‘ကေန တေတာဒိသော ဝဏ္ဏော။ပေ။ ဝဏ္ဏော စ တေ သဗ္ဗဒိသာ ပဘာသတီ’’တိ.
၉၂၂. သော ဒေဝပုတ္တော အတ္တမနော၊ မောဂ္ဂလ္လာနေန ပုစ္ဆိတော၊
ပဉှံ ပုဋ္ဌော ဝိယာကာသိ၊ ယဿ ကမ္မဿိဒံ ဖလံ.
၉၂၃. ‘‘ဒိဗ္ဗံ မမံ ဝဿသဟဿမာယု၊ ဝါစာဘိဂီတံ မနသာ ပဝတ္တိတံ၊
ဧတ္တာဝတာ ဌဿတိ ပုညကမ္မော၊ ဒိဗ္ဗေဟိ ကာမေဟိ သမင်္ဂိဘူတော.
၉၂၄. ‘‘တေန မေတာဒိသော ဝဏ္ဏော။ပေ။ဝဏ္ဏော စ မေ သဗ္ဗဒိသာ ပဘာသတီ’’တိ.
ဒွါရပါလဝိမာနံ ပဉ္စမံ.