၅. ကုဉ္ဇရဝိမာနဝတ္ထု

၃၁. ‘‘ကုဉ္ဇရော တေ ဝရာရောဟော၊ နာနာရတနကပ္ပနော၊

ရုစိရော ထာမဝါ ဇဝသမ္ပန္နော၊ အာကာသမှိ သမီဟတိ.

၃၂. ‘‘ပဒုမိ ပဒ္မ [ပဒုမ။ (သီ. သျာ.) ဧဝမုပရိပိ] ပတ္တက္ခိ၊ ပဒ္မုပ္ပလဇုတိန္ဓရော၊

ပဒ္မစုဏ္ဏာဘိကိဏ္ဏင်္ဂေါ၊ သောဏ္ဏပေါက္ခရမာလဓာ [။ မာလဝါ (သီ. သျာ.)].

၃၃. ‘‘ပဒုမာနုသဋံ မဂ္ဂံ၊ ပဒ္မပတ္တဝိဘူသိတံ.

ဌိတံ ဝဂ္ဂုမနုဂ္ဃါတီ၊ မိတံ ဂစ္ဆတိ ဝါရဏော.

၃၄. ‘‘တဿ ပက္ကမမာနဿ၊ သောဏ္ဏကံသာ ရတိဿရာ၊

တေသံ သုယျတိ နိဂ္ဃေါသော၊ တုရိယေ ပဉ္စင်္ဂိကေ ယထာ.

၃၅. ‘‘တဿ နာဂဿ ခန္ဓမှိ၊ သုစိဝတ္ထာ အလင်္ကတာ၊

မဟန္တံ အစ္ဆရာသံဃံ၊ ဝဏ္ဏေန အတိရောစသိ.

၃၆. ‘‘ဒါနဿ တေ ဣဒံ ဖလံ၊ အထော သီလဿ ဝါ ပန၊

အထော အဉ္ဇလိကမ္မဿ၊ တံ မေ အက္ခာဟိ ပုစ္ဆိတာ’’တိ၊

၃၇. သာ ဒေဝတာ အတ္တမနာ၊ မောဂ္ဂလ္လာနေန ပုစ္ဆိတာ၊

ပဉှံ ပုဋ္ဌာ ဝိယာကာသိ၊ ယဿ ကမ္မဿိဒံ ဖလံ.

၃၈. ‘‘ဒိသွာန ဂုဏသမ္ပန္နံ၊ ဈာယိံ ဈာနရတံ သတံ၊

အဒါသိံ ပုပ္ဖါဘိကိဏ္ဏံ၊ အာသနံ ဒုဿသန္ထတံ.

၃၉. ‘‘ဥပဍ္ဎံ ပဒ္မမာလာဟံ၊ အာသနဿ သမန္တတော၊

အဗ္ဘောကိရိဿံ ပတ္တေဟိ၊ ပသန္နာ သေဟိ ပါဏိဘိ.

၄၀. ‘‘တဿ ကမ္မကုသလဿ [ကမ္မဿ ကုသလဿ (သီ. ပီ.)]၊ ဣဒံ မေ ဤဒိသံ ဖလံ၊

သက္ကာရော ဂရုကာရော စ၊ ဒေဝါနံ အပစိတာ အဟံ.

၄၁. ‘‘ယော ဝေ သမ္မာဝိမုတ္တာနံ၊ သန္တာနံ ဗြဟ္မစာရိနံ၊

ပသန္နော အာသနံ ဒဇ္ဇာ၊ ဧဝံ နန္ဒေ ယထာ အဟံ.

၄၂. ‘‘တသ္မာ ဟိ အတ္တကာမေန [အတ္ထကာမေန (က.)]၊ မဟတ္တမဘိကင်္ခတာ၊

အာသနံ ဒါတဗ္ဗံ ဟောတိ၊ သရီရန္တိမဓာရိန’’န္တိ.

ကုဉ္ဇရဝိမာနံ ပဉ္စမံ.