၇. ပပဉ္စခယသုတ္တံ

၆၇. ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဘဂဝါ အတ္တနော ပပဉ္စသညာသင်္ခါပဟာနံ ပစ္စဝေက္ခမာနော နိသိန္နော ဟောတိ.

အထ ခေါ ဘဂဝါ အတ္တနော ပပဉ္စသညာသင်္ခါပဟာနံ ဝိဒိတွာ တာယံ ဝေလာယံ ဣမံ ဥဒါနံ ဥဒါနေသိ –

‘‘ယဿ ပပဉ္စာ ဌိတိ စ နတ္ထိ၊

သန္ဒာနံ ပလိဃဉ္စ ဝီတိဝတ္တော၊

တံ နိတ္တဏှံ မုနိံ စရန္တံ၊

နာဝဇာနာတိ သဒေဝကောပိ လောကော’’တိ. သတ္တမံ၊