၂. ဒုတိယလကုဏ္ဍကဘဒ္ဒိယသုတ္တံ

၆၂. ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အာယသ္မာ သာရိပုတ္တော အာယသ္မန္တံ လကုဏ္ဍကဘဒ္ဒိယံ သေခံ [သေက္ခောတိ (သျာ.)၊ သေခေါတိ (ပီ.)] မညမာနော ဘိယျောသောမတ္တာယ အနေကပရိယာယေန ဓမ္မိယာ ကထာယ သန္ဒဿေတိ သမာဒပေတိ သမုတ္တေဇေတိ သမ္ပဟံသေတိ.

အဒ္ဒသာ ခေါ ဘဂဝါ အာယသ္မန္တံ သာရိပုတ္တံ အာယသ္မန္တံ လကုဏ္ဍကဘဒ္ဒိယံ သေခံ မညမာနံ ဘိယျောသောမတ္တာယ အနေကပရိယာယေန ဓမ္မိယာ ကထာယ သန္ဒဿေန္တံ သမာဒပေန္တံ သမုတ္တေဇေန္တံ သမ္ပဟံသေန္တံ.

အထ ခေါ ဘဂဝါ ဧတမတ္ထံ ဝိဒိတွာ တာယံ ဝေလာယံ ဣမံ ဥဒါနံ ဥဒါနေသိ –

‘‘အစ္ဆေစ္ဆိ [အစ္ဆေဇ္ဇိ (က. သီ.)၊ အစ္ဆိဇ္ဇိ (က. သီ. သျာ.)၊ အဆိဇ္ဇိ (က.)] ဝဋ္ဋံ ဗျဂါ နိရာသံ၊ ဝိသုက္ခာ သရိတာ န သန္ဒတိ၊

ဆိန္နံ ဝဋ္ဋံ န ဝတ္တတိ၊ ဧသေဝန္တော ဒုက္ခဿာ’’တိ. ဒုတိယံ၊