၄. ပဌမနာနာတိတ္ထိယသုတ္တံ

၅၄. ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန သမ္ဗဟုလာ နာနာတိတ္ထိယသမဏဗြာဟ္မဏပရိဗ္ဗာဇကာ သာဝတ္ထိယံ ပဋိဝသန္တိ နာနာဒိဋ္ဌိကာ နာနာခန္တိကာ နာနာရုစိကာ နာနာဒိဋ္ဌိနိဿယနိဿိတာ.

သန္တေကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော – ‘‘သဿတော လောကော၊ ဣဒမေဝ သစ္စံ မောဃမည’’န္တိ. သန္တိ ပနေကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော – ‘‘အသဿတော လောကော၊ ဣဒမေဝ သစ္စံ မောဃမည’’န္တိ. သန္တေကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော – ‘‘အန္တဝါ လောကော၊ ဣဒမေဝ သစ္စံ မောဃမည’’န္တိ. သန္တိ ပနေကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော – ‘‘အနန္တဝါ လောကော၊ ဣဒမေဝ သစ္စံ မောဃမည’’န္တိ. သန္တေကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော – ‘‘တံ ဇီဝံ တံ သရီရံ၊ ဣဒမေဝ သစ္စံ မောဃမည’’န္တိ. သန္တိ ပနေကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော – ‘‘အညံ ဇီဝံ အညံ သရီရံ၊ ဣဒမေဝ သစ္စံ မောဃမည’’န္တိ. သန္တေကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော – ‘‘ဟောတိ တထာဂတော ပရံ မရဏာ၊ ဣဒမေဝ သစ္စံ မောဃမည’’န္တိ. သန္တိ ပနေကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော – ‘‘န ဟောတိ တထာဂတော ပရံ မရဏာ၊ ဣဒမေဝ သစ္စံ မောဃမည’’န္တိ. သန္တေကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော – ‘‘ဟောတိ စ န စ ဟောတိ တထာဂတော ပရံ မရဏာ၊ ဣဒမေဝ သစ္စံ မောဃမည’’န္တိ. သန္တိ ပနေကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော – ‘‘နေဝ ဟောတိ န န ဟောတိ တထာဂတော ပရံ မရဏာ၊ ဣဒမေဝ သစ္စံ မောဃမည’’န္တိ.

တေ ဘဏ္ဍနဇာတာ ကလဟဇာတာ ဝိဝါဒါပန္နာ အညမညံ မုခသတ္တီဟိ ဝိတုဒန္တာ ဝိဟရန္တိ – ‘‘ဧဒိသော ဓမ္မော၊ နေဒိသော ဓမ္မော၊ နေဒိသော ဓမ္မော၊ ဧဒိသော ဓမ္မော’’တိ.

အထ ခေါ သမ္ဗဟုလာ ဘိက္ခူ ပုဗ္ဗဏှသမယံ နိဝါသေတွာ ပတ္တစီဝရမာဒါယ သာဝတ္ထိံ ပိဏ္ဍာယ ပါဝိသိံသု. သာဝတ္ထိယံ ပိဏ္ဍာယ စရိတွာ ပစ္ဆာဘတ္တံ ပိဏ္ဍပါတပဋိက္ကန္တာ ယေန ဘဂဝါ တေနုပသင်္ကမိံသု၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု. ဧကမန္တံ နိသိန္နာ ခေါ တေ ဘိက္ခူ ဘဂဝန္တံ ဧတဒဝေါစုံ –

‘‘ဣဓ၊ ဘန္တေ၊ သမ္ဗဟုလာ နာနာတိတ္ထိယသမဏဗြာဟ္မဏပရိဗ္ဗာဇကာ သာဝတ္ထိယံ ပဋိဝသန္တိ နာနာဒိဋ္ဌိကာ နာနာခန္တိကာ နာနာရုစိကာ နာနာဒိဋ္ဌိနိဿယနိဿိတာ.

‘‘သန္တေကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော – ‘သဿတော လောကော၊ ဣဒမေဝ သစ္စံ မောဃမည’န္တိ။ပေ။ တေ ဘဏ္ဍနဇာတာ ကလဟဇာတာ ဝိဝါဒါပန္နာ အညမညံ မုခသတ္တီဟိ ဝိတုဒန္တာ ဝိဟရန္တိ – ‘ဧဒိသော ဓမ္မော၊ နေဒိသော ဓမ္မော၊ နေဒိသော ဓမ္မော၊ ဧဒိသော ဓမ္မော’’’ တိ.

‘‘အညတိတ္ထိယာ၊ ဘိက္ခဝေ၊ ပရိဗ္ဗာဇကာ အန္ဓာ အစက္ခုကာ၊ အတ္ထံ န ဇာနန္တိ၊ အနတ္ထံ န ဇာနန္တိ၊ ဓမ္မံ န ဇာနန္တိ၊ အဓမ္မံ န ဇာနန္တိ. တေ အတ္ထံ အဇာနန္တာ အနတ္ထံ အဇာနန္တာ ဓမ္မံ အဇာနန္တာ အဓမ္မံ အဇာနန္တာ ဘဏ္ဍနဇာတာ ကလဟဇာတာ ဝိဝါဒါပန္နာ အညမညံ မုခသတ္တီဟိ ဝိတုဒန္တာ ဝိဟရန္တိ – ‘ဧဒိသော ဓမ္မော၊ နေဒိသော ဓမ္မော၊ နေဒိသော ဓမ္မော၊ ဧဒိသော ဓမ္မော’’’တိ.

‘‘ဘူတပုဗ္ဗံ၊ ဘိက္ခဝေ၊ ဣမိဿာယေဝ သာဝတ္ထိယာ အညတရော ရာဇာ အဟောသိ. အထ ခေါ၊ ဘိက္ခဝေ၊ သော ရာဇာ အညတရံ ပုရိသံ အာမန္တေသိ – ‘ဧဟိ တွံ၊ အမ္ဘော ပုရိသ၊ ယာဝတကာ သာဝတ္ထိယာ ဇစ္စန္ဓာ တေ သဗ္ဗေ ဧကဇ္ဈံ သန္နိပါတေဟီ’တိ. ‘ဧဝံ၊ ဒေဝါ’တိ ခေါ၊ ဘိက္ခဝေ၊ သော ပုရိသော တဿ ရညော ပဋိဿုတွာ ယာဝတကာ သာဝတ္ထိယာ ဇစ္စန္ဓာ တေ သဗ္ဗေ ဂဟေတွာ ယေန သော ရာဇာ တေနုပသင်္ကမိ၊ ဥပသင်္ကမိတွာ တံ ရာဇာနံ ဧတဒဝေါစ – ‘သန္နိပါတိတာ ခေါ တေ၊ ဒေဝ၊ ယာဝတကာ သာဝတ္ထိယာ ဇစ္စန္ဓာ’တိ. ‘တေန ဟိ၊ ဘဏေ၊ ဇစ္စန္ဓာနံ ဟတ္ထိံ ဒဿေဟီ’တိ. ‘ဧဝံ၊ ဒေဝါ’တိ ခေါ၊ ဘိက္ခဝေ၊ သော ပုရိသော တဿ ရညော ပဋိဿုတွာ ဇစ္စန္ဓာနံ ဟတ္ထိံ ဒဿေသိ.

‘‘ဧကစ္စာနံ ဇစ္စန္ဓာနံ ဟတ္ထိဿ သီသံ ဒဿေသိ – ‘ဧဒိသော၊ ဇစ္စန္ဓာ၊ ဟတ္ထီ’တိ. ဧကစ္စာနံ ဇစ္စန္ဓာနံ ဟတ္ထိဿ ကဏ္ဏံ ဒဿေသိ – ‘ဧဒိသော၊ ဇစ္စန္ဓာ၊ ဟတ္ထီ’တိ. ဧကစ္စာနံ ဇစ္စန္ဓာနံ ဟတ္ထိဿ ဒန္တံ ဒဿေသိ – ‘ဧဒိသော၊ ဇစ္စန္ဓာ၊ ဟတ္ထီ’တိ. ဧကစ္စာနံ ဇစ္စန္ဓာနံ ဟတ္ထိဿ သောဏ္ဍံ ဒဿေသိ – ‘ဧဒိသော၊ ဇစ္စန္ဓာ၊ ဟတ္ထီ’တိ. ဧကစ္စာနံ ဇစ္စန္ဓာနံ ဟတ္ထိဿ ကာယံ ဒဿေသိ – ‘ဧဒိသော၊ ဇစ္စန္ဓာ၊ ဟတ္ထီ’တိ. ဧကစ္စာနံ ဇစ္စန္ဓာနံ ဟတ္ထိဿ ပါဒံ ဒဿေသိ – ‘ဧဒိသော၊ ဇစ္စန္ဓာ၊ ဟတ္ထီ’တိ. ဧကစ္စာနံ ဇစ္စန္ဓာနံ ဟတ္ထိဿ သတ္ထိံ [ပိဋ္ဌိံ (သျာ.)] ဒဿေသိ – ‘ဧဒိသော၊ ဇစ္စန္ဓာ၊ ဟတ္ထီ’တိ. ဧကစ္စာနံ ဇစ္စန္ဓာနံ ဟတ္ထိဿ နင်္ဂုဋ္ဌံ ဒဿေသိ – ‘ဧဒိသော၊ ဇစ္စန္ဓာ၊ ဟတ္ထီ’တိ. ဧကစ္စာနံ ဇစ္စန္ဓာနံ ဟတ္ထိဿ ဝါလဓိံ ဒဿေသိ – ‘ဧဒိသော၊ ဇစ္စန္ဓာ၊ ဟတ္ထီ’’’တိ.

‘‘အထ ခေါ၊ ဘိက္ခဝေ၊ သော ပုရိသော ဇစ္စန္ဓာနံ ဟတ္ထိံ ဒဿေတွာ ယေန သော ရာဇာ တေနုပသင်္ကမိ၊ ဥပသင်္ကမိတွာ တံ ရာဇာနံ ဧတဒဝေါစ – ‘ဒိဋ္ဌော ခေါ တေဟိ၊ ဒေဝ၊ ဇစ္စန္ဓေဟိ ဟတ္ထီ၊ ယဿ ဒါနိ ကာလံ မညသီ’တိ.

‘‘အထ ခေါ၊ ဘိက္ခဝေ၊ သော ရာဇာ ယေန တေ ဇစ္စန္ဓာ တေနုပသင်္ကမိ၊ ဥပသင်္ကမိတွာ တေ ဇစ္စန္ဓေ ဧတဒဝေါစ – ‘ဒိဋ္ဌော ဝေါ၊ ဇစ္စန္ဓာ၊ ဟတ္ထီ’တိ? ‘ဧဝံ၊ ဒေဝ၊ ဒိဋ္ဌော နော ဟတ္ထီ’တိ. ‘ဝဒေထ၊ ဇစ္စန္ဓာ၊ ကီဒိသော ဟတ္ထီ’တိ?

‘‘ယေဟိ၊ ဘိက္ခဝေ၊ ဇစ္စန္ဓေဟိ ဟတ္ထိဿ သီသံ ဒိဋ္ဌံ အဟောသိ၊ တေ ဧဝမာဟံသု – ‘ဧဒိသော၊ ဒေဝ၊ ဟတ္ထီ သေယျထာပိ ကုမ္ဘော’တိ.

‘‘ယေဟိ၊ ဘိက္ခဝေ၊ ဇစ္စန္ဓေဟိ ဟတ္ထိဿ ကဏ္ဏော ဒိဋ္ဌော အဟောသိ၊ တေ ဧဝမာဟံသု – ‘ဧဒိသော၊ ဒေဝ၊ ဟတ္ထီ သေယျထာပိ သုပ္ပေါ’တိ.

‘‘ယေဟိ၊ ဘိက္ခဝေ၊ ဇစ္စန္ဓေဟိ ဟတ္ထိဿ ဒန္တော ဒိဋ္ဌော အဟောသိ၊ တေ ဧဝမာဟံသု – ‘ဧဒိသော၊ ဒေဝ၊ ဟတ္ထီ သေယျထာပိ ခီလော’တိ.

‘‘ယေဟိ၊ ဘိက္ခဝေ၊ ဇစ္စန္ဓေဟိ ဟတ္ထိဿ သောဏ္ဍော ဒိဋ္ဌော အဟောသိ၊ တေ ဧဝမာဟံသု – ‘ဧဒိသော၊ ဒေဝ၊ ဟတ္ထီ သေယျထာပိ နင်္ဂလီသာ’တိ.

‘‘ယေဟိ၊ ဘိက္ခဝေ၊ ဇစ္စန္ဓေဟိ ဟတ္ထိဿ ကာယော ဒိဋ္ဌော အဟောသိ၊ တေ ဧဝမာဟံသု – ‘ဧဒိသော၊ ဒေဝ၊ ဟတ္ထီ သေယျထာပိ ကောဋ္ဌော’တိ.

‘‘ယေဟိ၊ ဘိက္ခဝေ၊ ဇစ္စန္ဓေဟိ ဟတ္ထိဿ ပါဒေါ ဒိဋ္ဌော အဟောသိ၊ တေ ဧဝမာဟံသု – ‘ဧဒိသော၊ ဒေဝ၊ ဟတ္ထီ သေယျထာပိ ထူဏော’တိ.

‘‘ယေဟိ၊ ဘိက္ခဝေ၊ ဇစ္စန္ဓေဟိ ဟတ္ထိဿ သတ္ထိ ဒိဋ္ဌော [ပိဋ္ဌိ ဒိဋ္ဋာ (က. သီ. သျာ. ပီ.)၊ သတ္ထိ ဒိဋ္ဌာ (က. သီ.)] ဟောသိ၊ တေ ဧဝမာဟံသု – ‘ဧဒိသော၊ ဒေဝ၊ ဟတ္ထီ သေယျထာပိ ဥဒုက္ခလော’တိ.

‘‘ယေဟိ၊ ဘိက္ခဝေ၊ ဇစ္စန္ဓေဟိ ဟတ္ထိဿ နင်္ဂုဋ္ဌံ ဒိဋ္ဌံ အဟောသိ၊ တေ ဧဝမာဟံသု – ‘ဧဒိသော၊ ဒေဝ၊ ဟတ္ထီ သေယျထာပိ မုသလော’တိ.

‘‘ယေဟိ၊ ဘိက္ခဝေ၊ ဇစ္စန္ဓေဟိ ဟတ္ထိဿ ဝါလဓိ ဒိဋ္ဌော အဟောသိ၊ တေ ဧဝမာဟံသု – ‘ဧဒိသော၊ ဒေဝ၊ ဟတ္ထီ သေယျထာပိ သမ္မဇ္ဇနီ’တိ.

‘‘တေ ‘ဧဒိသော ဟတ္ထီ၊ နေဒိသော ဟတ္ထီ၊ နေဒိသော ဟတ္ထီ၊ ဧဒိသော ဟတ္ထီ’’’တိ အညမညံ မုဋ္ဌီဟိ သံသုမ္ဘိံသု [သံယုဇ္ဈိံသု (က. သီ.၊ သျာ. ပီ.)]. တေန စ ပန၊ ဘိက္ခဝေ၊ သော ရာဇာ အတ္တမနော အဟောသိ.

‘‘ဧဝမေဝ ခေါ၊ ဘိက္ခဝေ၊ အညတိတ္ထိယာ ပရိဗ္ဗာဇကာ အန္ဓာ အစက္ခုကာ. တေ အတ္ထံ န ဇာနန္တိ အနတ္ထံ န ဇာနန္တိ၊ ဓမ္မံ န ဇာနန္တိ အဓမ္မံ န ဇာနန္တိ. တေ အတ္ထံ အဇာနန္တာ အနတ္ထံ အဇာနန္တာ၊ ဓမ္မံ အဇာနန္တာ အဓမ္မံ အဇာနန္တာ ဘဏ္ဍနဇာတာ ကလဟဇာတာ ဝိဝါဒါပန္နာ အညမညံ မုခသတ္တီဟိ ဝိတုဒန္တာ ဝိဟရန္တိ – ‘ဧဒိသော ဓမ္မော၊ နေဒိသော ဓမ္မော၊ နေဒိသော ဓမ္မော၊ ဧဒိသော ဓမ္မော’’’တိ.

အထ ခေါ ဘဂဝါ ဧတမတ္ထံ ဝိဒိတွာ တာယံ ဝေလာယံ ဣမံ ဥဒါနံ ဥဒါနေသိ –

‘‘ဣမေသု ကိရ သဇ္ဇန္တိ၊ ဧကေ သမဏဗြာဟ္မဏာ၊

ဝိဂ္ဂယှ နံ ဝိဝဒန္တိ၊ ဇနာ ဧကင်္ဂဒဿိနော’’တိ. စတုတ္ထံ၊