၆. အဘိရူပနန္ဒာထေရီအပဒါနံ
၁၄၃. ‘‘ဧကနဝုတိတော ကပ္ပေ၊ ဝိပဿီ နာမ နာယကော၊
ဥပ္ပဇ္ဇိ စာရုဒဿနော၊ သဗ္ဗဓမ္မေသု စက္ခုမာ.
၁၄၄. ‘‘တဒါဟံ ဗန္ဓုမတိယံ၊ ဣဒ္ဓေ ဖီတေ မဟာကုလေ၊
ဇာတာ သုရူပါ ဒယိတာ၊ ပူဇနီယာ ဇနဿ စ.
၁၄၅. ‘‘ဥပဂန္တွာ မဟာဝီရံ၊ ဝိပဿိံ လောကနာယကံ၊
ဓမ္မံ သုဏိတွာ သရဏံ၊ ဥပေသိံ နရနာယကံ.
၁၄၆. ‘‘သီလေသု သံဝုတာ ဟုတွာ၊ နိဗ္ဗုတေ စ နရုတ္တမေ၊
ဓာတုထူပဿ ဥပရိ၊ သောဏ္ဏစ္ဆတ္တမပူဇယိံ.
၁၄၇. ‘‘မုတ္တစာဂါ သီလဝတီ၊ ယာဝဇီဝံ တတော စုတာ၊
ဇဟိတွာ မာနုသံ ဒေဟံ၊ တာဝတိံသူပဂါ အဟံ.
၁၄၈. ‘‘တဒါ ဒသဟိ ဌာနေဟိ၊ အဓိဘောတွာန သေသကေ [အဓိဘောတွာ အသေသတော (သျာ.)]၊
ရူပသဒ္ဒေဟိ ဂန္ဓေဟိ၊ ရသေဟိ ဖုသနေဟိ စ.
၁၄၉. ‘‘အာယုနာပိ စ ဝဏ္ဏေန၊ သုခေန ယသသာပိ စ၊
တထေဝါဓိပတေယျေန၊ အဓိဂယှ ဝိရောစဟံ.
၁၅၀. ‘‘ပစ္ဆိမေ စ ဘဝေ ဒါနိ၊ ဇာတာဟံ ကပိလဝှယေ၊
ဓီတာ ခေမကသက္ကဿ၊ နန္ဒာ နာမာတိ ဝိဿုတာ.
၁၅၁. ‘‘အဘိရူပသမ္ပဒမ္ပိ [အဘိရုပံ ဥပပဒံ (သီ.)၊ အဘိရုပံ ဥပ္ပါဒံ (ပီ.)]၊ အဟု မေ ကန္တိသူစကံ၊
ယဒါဟံ ယောဗ္ဗနပ္ပတ္တာ၊ ရူပလာဝညဘူသိတာ.
၁၅၂. ‘‘တဒါ [တဒါ မမတ္ထံ (သီ.)၊ ဣဓ မမတ္တေ (သျာ. က.)] မတ္ထေ သကျာနံ၊ ဝိဝါဒေါ သုမဟာ အဟု၊
ပဗ္ဗာဇေသိ တတော တာတော၊ မာ သကျာ ဝိနဿိံသုတိ.
၁၅၃. ‘‘ပဗ္ဗဇိတွာ တထာဂတံ၊ ရူပဒေဿိံ နရုတ္တမံ၊
သုတွာန နောပဂစ္ဆာမိ၊ မမ ရူပေန ဂဗ္ဗိတာ.
၁၅၄. ‘‘ဩဝါဒမ္ပိ န ဂစ္ဆာမိ၊ ဗုဒ္ဓဒဿနဘီရုတာ၊
တဒါ ဇိနော ဥပါယေန၊ ဥပနေတွာ သသန္တိကံ.
၁၅၅. ‘‘တိဿိတ္ထိယော [တိဿော ထီယော (သီ. ပီ.)] နိဒဿေသိ၊ ဣဒ္ဓိယာ မဂ္ဂကောဝိဒေါ၊
အစ္ဆရာရူပသဒိသံ၊ တရုဏိံ ဇရိတံ [ဇရိကံ (သျာ. က.)] မတံ.
၁၅၆. ‘‘တာယော ဒိသွာ သုသံဝိဂ္ဂါ၊ ဝိရတ္တာသေ ကဠေဝရေ၊
အဋ္ဌာသိံ ဘဝနိဗ္ဗိန္ဒာ၊ တဒါ မံ အာဟ နာယကော.
၁၅၇. ‘‘‘အာတုရံ အသုစိံ ပူတိံ၊ ပဿ နန္ဒေ သမုဿယံ၊
ဥဂ္ဃရန္တံ ပဂ္ဃရန္တံ၊ ဗာလာနံ အဘိနန္ဒိတံ.
၁၅၈. ‘‘‘အသုဘာယ စိတ္တံ ဘာဝေဟိ၊ ဧကဂ္ဂံ သုသမာဟိတံ၊
ယထာ ဣဒံ တထာ ဧတံ၊ ယထာ ဧတံ တထာ ဣဒံ.
၁၅၉. ‘‘‘ဧဝမေတံ အဝေက္ခန္တီ၊ ရတ္တိန္ဒိဝမတန္ဒိတာ၊
တတော သကာယ ပညာယ၊ အဘိနိဗ္ဗိဇ္ဈ ဝစ္ဆသိ’.
၁၆၀. ‘‘တဿာ မေ အပ္ပမတ္တာယ၊ ဝိစရန္တိယာ [ဝိစရန္တွာဓ (သီ.)၊ ဝိစိနန္တီဓ (သျာ. ပီ.)] ယောနိသော၊
ယထာဘူတံ အယံ ကာယော၊ ဒိဋ္ဌော သန္တရဗာဟိရော.
၁၆၁. ‘‘အထ နိဗ္ဗိန္ဒဟံ ကာယေ၊ အဇ္ဈတ္တဉ္စ ဝိရဇ္ဇဟံ၊
အပ္ပမတ္တာ ဝိသံယုတ္တာ၊ ဥပသန္တာမှိ နိဗ္ဗုတာ.
၁၆၂. ‘‘ဣဒ္ဓီသု စ ဝသီ ဟောမိ၊ ဒိဗ္ဗာယ သောတဓာတုယာ၊
စေတောပရိယဉာဏဿ၊ ဝသီ ဟောမိ မဟာမုနေ.
၁၆၃. ‘‘ပုဗ္ဗေနိဝါသံ ဇာနာမိ၊ ဒိဗ္ဗစက္ခု ဝိသောဓိတံ၊
သဗ္ဗာသဝပရိက္ခီဏာ၊ နတ္ထိ ဒါနိ ပုနဗ္ဘဝေါ.
၁၆၄. ‘‘အတ္ထဓမ္မနိရုတ္တီသု၊ ပဋိဘာနေ တထေဝ စ၊
ဉာဏံ မမ မဟာဝီရ၊ ဥပ္ပန္နံ တဝ သန္တိကေ.
၁၆၅. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝါ.
၁၆၆. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.
၁၆၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.
ဣတ္ထံ သုဒံ အဘိရူပနန္ဒာ ဘိက္ခုနီ ဣမာ ဂါထာယော အဘာသိတ္ထာတိ.
အဘိရူပနန္ဒာထေရိယာပဒါနံ ဆဋ္ဌံ.