၂. စတုရာသီတိဘိက္ခုနီသဟဿအပဒါနံ

၁၃. ‘‘စုလ္လာသီတိသဟဿာနိ၊ ဗြာဟ္မညကုလသမ္ဘဝါ [ဗြာဟ္မဏကုလသမ္ဘဝါ (သျာ. က.)]၊

သုခုမာလဟတ္ထပါဒါ၊ ပုရေ တုယှံ မဟာမုနေ.

၁၄. ‘‘ဝေဿသုဒ္ဒကုလေ ဇာတာ၊ ဒေဝါ နာဂါ စ ကိန္နရာ၊

စာတုဒ္ဒီပါ ဗဟူ ကညာ၊ ပုရေ တုယှံ မဟာမုနေ.

၁၅. ‘‘ကာစိ ပဗ္ဗဇိတာ အတ္ထိ၊ သဗ္ဗဒဿာဝိနော [သစ္စဒဿာဝိနော (သီ. ပီ.)] ဟူ၊

ဒေဝါ စ ကိန္နရာ နာဂါ၊ ဖုသိဿန္တိ အနာဂတေ.

၁၆. ‘‘အနုဘောတွာ ယသံ သဗ္ဗံ၊ ပတွာန သဗ္ဗသမ္ပဒါ၊

တုမှံ [တွယိ (သီ. ပီ.)] ပသာဒံ ပဋိလဒ္ဓါ၊ ဗုဇ္ဈိဿန္တိ အနာဂတေ.

၁၇. ‘‘အမှေ ဗြာဟ္မဏဓီတာ တု၊ ဗြာဟ္မညကုလသမ္ဘဝါ၊

ပေက္ခတော နော [လက္ခဏာ စ (သျာ.)] မဟာဝီရ၊ ပါဒေ ဝန္ဒာမ စက္ခုမ.

၁၈. ‘‘ဥပဟတာ ဘဝါ သဗ္ဗေ၊ မူလတဏှာ သမူဟတာ၊

သမုစ္ဆိန္နာ အနုသယာ၊ ပုညသင်္ခါရဒါလိတာ.

၁၉. ‘‘သမာဓိဂေါစရာ သဗ္ဗာ၊ သမာပတ္တိဝသီ ကတာ၊

ဈာနေန ဓမ္မရတိယာ၊ ဝိဟရိဿာမ နော သဒါ.

၂၀. ‘‘ဘဝနေတ္တိ အဝိဇ္ဇာ စ၊ သင်္ခါရာပိ စ ခေပိတာ၊

သုဒုဒ္ဒသံ ပဒံ ဂန္တွာ၊ အနုဇာနာထ [အနုဇာနိမှ (သျာ. ပီ. က.)] နာယက.

၂၁. ‘‘ဥပကာရာ မမံ တုမှေ၊ ဒီဃရတ္တံ ကတာဝိနော၊

စတုန္နံ သံသယံ ဆေတွာ၊ သဗ္ဗာ ဂစ္ဆန္တု နိဗ္ဗုတိံ.

၂၂. ‘‘ဝန္ဒိတွာ မုနိနော ပါဒေ၊ ကတွာ ဣဒ္ဓိဝိကုဗ္ဗနံ၊

ကာစိ ဒဿေန္တိ အာလောကံ၊ အန္ဓကာရမထာပရာ.

၂၃. ‘‘ဒဿေန္တိ စန္ဒသူရိယေ၊ သာဂရဉ္စ သမစ္ဆကံ၊

သိနေရုံ ပရိဘဏ္ဍဉ္စ၊ ဒဿေန္တိ ပါရိဆတ္တကံ.

၂၄. ‘‘တာဝတိံသဉ္စ ဘဝနံ၊ ယာမံ ဒဿေန္တိ ဣဒ္ဓိယာ၊

တုသိတံ နိမ္မိတေ ဒေဝေ၊ ဝသဝတ္တီ မဟိဿရေ.

၂၅. ‘‘ဗြဟ္မာနော ကာစိ ဒဿေန္တိ၊ စင်္ကမဉ္စ မဟာရဟံ၊

ဗြဟ္မဝဏ္ဏဉ္စ မာပေတွာ၊ ဓမ္မံ ဒေသေန္တိ သုညတံ.

၂၆. ‘‘နာနာဝိကုဗ္ဗနံ ကတွာ၊ ဣဒ္ဓိံ ဒဿိယ သတ္ထုနော၊

ဒဿယိံသု ဗလံ သဗ္ဗာ၊ ပါဒေ ဝန္ဒိံသု သတ္ထုနော.

၂၇. ‘‘ဣဒ္ဓီသု စ ဝသီ ဟောမ၊ ဒိဗ္ဗာယ သောတဓာတုယာ၊

စေတောပရိယဉာဏဿ၊ ဝသီ ဟောမ မဟာမုနေ.

၂၈. ‘‘ပုဗ္ဗေနိဝါသံ ဇာနာမ၊ ဒိဗ္ဗစက္ခု ဝိသောဓိတံ၊

သဗ္ဗာသဝပရိက္ခီဏာ၊ နတ္ထိ ဒါနိ ပုနဗ္ဘဝေါ.

၂၉. ‘‘အတ္ထဓမ္မနိရုတ္တီသု၊ ပဋိဘာနေ တထေဝ စ၊

ဉာဏံ အမှံ မဟာဝီရ၊ ဥပ္ပန္နံ တဝ သန္တိကေ.

၃၀. ‘‘ပုဗ္ဗာနံ လောကနာထာနံ၊ သင်္ဂမံ နော နိဒဿိတံ၊

အဓိကာရံ ဗဟုံ အမှံ၊ တုယှတ္ထာယ မဟာမုနေ.

၃၁. ‘‘ယံ အမှေဟိ ကတံ ကမ္မံ၊ ကုသလံ သရ တံ မုနေ၊

တုယှတ္ထာယ မဟာဝီရ၊ ပုညာနုပစိတာနိ နော.

၃၂. ‘‘သတသဟဿိတော ကပ္ပေ၊ ပဒုမုတ္တရော မဟာမုနိ၊

ပုရံ ဟံသဝတီ နာမ၊ သမ္ဗုဒ္ဓဿ ကုလာသယံ.

၃၃. ‘‘ဒွါရေန ဟံသဝတိယာ၊ ဂင်္ဂါ သန္ဒတိ သဗ္ဗဒါ၊

ဥဗ္ဗဠှာ နဒိယာ ဘိက္ခူ၊ ဂမနံ န လဘန္တိ တေ.

၃၄. ‘‘ဒိဝသံ ဒွေ တယော စေဝ၊ သတ္တာဟံ မာသိကံ တတော၊

စတုမာသမ္ပိ သမ္ပုဏ္ဏံ၊ ဂမနံ န လဘန္တိ တေ.

၃၅. ‘‘တဒါ အဟု သတ္တသာရော၊ ဇဋိလော နာမ ရဋ္ဌိကော၊

ဩရုဒ္ဓေ [ဩရတီရေ (သျာ.)] ဘိက္ခဝေါ ဒိသွာ၊ သေတုံ ဂင်္ဂါယ ကာရယိ.

၃၆. ‘‘တဒါ သတသဟဿေဟိ၊ သေတုံ ဂင်္ဂါယ ကာရယိ၊

သံဃဿ ဩရိမေ တီရေ၊ ဝိဟာရဉ္စ အကာရယိ.

၃၇. ‘‘ဣတ္ထိယော ပုရိသာ စေဝ၊ ဥစ္စနီစကုလာနိ စ၊

တဿ သေတုံ ဝိဟာရဉ္စ [တေသု သေတုဝိဟာရေသု (သီ.)၊ တဿ သေတူ ဝိဟာရေ စ (ပီ.)]၊ သမဘာဂံ အကံသု တေ.

၃၈. ‘‘အမှေ အညေ စ မာနုဇာ၊ ဝိပ္ပသန္နေန စေတသာ၊

တဿ ဓမ္မေသု ဒါယာဒါ၊ နဂရေ ဇနပဒေသု စ.

၃၉. ‘‘ဣတ္ထီ ပုမာ ကုမာရာ စ၊ ဗဟူ စေဝ ကုမာရိကာ၊

သေတုနော စ ဝိဟာရဿ၊ ဝါလုကာ အာကိရိံသု တေ.

၄၀. ‘‘ဝီထိံ သမ္မဇ္ဇနံ ကတွာ၊ ကဒလီပုဏ္ဏဃဋေ ဓဇေ၊

ဓူပံ စုဏ္ဏဉ္စ မာလဉ္စ၊ ကာရံ ကတွာန သတ္ထုနော.

၄၁. ‘‘သေတုဝိဟာရေ ကာရေတွာ၊ နိမန္တေတွာ ဝိနာယကံ၊

မဟာဒါနံ ဒဒိတွာန၊ သမ္ဗောဓိံ အဘိပတ္ထယိံ.

၄၂. ‘‘ပဒုမုတ္တရော မဟာဝီရော၊ တာရကော သဗ္ဗပါဏိနံ၊

အနုမောဒနီယံကာသိ၊ ဇဋိလဿ မဟာမုနိ [ကတွာ၊ ဝိယာကာသိ မဟာမုနိ (သျာ.)].

၄၃. ‘‘‘သတသဟဿာတိက္ကန္တေ၊ ကပ္ပေါ ဟေဿတိ ဘဒ္ဒကော၊

ဘဝါဘဝေနုဘောတွာန၊ ပါပုဏိဿတိ ဗောဓိယံ.

၄၄. ‘‘‘ကာစိ ဟတ္ထပရိကမ္မံ၊ ကတာဝီ နရနာရိယော၊

အနာဂတမှိ အဒ္ဓါနေ၊ သဗ္ဗာ ဟေဿန္တိ သမ္မုခါ’.

၄၅. ‘‘တေန ကမ္မဝိပါကေန၊ စေတနာပဏိဓီဟိ စ၊

ဥပ္ပန္နာ ဒေဝဘဝနံ၊ တုယှံ တာ ပရိစာရိကာ.

၄၆. ‘‘ဒိဗ္ဗသုခံ အသင်္ခိယံ၊ မာနုသဉ္စ အသင်္ခိယံ၊

တုယှံ တေ ပရိစာရေမ၊ သံသရိမှ ဘဝါဘဝေ.

၄၇. ‘‘သတသဟဿိတော ကပ္ပေ၊ သုကတံ ကမ္မသမ္ပဒံ၊

သုခုမာလီ မနုဿာနံ၊ အထော ဒေဝပုရေ ဝရေ.

၄၈. ‘‘ရူပဘောဂယသေ စေဝ၊ အထော ကိတ္တိဉ္စ သက္ကတံ [ကိတ္တိသုခံ ပိယံ (သျာ.)]၊

လဘာမ သတတံ သဗ္ဗံ၊ သုကတံ ကမ္မသမ္ပဒံ.

၄၉. ‘‘ပစ္ဆိမေ ဘဝေ သမ္ပတ္တေ၊ ဇာတာမှ ဗြာဟ္မဏေ ကုလေ၊

သုခုမာလဟတ္ထပါဒါ၊ သကျပုတ္တနိဝေသနေ.

၅၀. ‘‘သဗ္ဗကာလမ္ပိ ပထဝိံ၊ န ပဿာမ န လင်္ကတံ၊

စိက္ခလ္လဘူမိမသုစိံ [စိက္ခလ္လံ ဘူမိံ ဂမနံ (သျာ.)]၊ န ပဿာမ မဟာမုနေ.

၅၁. ‘‘အဂါရံ ဝသန္တေ အမှေ၊ သက္ကာရံ သဗ္ဗကာလိကံ၊

ဥပနေန္တိ သဒါ သဗ္ဗံ၊ ပုဗ္ဗကမ္မဖလေန နော [ပုဗ္ဗကမ္မဖလံ တတော (သီ. ပီ.)].

၅၂. ‘‘အဂါရံ ပဇဟိတွာန၊ ပဗ္ဗဇိတွာနဂါရိယံ၊

သံသာရပထနိတ္ထိဏ္ဏာ၊ ဝီတရာဂါ ဘဝါမသေ [နတ္ထိ ဒါနိ ပုနဗ္ဘဝေါ (သီ. သျာ. ပီ.)].

၅၃. ‘‘စီဝရံ ပိဏ္ဍပါတဉ္စ၊ ပစ္စယံ သယနာသနံ၊

ဥပနေန္တိ သဒါ အမှေ၊ သဟဿာနိ တတော တတော.

၅၄. ‘‘ကိလေသာ ဈာပိတာ အမှံ။ပေ။ ဝိဟရာမ အနာသဝါ.

၅၅. ‘‘သွာဂတံ ဝတ နော အာသိ။ပေ။ ကတံ ဗုဒ္ဓဿ သာသနံ.

၅၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ စတုရာသီတိဗြာဟ္မဏကညာဘိက္ခုနီသဟဿာနိ ဘဂဝတော သမ္မုခါ ဣမာ ဂါထာယော အဘာသိတ္ထာတိ.

စတုရာသီတိဘိက္ခုနီသဟဿာပဒါနံ ဒုတိယံ.