၂. ကိသာဂေါတမီထေရီအပဒါနံ
၅၅. ‘‘ပဒုမုတ္တရော နာမ ဇိနော၊ သဗ္ဗဓမ္မာန ပါရဂူ၊
ဣတော သတသဟဿမှိ၊ ကပ္ပေ ဥပ္ပဇ္ဇိ နာယကော.
၅၆. ‘‘တဒါဟံ ဟံသဝတိယံ၊ ဇာတာ အညတရေ ကုလေ၊
ဥပေတွာ တံ နရဝရံ၊ သရဏံ သမုပါဂမိံ.
၅၇. ‘‘ဓမ္မဉ္စ တဿ အဿောသိံ၊ စတုသစ္စူပသဉှိတံ၊
မဓုရံ ပရမဿာဒံ၊ ဝဋ္ဋသန္တိသုခါဝဟံ [စိတ္တသန္တိ ။ (သျာ.)].
၅၈. ‘‘တဒါ စ ဘိက္ခုနိံ ဝီရော၊ လူခစီဝရဓာရိနိံ၊
ဌပေန္တော ဧတဒဂ္ဂမှိ၊ ဝဏ္ဏယီ ပုရိသုတ္တမော.
၅၉. ‘‘ဇနေတွာနပ္ပကံ ပီတိံ၊ သုတွာ ဘိက္ခုနိယာ ဂုဏေ၊
ကာရံ ကတွာန ဗုဒ္ဓဿ၊ ယထာသတ္တိ ယထာဗလံ.
၆၀. ‘‘နိပစ္စ မုနိဝရံ တံ၊ တံ ဌာနမဘိပတ္ထယိံ၊
တဒါနုမောဒိ သမ္ဗုဒ္ဓေါ၊ ဌာနလာဘာယ နာယကော.
၆၁. ‘‘‘သတသဟဿိတော ကပ္ပေ၊ ဩက္ကာကကုလသမ္ဘဝေါ၊
ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ.
၆၂. ‘‘‘တဿ ဓမ္မေသု ဒါယာဒါ၊ ဩရသာ ဓမ္မနိမ္မိတာ၊
ကိသာဂေါတမီ [ဂေါတမီ နာမ (သီ. က.)] နာမေန၊ ဟေဿတိ သတ္ထု သာဝိကာ’.
၆၃. ‘‘တံ သုတွာ မုဒိတာ ဟုတွာ၊ ယာဝဇီဝံ တဒါ ဇိနံ၊
မေတ္တစိတ္တာ ပရိစရိံ၊ ပစ္စယေဟိ ဝိနာယကံ.
၆၄. ‘‘တေန ကမ္မေန သုကတေန၊ စေတနာပဏိဓီဟိ စ၊
ဇဟိတွာ မာနုသံ ဒေဟံ၊ တာဝတိံသမဂစ္ဆဟံ.
၆၅. ‘‘ဣမမှိ ဘဒ္ဒကေ ကပ္ပေ၊ ဗြဟ္မဗန္ဓု မဟာယသော၊
ကဿပေါ နာမ ဂေါတ္တေန၊ ဥပ္ပဇ္ဇိ ဝဒတံ ဝရော.
၆၆. ‘‘ဥပဋ္ဌာကော မဟေသိဿ၊ တဒါ အာသိ နရိဿရော၊
ကာသိရာဇာ ကိကီ နာမ၊ ဗာရာဏသိပုရုတ္တမေ.
၆၇. ‘‘ပဉ္စမီ တဿ ဓီတာသိံ၊ ဓမ္မာ နာမေန ဝိဿုတာ၊
ဓမ္မံ သုတွာ ဇိနဂ္ဂဿ၊ ပဗ္ဗဇ္ဇံ သမရောစယိံ.
၆၈. ‘‘အနုဇာနိ န နော တာတော၊ အဂါရေဝ တဒါ မယံ၊
ဝီသဝဿသဟဿာနိ၊ ဝိစရိမှ အတန္ဒိတာ.
၆၉. ‘‘ကောမာရိဗြဟ္မစရိယံ၊ ရာဇကညာ သုခေဓိတာ၊
ဗုဒ္ဓေါပဋ္ဌာနနိရတာ၊ မုဒိတာ သတ္တ ဓီတရော.
၇၀. ‘‘သမဏီ သမဏဂုတ္တာ စ၊ ဘိက္ခုနီ ဘိက္ခုဒါယိကာ၊
ဓမ္မာ စေဝ သုဓမ္မာ စ၊ သတ္တမီ သံဃဒါယိကာ.
၇၁. ‘‘ခေမာ ဥပ္ပလဝဏ္ဏာ စ၊ ပဋာစာရာ စ ကုဏ္ဍလာ၊
အဟဉ္စ ဓမ္မဒိန္နာ စ၊ ဝိသာခါ ဟောတိ သတ္တမီ.
၇၂. ‘‘တေဟိ ကမ္မေဟိ သုကတေဟိ၊ စေတနာပဏိဓီဟိ စ၊
ဇဟိတွာ မာနုသံ ဒေဟံ၊ တာဝတိံသမဂစ္ဆဟံ.
၇၃. ‘‘ပစ္ဆိမေ စ ဘဝေ ဒါနိ၊ ဇာတာ သေဋ္ဌိကုလေ အဟံ၊
ဒုဂ္ဂတေ အဓနေ နဋ္ဌေ [နီစေ (သျာ.)၊ နိဒ္ဓေ (ပီ.)]၊ ဂတာ စ သဓနံ ကုလံ.
၇၄. ‘‘ပတိံ ဌပေတွာ သေသာ မေ၊ ဒေဿန္တိ အဓနာ ဣတိ၊
ယဒါ စ ပသူတာ [သသုတာ (သီ. ပီ.)] အာသိံ၊ သဗ္ဗေသံ ဒယိတာ တဒါ.
၇၅. ‘‘ယဒါ သော တရုဏော ဘဒ္ဒေါ [ပုတ္တော (သီ. သျာ.)]၊ ကောမလကော [ကောမာရကော (သျာ.)၊ ကောမလင်္ဂေါ (သီ. ပီ.)] သုခေဓိတော၊
သပါဏမိဝ ကန္တော မေ၊ တဒါ ယမဝသံ ဂတော.
၇၆. ‘‘သောကဋ္ဋာ ဒီနဝဒနာ၊ အဿုနေတ္တာ ရုဒမ္မုခါ၊
မတံ ကုဏပမာဒါယ၊ ဝိလပန္တီ ဂမာမဟံ.
၇၇. ‘‘တဒါ ဧကေန သန္ဒိဋ္ဌာ၊ ဥပေတွာဘိသက္ကုတ္တမံ၊
အဝေါစံ ဒေဟိ ဘေသဇ္ဇံ၊ ပုတ္တသဉ္ဇီဝနန္တိ ဘော.
၇၈. ‘‘န ဝိဇ္ဇန္တေ မတာ ယသ္မိံ၊ ဂေဟေ သိဒ္ဓတ္ထကံ တတော၊
အာဟရာတိ ဇိနော အာဟ၊ ဝိနယောပါယကောဝိဒေါ.
၇၉. ‘‘တဒါ ဂမိတွာ သာဝတ္ထိံ၊ န လဘိံ တာဒိသံ ဃရံ၊
ကုတော သိဒ္ဓတ္ထကံ တသ္မာ၊ တတော လဒ္ဓါ သတိံ အဟံ.
၈၀. ‘‘ကုဏပံ ဆဍ္ဍယိတွာန၊ ဥပေသိံ လောကနာယကံ၊
ဒူရတောဝ မမံ ဒိသွာ၊ အဝေါစ မဓုရဿရော.
၈၁. ‘‘‘ယော စ ဝဿသတံ ဇီဝေ၊ အပဿံ ဥဒယဗ္ဗယံ၊
ဧကာဟံ ဇီဝိတံ သေယျော၊ ပဿတော ဥဒယဗ္ဗယံ.
၈၂. ‘‘‘န ဂါမဓမ္မော နိဂမဿ ဓမ္မော၊ န စာပိယံ ဧကကုလဿ ဓမ္မော၊
သဗ္ဗဿ လောကဿ သဒေဝကဿ၊ ဧသေဝ ဓမ္မော ယဒိဒံ အနိစ္စတာ’.
၈၃. ‘‘သာဟံ သုတွာနိမာ [သဟသုတွာနိမာ (က.)] ဂါထာ၊ ဓမ္မစက္ခုံ ဝိသောဓယိံ၊
တတော ဝိညာတသဒ္ဓမ္မာ၊ ပဗ္ဗဇိံ အနဂါရိယံ.
၈၄. ‘‘တထာ ပဗ္ဗဇိတာ သန္တီ၊ ယုဉ္ဇန္တီ ဇိနသာသနေ၊
န စိရေနေဝ ကာလေန၊ အရဟတ္တမပါပုဏိံ.
၈၅. ‘‘ဣဒ္ဓီသု စ ဝသီ ဟောမိ၊ ဒိဗ္ဗာယ သောတဓာတုယာ၊
ပရစိတ္တာနိ ဇာနာမိ၊ သတ္ထုသာသနကာရိကာ.
၈၆. ‘‘ပုဗ္ဗေနိဝါသံ ဇာနာမိ၊ ဒိဗ္ဗစက္ခု ဝိသောဓိတံ၊
ခေပေတွာ အာသဝေ သဗ္ဗေ၊ ဝိသုဒ္ဓါသိံ သုနိမ္မလာ.
၈၇. ‘‘ပရိစိဏ္ဏော မယာ သတ္ထာ၊ ကတံ ဗုဒ္ဓဿ သာသနံ၊
ဩဟိတော ဂရုကော ဘာရော၊ ဘဝနေတ္တိ သမူဟတာ.
၈၈. ‘‘ယဿတ္ထာယ ပဗ္ဗဇိတာ၊ အဂါရသ္မာနဂါရိယံ၊
သော မေ အတ္ထော အနုပ္ပတ္တော၊ သဗ္ဗသံယောဇနက္ခယော.
၈၉. ‘‘အတ္ထဓမ္မနိရုတ္တီသု၊ ပဋိဘာနေ တထေဝ စ၊
ဉာဏံ မေ ဝိမလံ သုဒ္ဓံ၊ ဗုဒ္ဓသေဋ္ဌဿ ဝါဟသာ.
၉၀. ‘‘သင်္ကာရကူဋာ အာဟိတွာ၊ သုသာနာ ရထိယာပိ စ၊
တတော သင်္ဃာဋိကံ ကတွာ၊ လူခံ ဓာရေမိ စီဝရံ.
၉၁. ‘‘ဇိနော တသ္မိံ ဂုဏေ တုဋ္ဌော၊ လူခစီဝရဓာရဏေ၊
ဌပေသိ ဧတဒဂ္ဂမှိ၊ ပရိသာသု ဝိနာယကော.
၉၂. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝါ.
၉၃. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.
၉၄. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.
ဣတ္ထံ သုဒံ ကိသာဂေါတမီ ဘိက္ခုနီ ဣမာ ဂါထာယော အဘာသိတ္ထာတိ.
ကိသာဂေါတမီထေရိယာပဒါနံ ဒုတိယံ.