၁၀. ယသောဓရာပမုခအဋ္ဌာရသဘိက္ခုနီသဟဿအပဒါနံ

၄၂၆. ‘‘အဋ္ဌာရသသဟဿာနိ၊ ဘိက္ခုနီ သကျသမ္ဘဝါ၊

ယသောဓရာပမုခါနိ၊ သမ္ဗုဒ္ဓံ ဥပသင်္ကမုံ.

၄၂၇. ‘‘အဋ္ဌာရသသဟဿာနိ၊ သဗ္ဗာ ဟောန္တိ မဟိဒ္ဓိကာ၊

ဝန္ဒန္တီ မုနိနော ပါဒေ၊ အာရောစေန္တိ ယထာဗလံ.

၄၂၈. ‘‘‘ဇာတိ ခီဏာ ဇရာ ဗျာဓိ၊ မရဏဉ္စ မဟာမုနိ၊

အနာသဝံ ပဒံ သန္တံ၊ အမတံ ယာမ နာယက.

၄၂၉. ‘‘‘ခလိတဉ္စေ ပုရေ အတ္ထိ၊ သဗ္ဗာသမ္ပိ မဟာမုနိ၊

အပရာဓမဇာနန္တီ၊ ခမ အမှံ ဝိနာယက.

၄၃၀. ‘‘‘ဣဒ္ဓိဉ္စာပိ နိဒဿေထ၊ မမ သာသနကာရိကာ၊

ပရိသာနဉ္စ သဗ္ဗာသံ၊ ကင်္ခံ ဆိန္ဒထ ယာဝတာ.

၄၃၁. ‘‘‘ယသောဓရာ မဟာဝီရ၊ မနာပါ ပိယဒဿနာ၊

သဗ္ဗာ တုယှံ မဟာဝီရ၊ အဂါရသ္မိံ ပဇာပတိ.

၄၃၂. ‘‘‘ထီနံ သတသဟဿာနံ၊ နဝုတီနံ ဆဒုတ္တရိ၊

အဂါရေ တေ မယံ ဝီရ၊ ပါမောက္ခာ သဗ္ဗာ ဣဿရာ.

၄၃၃. ‘‘‘ရူပါစာရဂုဏူပေတာ၊ ယောဗ္ဗနဋ္ဌာ ပိယံဝဒါ၊

သဗ္ဗာ နော အပစာယန္တိ၊ ဒေဝတာ ဝိယ မာနုသာ.

၄၃၄. ‘‘‘အဋ္ဌာရသသဟဿာနိ၊ သဗ္ဗာ သာကိယသမ္ဘဝါ၊

ယသောဓရာသဟဿာနိ၊ ပါမောက္ခာ ဣဿရာ တဒါ.

၄၃၅. ‘‘‘ကာမဓာတုမတိက္ကမ္မ၊ သဏ္ဌိတာ ရူပဓာတုယာ၊

ရူပေန သဒိသာ နတ္ထိ၊ သဟဿာနံ မဟာမုနိ.

၄၃၆. ‘‘‘သမ္ဗုဒ္ဓံ အဘိဝါဒေတွာ၊ ဣဒ္ဓိံ ဒဿံသု သတ္ထုနော၊

နေကာ နာနာဝိဓာကာရာ၊ မဟာဣဒ္ဓီပိ ဒဿယုံ.

၄၃၇. ‘‘‘စက္ကဝါဠသမံ ကာယံ၊ သီသံ ဥတ္တရတော ကုရု၊

ဥဘော ပက္ခာ ဒုဝေ ဒီပါ၊ ဇမ္ဗုဒီပံ သရီရတော.

၄၃၈. ‘‘‘ဒက္ခိဏဉ္စ သရံ ပိဉ္ဆံ၊ နာနာသာခါ တု ပတ္တကာ၊

စန္ဒဉ္စ သူရိယဉ္စက္ခိ၊ မေရုပဗ္ဗတတော သိခံ.

၄၃၉. ‘‘‘စက္ကဝါဠဂိရိံ တုဏ္ဍံ၊ ဇမ္ဗုရုက္ခံ သမူလကံ၊

ဗီဇမာနာ ဥပါဂန္တွာ၊ ဝန္ဒန္တီ လောကနာယကံ.

၄၄၀. ‘‘‘ဟတ္ထိဝဏ္ဏံ တထေဝဿံ၊ ပဗ္ဗတံ ဇလဓိံ တထာ၊

စန္ဒဉ္စ သူရိယံ မေရုံ၊ သက္ကဝဏ္ဏဉ္စ ဒဿယုံ.

၄၄၁. ‘‘‘ယသောဓရာ မယံ ဝီရ၊ ပါဒေ ဝန္ဒာမ စက္ခုမ၊

တဝ စိရပဘာဝေန၊ နိပ္ဖန္နာ နရနာယက.

၄၄၂. ‘‘‘ဣဒ္ဓီသု စ ဝသီ ဟောမ၊ ဒိဗ္ဗာယ သောတဓာတုယာ၊

စေတောပရိယဉာဏဿ၊ ဝသီ ဟောမ မဟာမုနေ.

၄၄၃. ‘‘‘ပုဗ္ဗေနိဝါသံ ဇာနာမ၊ ဒိဗ္ဗစက္ခု ဝိသောဓိတံ၊

သဗ္ဗာသဝပရိက္ခီဏာ၊ နတ္ထိ ဒါနိ ပုနဗ္ဘဝေါ.

၄၄၄. ‘‘‘အတ္ထဓမ္မနိရုတ္တီသု၊ ပဋိဘာနေ တထေဝ စ၊

ဉာဏံ အမှံ မဟာဝီရ၊ ဥပ္ပန္နံ တဝ သန္တိကေ.

၄၄၅. ‘‘‘ပုဗ္ဗာနံ လောကနာထာနံ၊ သင်္ဂမံ နော နိဒဿိတံ၊

အဓိကာရာ ဗဟူ အမှံ၊ တုယှတ္ထာယ မဟာမုနေ.

၄၄၆. ‘‘‘ယံ အမှံ ပူရိတံ ကမ္မံ၊ ကုသလံ သရသေ မုနေ၊

တုယှတ္ထာယ မဟာဝီရ၊ ပုညာနုပစိတာနိ နော.

၄၄၇. ‘‘‘အဘဗ္ဗဋ္ဌာနေ ဝဇ္ဇေတွာ၊ ဝါရယိမှ အနာစရံ၊

တုယှတ္ထာယ မဟာဝီရ၊ စတ္တာနိ ဇီဝိတာနိ နော [သဉ္စတ္တံ ဇီဝိတမ္ပိ နော (သျာ.)].

၄၄၈. ‘‘‘နေကကောဋိသဟဿာနိ၊ ဘရိယတ္ထာယဒါသိ နော၊

န တတ္ထ ဝိမနာ ဟောမ၊ တုယှတ္ထာယ မဟာမုနေ.

၄၄၉. ‘‘‘နေကကောဋိသဟဿာနိ၊ ဥပကာရာယဒါသိ နော၊

န တတ္ထ ဝိမနာ ဟောမ၊ တုယှတ္ထာယ မဟာမုနေ.

၄၅၀. ‘‘‘နေကကောဋိသဟဿာနိ၊ ဘောဇနတ္ထာယဒါသိ နော၊

န တတ္ထ ဝိမနာ ဟောမ၊ တုယှတ္ထာယ မဟာမုနေ.

၄၅၁. ‘‘‘နေကကောဋိသဟဿာနိ၊ ဇီဝိတာနိ စဇိမှသေ [စဇိမှ နော (ပီ. က.)]၊

ဘယမောက္ခံ ကရိဿာမ၊ ဇီဝိတာနိ စဇိမှသေ.

၄၅၂. ‘‘‘အင်္ဂဂတေ အလင်္ကာရေ၊ ဝတ္ထေ နာနာဝိဓေ ဗဟူ၊

ဣတ္ထိဘဏ္ဍေ န ဂူဟာမ၊ တုယှတ္ထာယ မဟာမုနေ.

၄၅၃. ‘‘‘ဓနဓညပရိစ္စာဂံ၊ ဂါမာနိ နိဂမာနိ စ၊

ခေတ္တံ ပုတ္တာ စ ဓီတာ စ၊ ပရိစ္စတ္တာ မဟာမုနေ.

၄၅၄. ‘‘‘ဟတ္ထီ အဿာ ဂဝါ စာပိ၊ ဒါသိယော ပရိစာရိကာ၊

တုယှတ္ထာယ မဟာဝီရ၊ ပရိစ္စတ္တံ အသင်္ခိယံ.

၄၅၅. ‘‘‘ယံ အမှေ ပဋိမန္တေသိ၊ ဒါနံ ဒဿာမ ယာစကေ၊

ဝိမနံ နော န ပဿာမ၊ ဒဒတော ဒါနမုတ္တမံ.

၄၅၆. ‘‘‘နာနာဝိဓံ ဗဟုံ ဒုက္ခံ၊ သံသာရေ စ ဗဟုဗ္ဗိဓေ၊

တုယှတ္ထာယ မဟာဝီရ၊ အနုဘုတ္တံ အသင်္ခိယံ.

၄၅၇. ‘‘‘သုခပ္ပတ္တာနုမောဒါမ၊ န စ ဒုက္ခေသု ဒုမ္မနာ၊

သဗ္ဗတ္ထ တုလိတာ ဟောမ၊ တုယှတ္ထာယ မဟာမုနေ.

၄၅၈. ‘‘‘အနုမဂ္ဂေန သမ္ဗုဒ္ဓေါ၊ ယံ ဓမ္မံ အဘိနီဟရိ၊

အနုဘောတွာ သုခံ ဒုက္ခံ၊ ပတ္တော ဗောဓိံ မဟာမုနေ.

၄၅၉. ‘‘‘ဗြဟ္မဒေဝဉ္စ သမ္ဗုဒ္ဓံ၊ ဂေါတမံ လောကနာယကံ၊

အညေသံ လောကနာထာနံ၊ သင်္ဂမံ တေဟိ နော ဗဟူ.

၄၆၀. ‘‘‘အဓိကာရံ ဗဟုံ အမှေ၊ တုယှတ္ထာယ မဟာမုနေ၊

ဂဝေသတော ဗုဒ္ဓဓမ္မေ၊ မယံ တေ ပရိစာရိကာ.

၄၆၁. ‘‘‘ကပ္ပေ စ သတသဟဿေ၊ စတုရော စ အသင်္ခိယေ၊

ဒီပင်္ကရော မဟာဝီရော၊ ဥပ္ပဇ္ဇိ လောကနာယကော.

၄၆၂. ‘‘‘ပစ္စန္တဒေသဝိသယေ၊ နိမန္တေတွာ တထာဂတံ၊

တဿ အာဂမနံ မဂ္ဂံ၊ သောဓေန္တိ တုဋ္ဌမာနသာ.

၄၆၃. ‘‘‘တေန ကာလေန သော အာသိ၊ သုမေဓော နာမ ဗြာဟ္မဏော၊

မဂ္ဂဉ္စ ပဋိယာဒေသိ၊ အာယတော သဗ္ဗဒဿိနော.

၄၆၄. ‘‘‘တေန ကာလေန အဟုမှ၊ သဗ္ဗာ ဗြာဟ္မဏသမ္ဘဝါ၊

ထလူဒဇာနိ ပုပ္ဖါနိ၊ အာဟရိမှ သမာဂမံ.

၄၆၅. ‘‘‘တသ္မိံ သော သမယေ ဗုဒ္ဓေါ၊ ဒီပင်္ကရော မဟာယသော၊

ဝိယာကာသိ မဟာဝီရော၊ ဣသိမုဂ္ဂတမာနသံ.

၄၆၆. ‘‘‘စလတီ ရဝတီ ပုထဝီ၊ သင်္ကမ္ပတိ သဒေဝကေ၊

တဿ ကမ္မံ ပကိတ္တေန္တေ၊ ဣသိမုဂ္ဂတမာနသံ.

၄၆၇. ‘‘‘ဒေဝကညာ မနုဿာ စ၊ မယဉ္စာပိ သဒေဝကာ၊

နာနာပူဇနီယံ ဘဏ္ဍံ၊ ပူဇယိတွာန ပတ္ထယုံ.

၄၆၈. ‘‘‘တေသံ ဗုဒ္ဓေါ ဝိယာကာသိ၊ ဇောတိဒီပ သနာမကော၊

အဇ္ဇ ယေ ပတ္ထိတာ အတ္ထိ၊ တေ ဘဝိဿန္တိ သမ္မုခါ.

၄၆၉. ‘‘‘အပရိမေယျေ ဣတော ကပ္ပေ၊ ယံ နော ဗုဒ္ဓေါ ဝိယာကရိ၊

တံ ဝါစမနုမောဒေန္တာ၊ ဧဝံကာရီ အဟုမှ နော.

၄၇၀. ‘‘‘တဿ ကမ္မဿ သုကတဿ၊ တဿ စိတ္တံ ပသာဒယုံ၊

ဒေဝမာနုသိကံ ယောနိံ၊ အနုဘောတွာ အသင်္ခိယံ.

၄၇၁. ‘‘‘သုခဒုက္ခေနုဘောတွာန၊ ဒေဝေသု မာနုသေသု စ၊

ပစ္ဆိမေ ဘဝေ သမ္ပတ္တေ၊ ဇာတာမှ သာကိယေ ကုလေ.

၄၇၂. ‘‘‘ရူပဝတီ ဘောဂဝတီ၊ ယသသီလဝတီ တတော၊

သဗ္ဗင်္ဂသမ္ပဒါ ဟောမ၊ ကုလေသု အဘိသက္ကတာ.

၄၇၃. ‘‘‘လာဘံ သိလောကံ သက္ကာရံ၊ လောကဓမ္မသမာဂမံ၊

စိတ္တဉ္စ ဒုက္ခိတံ နတ္ထိ၊ ဝသာမ အကုတောဘယာ.

၄၇၄. ‘‘‘ဝုတ္တဉှေတံ ဘဂဝတာ၊ ရညော အန္တေပုရေ တဒါ၊

ခတ္တိယာနံ ပုရေ ဝီရ [တာသံ (သျာ.)]၊ ဥပကာရဉ္စ နိဒ္ဒိသိ.

၄၇၅. ‘‘‘ဥပကာရာ စ ယာ နာရီ၊ ယာ စ နာရီ သုခေ ဒုခေ၊

အတ္ထက္ခာယီ စ ယာ နာရီ၊ ယာ စ နာရီနုကမ္ပိကာ.

၄၇၆. ‘‘‘ဓမ္မံ စရေ သုစရိတံ၊ န နံ ဒုစ္စရိတံ စရေ၊

ဓမ္မစာရီ သုခံ သေတိ၊ အသ္မိံ လောကေ ပရမှိ စ.

၄၇၇. ‘‘‘အဂါရံ ဝိဇဟိတွာန၊ ပဗ္ဗဇိမှနဂါရိယံ၊

အဍ္ဎမာသေ အသမ္ပတ္တေ၊ စတုသစ္စံ ဖုသိမှ နော.

၄၇၈. ‘‘‘စီဝရံ ပိဏ္ဍပါတဉ္စ၊ ပစ္စယံ သယနာသနံ၊

ဥပနေန္တိ ဗဟူ အမှေ၊ သာဂရဿေဝ ဦမိယော.

၄၇၉. ‘‘‘ကိလေသာ ဈာပိတာ အမှံ [မယှံ (သျာ.)၊ အမှာကံ (က.)]၊ ဘဝါ သဗ္ဗေ သမူဟတာ၊

နာဂီဝ ဗန္ဓနံ ဆေတွာ၊ ဝိဟရာမ အနာသဝါ.

၄၈၀. ‘‘‘သွာဂတံ ဝတ နော အာသိ၊ မမ ဗုဒ္ဓဿ သန္တိကေ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၄၈၁. ‘‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’.

၄၈၂. ‘‘ဧဝံ ဗဟုဝိဓံ ဒုက္ခံ၊ သမ္ပတ္တီ စ ဗဟုဗ္ဗိဓာ၊

ဝိသုဒ္ဓဘာဝံ သမ္ပတ္တာ၊ လဘာမ သဗ္ဗသမ္ပဒါ.

၄၈၃. ‘‘ယာ ဒဒန္တိ သကတ္တာနံ၊ ပုညတ္ထာယ မဟေသိနော၊

သဟာယသမ္ပဒါ ဟောန္တိ၊ နိဗ္ဗာနပဒမသင်္ခတံ.

၄၈၄. ‘‘ပရိက္ခီဏံ အတီတဉ္စ၊ ပစ္စုပ္ပန္နံ အနာဂတံ၊

သဗ္ဗကမ္မမ္ပိ နော ခီဏံ၊ ပါဒေ ဝန္ဒာမ စက္ခုမ.

၄၈၅. ‘‘နိဗ္ဗာနာယ ဝဒန္တီနံ၊ ကိံ ဝေါ ဝက္ခာမ ဥတ္တရိ၊

သန္တသင်္ခတဒေါသဉှိ၊ ပပ္ပေါထ [သန္တသင်္ခတဒေါသော ယော၊ ပဇ္ဇောတံ (သျာ. ပီ. က.)] အမတံ ပဒံ’’.

ဣတ္ထံ သုဒံ ယသောဓရာပမုခါနိ အဋ္ဌာရသဘိက္ခုနီသဟဿာနိ ဘဂဝတော သမ္မုခါ ဣမာ ဂါထာယော အဘာသိတ္ထာတိ.

ယသောဓရာပမုခအဋ္ဌာရသဘိက္ခုနီသဟဿာပဒါနံ ဒသမံ.

ကုဏ္ဍလကေသီဝဂ္ဂေါ တတိယော.