၉. ပဉ္စဒီပိကာထေရီအပဒါနံ

၉၁. ‘‘နဂရေ ဟံသဝတိယာ၊ စာရိကီ [စာရိနိံ (သျာ.)] အာသဟံ တဒါ၊

အာရာမေန စ အာရာမံ၊ စရာမိ ကုသလတ္ထိကာ.

၉၂. ‘‘ကာဠပက္ခမှိ ဒိဝသေ၊ အဒ္ဒသံ ဗောဓိမုတ္တမံ၊

တတ္ထ စိတ္တံ ပသာဒေတွာ၊ ဗောဓိမူလေ နိသီဒဟံ.

၉၃. ‘‘ဂရုစိတ္တံ ဥပဋ္ဌေတွာ၊ သိရေ ကတွာန အဉ္ဇလိံ၊

သောမနဿံ ပဝေဒေတွာ၊ ဧဝံ စိန္တေသိ တာဝဒေ.

၉၄. ‘‘‘ယဒိ ဗုဒ္ဓေါ အမိတဂုဏော၊ အသမပ္ပဋိပုဂ္ဂလော၊

ဒဿေတု ပါဋိဟီရံ မေ၊ ဗောဓိ ဩဘာသတု အယံ’.

၉၅. ‘‘သဟ အာဝဇ္ဇိတေ မယှံ၊ ဗောဓိ ပဇ္ဇလိ တာဝဒေ၊

သဗ္ဗသောဏ္ဏမယာ အာသိ၊ ဒိသာ သဗ္ဗာ ဝိရောစတိ.

၉၆. ‘‘သတ္တရတ္တိန္ဒိဝံ [သတ္တရတ္တိဒိဝံ (ပီ. က.)] တတ္ထ၊ ဗောဓိမူလေ နိသီဒဟံ၊

သတ္တမေ ဒိဝသေ ပတ္တေ၊ ဒီပပူဇံ အကာသဟံ.

၉၇. ‘‘အာသနံ ပရိဝါရေတွာ၊ ပဉ္စဒီပါနိ ပဇ္ဇလုံ၊

ယာဝ ဥဒေတိ သူရိယော၊ ဒီပါ မေ ပဇ္ဇလုံ တဒါ.

၉၈. ‘‘တေန ကမ္မေန သုကတေန၊ စေတနာပဏိဓီဟိ စ၊

ဇဟိတွာ မာနုသံ ဒေဟံ၊ တာဝတိံသမဂစ္ဆဟံ.

၉၉. ‘‘တတ္ထ မေ သုကတံ ဗျမှံ၊ ပဉ္စဒီပါတိ ဝုစ္စတိ၊

သဋ္ဌိယောဇနမုဗ္ဗေဓံ [သတယောဇနမုဗ္ဗေဓံ (သီ. သျာ. ပီ.)]၊ တိံသယောဇနဝိတ္ထတံ [သဋ္ဌိ။ (သျာ. ပီ.)].

၁၀၀. ‘‘အသင်္ခိယာနိ ဒီပါနိ၊ ပရိဝါရေ ဇလန္တိ မေ၊

ယာဝတာ ဒေဝဘဝနံ၊ ဒီပါလောကေန ဇောတတိ.

၁၀၁. ‘‘ပရမ္မုခါ နိသီဒိတွာ [ပုရတ္ထာဘိမုခါ သန္တိ (သျာ.)၊ ပုရတ္ထာဘိမုခါ ထိတာ (ပီ.)]၊ ယဒိ ဣစ္ဆာမိ ပဿိတုံ၊

ဥဒ္ဓံ အဓော စ တိရိယံ၊ သဗ္ဗံ ပဿာမိ စက္ခုနာ.

၁၀၂. ‘‘ယာဝတာ အဘိကင်္ခါမိ၊ ဒဋ္ဌုံ သုဂတဒုဂ္ဂတေ [သုကတဒုက္ကတေ (ပီ.]၊

တတ္ထ အာဝရဏံ နတ္ထိ၊ ရုက္ခေသု ပဗ္ဗတေသု ဝါ.

၁၀၃. ‘‘အသီတိ ဒေဝရာဇူနံ၊ မဟေသိတ္တမကာရယိံ၊

သတာနံ စက္ကဝတ္တီနံ၊ မဟေသိတ္တမကာရယိံ.

၁၀၄. ‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ၊

ဒီပသတသဟဿာနိ၊ ပရိဝါရေ ဇလန္တိ မေ.

၁၀၅. ‘‘ဒေဝလောကာ စဝိတွာန၊ ဥပ္ပဇ္ဇိံ မာတုကုစ္ဆိယံ၊

မာတုကုစ္ဆိဂတာ သန္တီ [မာတုကုစ္ဆိဂတံ သန္တိံ (သီ.)]၊ အက္ခိ မေ န နိမီလတိ.

၁၀၆. ‘‘ဒီပသတသဟဿာနိ၊ ပုညကမ္မသမင်္ဂိတာ၊

ဇလန္တိ သူတိကာဂေဟေ [သူတိဃရေ ပဇ္ဇလန္တိ (သဗ္ဗတ္ထ)]၊ ပဉ္စဒီပါနိဒံ ဖလံ.

၁၀၇. ‘‘ပစ္ဆိမေ ဘဝေ သမ္ပတ္တေ၊ မာနသံ ဝိနိဝတ္တယိံ၊

အဇရာမတံ သီတိဘာဝံ၊ နိဗ္ဗာနံ ဖဿယိံ အဟံ.

၁၀၈. ‘‘ဇာတိယာ သတ္တဝဿာဟံ၊ အရဟတ္တမပါပုဏိံ၊

ဥပသမ္ပာဒယီ ဗုဒ္ဓေါ၊ ဂုဏမညာယ ဂေါတမော.

၁၀၉. ‘‘မဏ္ဍပေ ရုက္ခမူလေ ဝါ၊ ပါသာဒေသု ဂုဟာသု ဝါ၊

သုညာဂါရေ ဝသန္တိယာ [စ ဈာယန္တေ (သီ.)၊ စ ဈာယန္တာ (ပီ.)၊ ပဇ္ဈာယန္တာ (သျာ.)]၊ ပဉ္စဒီပါ ဇလန္တိ မေ.

၁၁၀. ‘‘ဒိဗ္ဗစက္ခု ဝိသုဒ္ဓံ မေ၊ သမာဓိကုသလာ အဟံ၊

အဘိညာပါရမိပ္ပတ္တာ၊ ပဉ္စဒီပါနိဒံ ဖလံ.

၁၁၁. ‘‘သဗ္ဗဝေါသိတဝေါသာနာ၊ ကတကိစ္စာ အနာသဝါ၊

ပဉ္စဒီပါ မဟာဝီရ၊ ပါဒေ ဝန္ဒာမိ [ဝန္ဒတိ (သီ. က.)] စက္ခုမ.

၁၁၂. ‘‘သတသဟဿိတော ကပ္ပေ၊ ယံ ဒီပမဒဒိံ တဒါ၊

ဒုဂ္ဂတိံ နာဘိဇာနာမိ၊ ပဉ္စဒီပါနိဒံ ဖလံ.

၁၁၃. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝါ.

၁၁၄. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၁၁၅. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ ပဉ္စဒီပိကာ ဘိက္ခုနီ ဣမာ ဂါထာယော အဘာသိတ္ထာတိ.

ပဉ္စဒီပိကာထေရိယာပဒါနံ နဝမံ.